2 Veigauna 4 - Vakavakadewa Vou kei na iVola tale eso

Na i Yaya ni Vale ni Kalou

¹ Sa cakava o Solomoni na tui e dua na i cabocabonisoro parasa, e ciwa na mita na kena balavu, e ciwa na mita na kena raba, ka 4.5 na mita na kena cere.

² A sa cakava talega e dua na taqe ni wai parasa mokimokiti, e 2.2 na mita na kena titobu, e 4.4 na mita na kena raba mai na dua na yasana ki na dua tale, ka 13.2 na mita na i vakarau ni batibatina wavoki.

³ Ena dago ni taqe e tuba mai na batibatina e cake, e taqavirua koto kina na kena i ukuuku ni vakatakarakara ni bulumakau tagane, ka tuva oqo ena rua na i yatu, o ya me tini na bulumakau ena vei 45 na senitimita, ka semati vata kece kei na taqe na veika oqo.

⁴ E vakadaberi na taqe levu e deladratou e lewe tinikarua na i vakatakarakara ni bulumakau parasa, e tolu e ratou qara vaka ki na vualiku, e tolu e ratou vakanamata ki na ra, e tolu e ratou qara ki na ceva, kei na tolu e ratou vakanamata ki na tokalau, ka ra sa vakanadaku kecega ki loma na bulumakau.

⁵ Ia na kena vavaku na tani a tautauvata kei na raba ni liga, a buli na batina me vaka na bati ni bilo, me vaka na se ni viavia; a tawa rawa kina e ono na udolu na lita.

⁶ A cakava talega o koya e tini na tani lalai, me dau ia kina na vuluvulu; e lima ena yasana vaka ki na ceva, ka lima vaka ki na vualiku. Era a dau vuya kina na veika era sa vakacabora me i soro kama; ia na tani levu sa nodra me ra dau sasavui kina na bete.

⁷ A cakava talega o koya e tini na i tutu ni cina koula me vaka na kedra i vakatakarakara, ka vakatikora ena rumu levu ni Valenisoro, e lima ena i matau ka lima ena i mawi.

⁸ A cakava talega o koya e tini na teveli, ka vakatikora ena Valenisoro, e lima ena i matau, ka lima ena i mawi; a cakava talega e 100 na beseni koula.

⁹ A cakava o koya e dua na nodra lomanibai tabu na bete, kei na dua na rara vakabai levu, kei na i sogo ni lomanibai, ka boroya na katuba eso ena parasa.

¹⁰ A vakatikora na taqe levu ena yasa i matau ni vale vaka ki na tokalau cevaceva.

¹¹ A bulia talega o Urami eso na kuro, na i sivi ni dravusa, kei na beseni. A vakaotia o koya na veicakacaka kecega a cakava ena vale ni Kalou ena vuku i Solomoni na tui.

¹² A rua na duru, kei na veika mokimokiti ena domodomo a tu ena deladrau na duru ruarua; kei na rua na lawalawa me ubia na ka mokimokiti ena domodomo ena dela ni duru;

¹³ na 400 na i vakatakarakara ni vua ni pomekaraneti ena lawa tali ruarua, me ubia na i ukuuku mokimokiti e rua ka toka e deladrau na duru.

¹⁴ A sa cakava talega na i tutu eso, ka vakadabera na tani ena kedratou i tutu;

¹⁵ e dua na tani levu kei na tinikarua na bulumakau e rukuna.

¹⁶ Na kuro, na i sivi ni dravusa, na i cula ni lewe ni manumanu, kei na veiyaya kecega oqori, a cakava o Urami mai na parasa solo vakavinaka ena vale i Jiova ena vuku i Solomoni na tui.

¹⁷ A cakava na veika kece oqo na tui ena buca mai Joritani, ena vanua tete ena kedrau veimama o Sukoci kei Serata.

¹⁸ A veika kece sa cakava o Solomoni sa ka levu sara, ka sega e dua me vakarautaka rawa na levu ni parasa e vakayagataki.

¹⁹ A cakava o Solomoni na veiyaya kece sa tu ena vale ni Kalou: na i cabocabonisoro koula, na teveli sa tu kina na madrai dauraici,

²⁰ na cina kei na kedra i tutu koula dina me la'ki caudre me vaka na kena i tuvatuva ena mata ni Tikina Tabu Sara;

²¹ kei na senikau eso, na cina, na i saga ni buka buli ena koula talei;

²² kei na i koti ni vauvau ni cina, na beseni, na i taki, na miqa ni ka boi vinaka buli ena koula dina, ka vakakina na idi ni katuba ni Tikina Tabu Sara kei na idi ni katuba levu ni Valenisoro.