Aisea 10 - Vakavakadewa Vou kei na iVola tale eso

¹ Ena yaco na veika ca, Vei ira era bulia na veilawa tawa dodonu, Kei ira era tabaka tikoga na veivakararawataki;

² Me ra vagolei ira tani na vakaloloma mai na ka dodonu, Me ra qai butakoca na nodra dodonu na tamata dravudravua, Vei ira na noqu tamata; Kovea na nodra i yau na yada, Ka taura na veika era taukena na luveniyali.

³ Na cava o ni na cakava ni sa na totogitaki kemuni na Kalou? Na cava o ni na cakava, Ni sa na kauta mai vei kemuni na leqa mai na dua na vanua yawa? O cei o ni na dro vua me vukei kemuni? O ni na vunitaka e vei na nomuni i yau?

⁴ Ena sega tale na ka e vo, Ia o ni na yarataki, Ena kedra maliwa era kau vakavesu, Se bale vei ira era sa moku mate. Na veika kece oqo ena sega ni vakaotia na cudru ni Turaga, A se dodo tikoga mai na ligana me veitotogitaki.

Vakayagataki o Asiria me Nona i Wau na Kalou

⁵ A sa kaya na Turaga, “O Asiria na noqu i wau, Au na mokuti ira kina au cudruvi ira.

⁶ Au sa talai Asiria Me ravuta e dua na vanua e sega ni kila na Kalou; Na matanitu sa vakacudrui au. Au sa tala me ravuta, butakoca Ka butuki ira sobu na tamata, Me vaka na soso ena gaunisala.

⁷ Ia sa sega ni nakita na ka oqo na tui Asiria, Ka sega ni nanuma ena nona vakasama, Ia sa nakita me vakayacora na i tovo kaukauwa, Ka vakarusa e vuqa sara na vanua.

⁸ Ni sa kaya, “Era sega li ni tui kece na noqu turaganivalu?

⁹ Au sa vakadruka na koro o Kakamisi kei Kaloni, O Emaci, Apati, Samaria kei Tamasiko.

¹⁰ Sa yaco sara ki ligaqu ki na veivanua, Era sa dau qarava na veimatakau, Vei Samaria kei Jerusalemi.

¹¹ Me'u na qai sega li ni cakava Ki Jerusalemi kei na kena veimatakau Na veika au sa cakava vei Samaria Kei na kena veimatakau?”

¹² Ni sa na vakaotia na nona cakacaka kece o Jiova ena ulunivanua o Saioni kei Jerusalemi, ena qai totogitaka na dokadoka viavialevu i tui Asiria kei na nona qaciqacia.

¹³ Ni sa kaya, “Au na cakava ga ena noqu kaukauwa, Ka ni'u sa vuku ka kila-ka. Au sa tosoya na nodra i yalayala na veimatanitu, Ka taura na nodra i yau. Me vaka e dua na bulumakau tagane, Au sa kauti ira sobu era dabe tiko Ena veidabedabe vakatui.

¹⁴ Sa kunea na ligaqu Na nodra i yau na veimatanitu Me vaka e dua na sova ni manumanu. Ka'u sa kumuna vata na vuravura taucoko Me vaka e dua na tamata sa vakatomika Na yaloka ka sa biu vakatikitiki tu. Ia sa sega ni bau dua e yavalata na tabana, Se dolava na gusuna, se bau tagi.”

¹⁵ Ia sa kaya na o Jiova, “Sa levu li na matau mai vei koya sa vakayagataka? Se sa levu cake na i varo vei koya sa varovaro kina? Na i wau e sega ni daucolata na tamata; Na tamata ga e daucolata na i wau.”

¹⁶ Ena tala mai kina vakaoqo o Jiova ni lewevuqa E dua na mate ni suivotu, Me tauvi ira na nona tamata qaqa. Ena kama tiko e yagodra e dua na buka, Ena waqa ka na kama tikoga.

¹⁷ Na rarama kei Isireli ena yaco me bukawaqa, Ka yameyame ni buka na nona Le Dua Savasava; Ena vakama ka vakarusa ena dua ga na siga Na nona kau vakavotona kei na soni.

¹⁸ Na lagilagi ni nona veikau kei na nona vanua bulabula Ena vakarusa ruarua na Turaga na yago kei na yalo Me vaka na nona vakarusa e dua na tamata na mate e tauva.

¹⁹ E vica wale sara na kau ena qai vo ena nona vanua Ka na rawa sara vua e dua na gone lailai me wilika.

Era na Suka Lesu mai na Vo-ni-bula

²⁰ Ena yaco mai na gauna era na sega ni qai vakararavi tiko na vo-ni-bula ni Isireli kei na mataqali i Jekope ki na matanitu e voleka ni vakarusai ira. Ia era na vakararavi ena yalodina vei Jiova na Kalou Yalo Savasava ni Isireli.

²¹ Era na lesu mai na vo-ni-bula, na vo-ni-bula i Jekope, era na lesu vua na nodra Kalou qaqa.

²² E dina ga ni ra lewe levu sara na Isireli me vaka na mataninuku ena matasawa, era na lewe lailai sara na vo-ni-bula era na lesu tale mai. Sa lewai me yaco na veivakarusai, ka sa dodonu ga me yaco vakakina.

²³ Ena kauta ga mai na veivakarusai ki na matanitu taucoko o Jiova ni lewevuqa me vaka sa yalataka.

Ena Totogitaki Asiria o Jiova

²⁴ A sa kaya o Jiova vei ira na nona tamata era tiko e Saioni, “Ni kakua ni rerevaka na kai Asiria, veitalia ga kevaka era vakararawataki kemuni me vaka era a dau vakayacora mai Ijipita.

²⁵ Sa voleka na gauna me oti na noqu cudru, au na qai vagolea vei ira na noqu cudru me'u vakarusai ira.

²⁶ Ena qai mokuti ira ena kuita o Jiova ni lewevuqa me vaka na nona mokuti ira na kai Mitiani ena vatu mai Orepi. Ena vakararawataki Asiria me vaka na nona vakararawataki Ijipita.

²⁷ Ena gauna o ya ena qai sereki kemuni na Turaga mai na nodra kaukauwa na kai Asiria ka na sega tale ni qai bibi e domomuni na nodra i colacola.

Era sa Kaba Vakaivalu mai na Meca

²⁸ Na mataivalu ni meca Era sa kaba na koro o Ai! Era sa siviti Mikironi mai, Ka biuta tu na nodra i yaya e Mikimasi.

²⁹ Era sa lako kosova mai na delana Ka ra mai moce sara e Kepa. Era sa rere na lewe i Rama, Ka ra sa dro na lewe i Qibea na koro i Saula.

³⁰ Ni qolou na lewe i Kalimi, Ni vakarorogo na lewe i Leisi, Mo ni sauma yani na kai Anacoci.

³¹ Era sa veiseyaki na lewe i Matimena, Ka ra sa dro me ra bula na kai Qebimi.

³² E daidai era sa yaco mai kina na meca ki na koro o Nipi, Ka ra na qai dodoka yani na ligadra, Ki na ulunivanua o Saioni, Ena koro o Jerusalemi.

³³ O Jiova ni lewevuqa ena kolotaki ira sobu, Me vaka na tabanikau era musuki mai na vuna. Ena musuki tani ka vakamaduataki O koya sa cecere ka dokadoka duadua vei ira.

³⁴ Ena musuki ira tani o Jiova Me vaka sa musuki ena matau ni kau mai veikau; Io, me vaka ni sa dau musuki vakakina Na kau totoka eso ni Lepanoni.