Aisea 13 - Vakavakadewa Vou kei na iVola tale eso

Na Kalou ena Totogitaki Papiloni

¹ Oqo na i tukutuku me baleti Papiloni e a raica ena raivotu o Aisea na luve i Emosi.

² Vakarewataka cake na drotini ni valu, Ena dua na delana talasiga. Kaci yani vakadomoilevu vei ira, Yalovi ira me ra curu yani Ki na nodra matamata ni koro na turaga.

³ Au sa vakaroti ira na noqu tamata digitaki; Ka'u sa kacivi ira na noqu tamata qaqa, Me ra vakayacora na noqu cudru; Sa dau cibitaka na noqu qaqa.

⁴ Rogoca mada na rorogo mai na veiulunivanua, Sa vaka na nodra maue na lewe vuqa. Rogoca mada na lomada na veivanua, Na nodra soqoni vata na veimatanitu. Sa vakarautaki ira na nona mataivalu O Jiova ni lewevuqa me ra vakarau ki na i valu.

⁵ Era sa lako mai na dua na vanua yawa sara, Mai na i yalayala kei vuravura. Sa lako mai ena nona cudru o Jiova Me vakarusa na nona vanua taucoko.

⁶ Ni qolou ena rarawa; Sa voleka mai na siga i Jiova, Na siga ena kauta mai kina na veivakarusai o koya.

⁷ Ena malumalumu kina na liga kecega, Ka na datuvu kina na yalo kecega.

⁸ Ena yacovi ira kecega na rere, Ka ra bikai ena vutu me vaka na taratara ni yalewa bukete. Era na veiraici vakai ira ena taqaya, Ka waqa na matadra ena madua.

⁹ Raica sa voleka mai na siga i Jiova, Na siga rerevaki ni nona rarawa kei na cudru waqawaqa. Ena vuki kina na vuravura me vanua dravuisiga, Ka ra vakarusai kece na tamata i valavala ca.

¹⁰ Na veikalokalo ni lomalagi kei na kedra vuvale era na sega ni cila; Ena butobuto tu na matanisiga mai na gauna e cabe kina, Ka sega talega ni cila na rarama ni vula.

¹¹ A sa kaya na Turaga, “Au na kauta mai na veika ca ki vuravura Ka vakarusai ira na tamata i valavala ca. Au na vakaotia na nodra viavialevu na dokadoka Ka vakamalumalumutaka na nodra qaciqacia Na tamata i tovo kaukauwa.

¹² Au na cakava me kunei dredre na tamata Ka kunei vakarawarawa na koula; Io me lailai sobu na tamata ka levu cake na koula ni Ofia.

¹³ Au na vakavuna me yavavala na lomalagi, Ka me toso na vuravura mai na kena i tutu Ena levu ni noqu cudru ena siga rerevaki o ya.

¹⁴ Era na qai veidroyaki yani ki na dui nodra vanua Na vulagi era tiko mai Papiloni; Era na veiseyaki me vaka na dia Era sa dro tani mai vua na dauvakasasa, Ka vaka na sipi sa sega na kedra i vakatawa.

¹⁵ O ira kece era na kune era na lausua, Kei ira era vesu era na vakamatei.

¹⁶ Era na tavulaki na luvedra ki na qele, Me ra dasila e matadra, Ena butakoci na veika e tu ena nodra vale Ka ra na qai vesuki vakaukauwa na watidra.”

¹⁷ A sa kaya na Turaga, “Au na vakauqeti ira na kai Mitia, Me ra valuti Papiloni, Era sa sega ni kauwaitaka na siliva Ka ra sega ni taleitaka na koula.

¹⁸ Era na vakamatei ira na cauravou ena nodra dakaititi; Ka ra na sega ni lomani ira na gone lalai, Se o ira na gone era sa qai buketetaki.

¹⁹ O Papiloni na matanitu rairai vinaka taudua, Ka nodra i sakisaki na lewena. Ia oi au na Turaga, Au na kolotaki Papiloni Me vaka au a cakava vei Sotoma kei Komora.

²⁰ Ena sega tale ni tawani, Se dua na tamata me na tiko kina ena veitabagauna kecega. Ena sega ni dua na kai Arapea, dau veilakoyaki Me bau la'ki birika kina na nona valelaca, Se dua na dauvakana manumanu me vakana manumanu kina.

²¹ Ia ena nodra vanua na manumanu kila, Ka ra tawana na lulu ka dau meke kina na me tagane.

²² Ena rogo na domo ni olifa, Ena kena veivale cecere, Kei na domo ni koli ena veitikotiko vakaturaga. Sa voleka mai na siga i Papiloni Ka sa voleka ni oti na nona gauna.”