Aisea 15 - Vakavakadewa Vou kei na iVola tale eso

Na Kalou ena Vakarusai Moapi

¹ Oqo na i tukutuku e baleti Moapi. E rau sa vakarusai o Ari kei Kiri ena dua ga na bogi Ka sa mai vakanomodi tu yani na vanua taucoko o Moapi

² Era sa cabe cake na lewe i Taiponi Me ra tagi ena i cabocabonisoro. Era sa tagicaki Nipo kei Meteva na kai Moapi, Ka ra sa toroya na uludra kei na kumidra ena rarawa.

³ Era sa vakaisulu ena taga na tamata era tu e gaunisala Ka ra tagi na tui ena veidela ni vale Kei ira na tu ena veiloma ni bai.

⁴ Era tabalaka cake na tagi na kai Esiponi kei Elale, Ka rawa ni rogoci sara na domodra mai Jasa. O ira sara mada ga na sotia ni Moapi, Era sautaninini ka ra taqaya.

⁵ Sa tagi na lomaqu ena vuku i Moapi, Era sa dro na tamata ki na koro o Soa, Ka so era cabeta cake na sala ki Luici, Ka ra tagi voli ena nodra lako yani. Eso era dro ki Oroneimi, Ka qolou ena tagi ni veivakarusai.

⁶ Sa maca na wai ena uciwai na Nimirimi, A ra sa malai na co e yasana, Ka sega na ka drokadroka e vo.

⁷ A ra sa lako kosova na qakilo ni veikuta na tamata Ena nodra via drotaka yani na nodra i yau kece.

⁸ Ia sa rogo na domo ni tagi Ena loma i Moapi taucoko; Ka sa rogo yani o Ekilami kei Pierielimi.

⁹ Sa sinai na uciwai mai Taiponi ena dra, Ka sa tiko talega vua na Kalou Eso na ka mosimosi cake vei ira na kena tamata. Ia ena yaco e dua na veivakamatei vakadomobula Vei ira na vo-ni-bula e Moapi.