Aisea 11 - Vakavakadewa Vou kei na iVola tale eso

Na Matanitu ni Bula Sautu

¹ Na kawa vakatui nei Tevita sa vaka e dua na kau sa musuki; ia me vaka ni dau cadra cake tale mai eso na tabana vovou mai na i musumusu ni kau se mai na wakana, sa vakaoqo na nona vakarau cadra cake talega mai vakakina e dua na tui vou mai na kawa i Tevita.

² Ena tiko vua na yalo i Jiova, Ka na solia vua na yalo ni vuku kei na kila-ka, Na yalo ni veituberi kei na kaukauwa, Na rerevaki Jiova kei na yalomatua.

³ Na ka e marautaka sai koya na rerevaki Jiova. Ena sega ni vakatau na nona lewa ena ka e raica, Se vakatulewa ena ka e rogoca;

⁴ ia ena lewai ira na dravudravua ena lewa dodonu Ka taqomaka na nodra dodonu na yalo malumalumu. Ena ravuta na vanua ena nona i vakaro, Ka ra na mate kina na tamata i valavala ca.

⁵ Ena lewai ira na nona tamata ena lewa dodonu kei na yalodina.

⁶ E rau na bula vata na olifa kei na sipi, Ka rau na davo vata na leopate kei na me. E rau na kana vata na luve ni bulumakau Kei na luve ni laione, Ka na liutaki ira e dua na gone lailai.

⁷ E rau na kana vata na bulumakau yalewa kei na bea; Era na davo vata na luvedra, Ena kana co madu na laione me vaka na bulumakau.

⁸ Na gone dramidrami ena qito voli ena dela ni qara ni gata bati gaga, Ka na biuta na ligana na gone lailai ena dela ni qara ni gata.

⁹ Era na sega ni mavoa se vakarusai O ira kece era tiko ena noqu ulunivanua tabu. Ena sinai o vuravura ena kila-ka me baleti Jiova Me vaka sa robota na wasawasa na waitui.

O Ira ka Kau Vakabobula Era na Lesu Tale Mai

¹⁰ Ena siga o ya ena yaco na tui vou mai na kawa i Jese me i vakatakilakila vei ira na veimatatamata kecega. Era na qarai koya na veimatanitu, ka na lagilagi na nona i tikotiko vakatui.

¹¹ Ena siga o ya, ena vakayagataka tale na nona kaukauwa na Turaga me kauti ira lesu tale mai na vo-ni-bula vei ira na nona tamata mai Asiria, Ijipita, Pucirosi, Eciopea, Ilama, Saina, Emaci kei na veibaravi.

¹² Ena qai vakaraitaka cake na Turaga, E dua na i vakatakilakila vei ira na veimatanitu, Ka vakasoqoni ira tale mai na vakasavi tani e Isireli, Ka kauti ira vata mai na lewe i Juta era veiseyaki tu, Mai na tutuna vava kei vuravura.

¹³ Sa na oti vakadua na vuvutaki Juta nei Isireli, Ka sa na sega tale ni meca kei Isireli na vanua o Juta.

¹⁴ Ia era sa qai valuti Filisitia vata ena ra, Ka ravuti ira na tamata era tiko ki na tokalau. E rau na valuti Moapi kei Itomi, Ka ra na talairawarawa vei rau na kai Amoni.

¹⁵ Ena vakarusa sara o Jiova Na toba ni wasawasa ni Ijipita; Ena qai vakamamacataka na uciwai na Uferetisi Ena nona cagi levu katakata. Ena vukica o koya me vitu na i vakata ni wai, Me ra lako kosova rawa kina na tamata.

¹⁶ Ena qai dua na gaunisala levu mai Asiria Me baleti ira na vo-ni-bula vei ira na nona tamata Me vakataki ira na nodra qase na Isireli Ena nodra biuta mai na vanua o Ijipita.