2 Veigauna 8 - Vakavakadewa Vou kei na iVola tale eso

Na Veika e Cakava o Solomoni

¹ E a taura e ruasagavulu na yabaki na balavu ni gauna sa tara kina o Solomoni na vale i Jiova kei na nona vale.

² E a tara talega o koya na veikoro ka a vakasuka mai o Irami na tui, ka vakatikori ira kina na Isireli.

³ E a la'ki valuti Emacisopa o Solomoni, ka taura vakavesu.

⁴ E a tara cake na koro o Tatimoa mai na vanua lala kei na veikoro ni maroroi i yau mai Emaci.

⁵ A tara talega na koro levu o Peci Oroni e cake kei Peci Oroni e ra, ka rau koro ni valu sa vakamatamata kei na bai kaukamea;

⁶ kei Pealaci, na veikoro kece ni yau nei Solomoni, na veikoro kece ni qiqinivalu, na nodra veikoro na nona dauvodo ose, na veika kecega a via tara o Solomoni mai Jerusalemi, Lepanoni kei na veivanua kece ni nona matanitu.

⁷ O ira kece na vo ni tamata mai vei ira na Itaiti, na Amoraiti, na Perisaiti, na Aivaiti, kei ira na Jepusaiti (oqo era sega ni kai Isireli),

⁸ ka o ira oqo na nodra kawa sa vo baleta ni ra a sega ni vakarusai mai vei ira na Isireli, a sa lavaka vei ira o Solomoni me ra cakacaka vakasaurarataki me yacova na siga oqo.

⁹ A sega ga ni vakasaurarataka e dua vei ira na Isireli me baleta na nona cakacaka; ia era a veiqaravi ga me nona sotia, kei na vakailesilesi vakaivalu, kei na komada ni qiqinivalu, kei na nona tamata dauvodo ose.

¹⁰ Era sa lesi talega me ra lewai na tamata era qarava na veicakacaka ni tara vale eso, ka ra lewe 250 taucoko na i vakalesilesi oqo.

¹¹ A sa tokitaka o Solomoni na watina, o ya na luvena na tui Ijipita mai na Koro i Tevita ki na vale sa tara me nona. A sa kaya, Na watiqu e sega ni dodonu me tiko ena valenitui nei Tevita na tui Isireli, baleta ni sa okati me ka tabu na veivanua kece sara e vakotori kina na Kato ni Veiyalayalati.

¹² A sa qai vakacabora o Solomoni na i soro kama vei Jiova ena dela ni cabocabonisoro i Jiova sa tara ena mata ni Valenisoro.

¹³ Na i soro kama kece e vakacabora sa vakayacori me vaka na kena i vakarau ena Lawa i Mosese me baleta na siga vakatabui eso me vaka na Siga ni Vakacecegu, ena Solevu ni Vula Vou kece, kei na tolu na solevu lokuci vakayabaki, o ya na Solevu ni Madrai Sega ni Vakatubu, na Solevu ni Tatamusuki, kei na Solevu ni Valetabanikau.

¹⁴ A lesia o koya na veimata bete ki na nodra cakacaka, me vaka a vakarota o Tevita na tamana, kei ira na Livai ki na nodra dui i tavi, me ra lagata na sere ka veiqaravi e matadra na bete, me vaka e vinakati ena veisiga yadua, kei ira talega na mata i vakatawa ni katuba ena nodra veimatamata ni koro e vuqa; ni a vakarota vakaoqo o Tevita na tamata ni Kalou.

¹⁵ Era a sega sara ni bau gole tani mai na i vakaro a virikotora na tui vei ira na bete kei ira na Livai me baleta e dua ga na ka, se ena vuku ni veivaleniyau.

¹⁶ A vakaoqo na kena vakayacori na veicakacaka kece i Solomoni me vakatekivu mai na siga a tauyavutaki kina na vale i Jiova, me yacova sara ni sa tara oti. A sa vakacavari vakavinaka na tara vale i Jiova.

¹⁷ A lako o Solomoni ki Esionikeperi kei Eloci, mai na matasawa ni vanua o Itomi.

¹⁸ A sa tala o Irami na tui eso na nona tamata, me ra kauta vua eso na waqa, vata kei ira na kila na sokotaka, ka ra lako ki Ofira vata kei ira na tamata i Solomoni, me ra la'ki kauta mai kea e sivia na 15,000 na kilokaramu na koula, ka kauta mai vei Solomoni na tui.