2 Veigauna 7 - Vakavakadewa Vou kei na iVola tale eso

Na Vakatabui ni Vale ni Kalou

¹ Ia ni tinia na nona masu o Solomoni, a lutu sobu mai lomalagi na bukawaqa, ka kania na i soro kama, kei na i madrali, ka vakasinaita na vale tabu ena i serau i Jiova.

² Era a sega ni curu rawa ki na vale i Jiova na bete, baleta ni a vakasinaita tu na nona i serau.

³ Ia ni ra raica kece na luve i Isireli ni sa lako sobu mai na bukawaqa kei na i serau i Jiova ki na dela ni vale, era a cuva sobu ki na qele ena rara, ra lotu, vakavinavinaka vei Jiova, ka kaya, Ni sa vinaka o koya, Ni sa tu dei ka tawa mudu na nona loloma.

⁴ A qai vakacabora na i soro na tui kei ira kecega na tamata ena mata i Jiova.

⁵ A vakacabora o Solomoni na tui na i soro, o ya e 22,000 na bulumakau, kei na dua na 120,000 na sipi. A vakatabuya na Vale ni Kalou na tui vata kei ira kecega na tamata.

⁶ Era a dui qarava na nodra i tavi na bete; kei ira talega na Livai, ka ra vakayagataka na i vakatagi rogo vinaka cakava tu o Tevita na tui me baleta na vakavinavinaka vei Jiova, ena vuku ni nona loloma ka na tudei tikoga ka tawa mudu ena veigauna ga e cabora kina na nona vakavinavinaka o Tevita ena nodra veiqaravi; A ra sa uvu davui e matadra na bete, ka ra duri tu o ira kece na Isireli.

⁷ A vakatabuya talega o Solomoni na lomanibai ka koto ena mata ni vale i Jiova; ni a vakacabora e kea na i soro kama, kei na uro ni i soro ni veivinakati, ni a lailai na i cabocabonisoro parasa a cakava o Solomoni me vakacabori kina na i soro kama, na i madrali laukana kei na uro.

⁸ A sa vakarautaka o Solomoni na solevu ni gauna o ya kei ira na Isireli kece me bogi vitu, ka dua na i soqosoqo vakaitamera, me vakatekivu mai na i curucuru ki Emaci mai na vualiku me yaco ki na i yalayala ni vanua o Ijipita ena ceva.

⁹ Ia, ena i kawalu ni siga, era a cakava e dua na i soqosoqo tabu; ni a siga vitu na nodra vakatabuya na i cabocabonisoro, ka siga vitu talega na solevu.

¹⁰ Ia ena i ka ruasagavulu kavitu ni siga ni kavitu ni vula, a talai ira yani na tamata ki na nodra veivale, ka reki, ka marau na yalodra, ena vuku ni vinaka ka a vakaraitaka o Jiova vei Tevita, Solomoni, kei ira na Isireli na nona tamata.

Na Veiyalayalati ni Kalou kei Solomoni

¹¹ A tara vakaoti o Solomoni na vale i Jiova, kei na valenitui; a vakacavara vakavinaka sara na veika kece ka nakita o Solomoni ena vale i Jiova, kei na nona vale.

¹² A rairai vei Solomoni ena bogi o Jiova, ka kaya vua Au sa rogoca oti na nomu masu, ka'u sa digitaka na tikina oqo me noqu ka me vale me caka kina na i soro.

¹³ Kevaka au sa sogota na lomalagi me kakua kina ni tau na uca, se me'u talai ira na vodre me ra kania na vanua, se me'u tala e dua na mate levu vei ira na noqu tamata;

¹⁴ kevaka era sa vakamalumalumutaki na noqu tamata ka ra vakayacani ena yacaqu, masu, gole mai vei au, ka vuki tani mai na nodra i valavala ca, au na qai rogoca mai lomalagi, ka'u na bokoca na nodra i valavala ca, ka vakabula na nodra vanua.

¹⁵ Ia oqo sa na yadra ka wanono tiko na mataqu, ka'u na dau vakatudaliga ki na masu sa caka ena tikina oqo.

¹⁶ Ia oqo, au sa qai digitaka ka vakatabuya na vale oqo, me tiko kina na yacaqu ka tawa mudu; ia ena tikotiko ga kina na mataqu kei na lomaqu.

¹⁷ Ia o iko, kevaka o lako voli e mataqu, me vakataki Tevita na tamamu, ka kitaka na veika kece me vaka ka'u a vakarota vei iko, ka vakabauta na noqu i lesilesi kei na noqu lewa;

¹⁸ au na qai vakataudeitaka na nomu i tikotiko vakaturaga, me vaka ka'u a veiyalayalatitaka kei Tevita na tamamu, ni'u a kaya, Ena sega ni mudu vei iko na kawa me nodra tui na Isireli.

¹⁹ Ia kevaka o ni vuki tani, ka biuta na noqu i lesilesi, kei na noqu vunau ka'u sa tauca e matamuni, ka lako ka la'ki qarava na kalou tani, ka soro vei ira;

²⁰ au na qai cavuivuvutaki kemuni mai na vanua au a solia vei kemuni; kei na vale oqo, ka'u sa vakatabuya kina na yacaqu, au sa na biuta tani mai na mataqu, ia au na vakavuna me dau vosa vakaibalebaletaki ka na dau tukuni tu na veika ca a yaco vei ira na tamata kecega.

²¹ Ia na vale cecere ka dokai oqo, era na kurabui ka kaya kecega na lako voleka kina, A cava li na vuna ka a kitaka kina vaka oqo o Jiova ki na vanua, kei na vale oqo?

²² Era na qai kaya, Ni ra a biuti Jiova na nodra Kalou na nodra qase, o koya ka a kauti ira tani mai na vanua o Ijipita, ka ra la'ki taura na kalou tani eso, me ra soro kina, ka qarava. Ena vuku ni ka oqo, a vakayacora kina vei ira o koya na veika ca kecega.