2 Veigauna 3 - Vakavakadewa Vou kei na iVola tale eso

Tara o Solomoni na Vale ni Kalou

¹ A qai vakatekivu me tara o Solomoni na vale i Jiova mai Jerusalemi ena Ulunivanua o Moraia, ena vanua ka a rairai kina vei Tevita na tamana o Jiova, ena vanua ka a digitaka o Tevita ena rara ni samu witi nei Orinani na Jepusaiti.

² A tekivu tara na vale tabu ena i karua ni vula, ni ka va ni yabaki ni nona tui.

³ Oqo na i tuvatuva vakarautaki i Solomoni me baleta na kena tara na vale ni Kalou: Na kena balavu e 27 na mita ka kena raba e 9 na mita.

⁴ Na balavu ni varada se i curucuru ki na mata ni vale sa tautauvata kei na raba ni Valenisoro, o ya e ciwa na mita, ka sa 54 na mita na kena cere. A sa ubia na loma ni vale ena koula dina.

⁵ A sa taqaviruataka na lalaga e loma ni rumu levu ena kau sitari ka qai ubia ena koula dina, ka ceuta kina na vuni niusawa kei na talitali eso me vaka na sinucodo me kena i ukuuku.

⁶ A sa ukucavutaka na tui na Valenisoro ena vatu talei eso kei na koula sa voli mai na vanua o Parivaimi.

⁷ A ubia talega na siligi ni vale, na i lago, na duru, na lalaga, kei na kena katuba ena koula; ka ceuta talega na i yaloyalo ni jerupi ena lalaga.

⁸ Na rumu tabu e loma, ka sa vakatokai na Tikina Tabu Sara, e 9 na mita na kena balavu ka 9 na mita na kena raba, ka sa tautauvata kei na raraba ni Valenisoro. A sa ubi na lalaga ni Tikina Tabu Sara ena koula ka sivia e 20 na tani koula e vakayagataki.

⁹ E a vakayagataki e 570 na karamu koula me buli kina na i vako, ka boro talega ena koula na lalaga ni veirumu e cake.

¹⁰ A sa vakarota talega na tui me buli mai na kaukamea e rua na jerupi, ka me boro na dagona ena koula, ka vakatikori ena Tikina Tabu Sara.

¹¹ Ia na i soqoni ni balavu ni tabadrau na jerupi e 8.8 na mita. E dua na taba ni matai ni jerupi e 2.2 na mita na kena balavu sa tara yani na lalaga ni rumu tabu, ka kena i karua, e 2.2 talega na mita na kena balavu, sa tara yani na i karua ni taba ni jerupi.

¹² A sa vakakina na i karua ni jerupi, ni sa 2.2 na mita na kena balavu, ka tara yani na lalaga kadua ni rumu tabu; ia na karua ni tabana sa 2.2 na mita na kena balavu sa tara yani na tabai koya na i matai ni jerupi.

¹³ A vakatetaba tu na tabadrau na jerupi e rua oqo ka robota yani e 8.8 na mita, ka rau sa duri cake tu, ka qara vata ki loma na matadrau.

¹⁴ Na i latilati ni Tikina Tabu Sara sa cakava o koya mai na i sulu lineni kei na wa era roka karakarawa, lokaloka, kei na damudamu, ka talia kina eso na jerupi me kena i ukuuku.

Na Duru Parasa Lelevu e Rua

¹⁵ A sa cakava na tui e rua na duru lelevu ena mata ni Valenisoro, ka balavu ni duru yadudua e 15.5 na mita. Na kena i sema ki na ulu ni duru e 2.2 na mita na kena balavu ki cake.

¹⁶ E a ukutaka na duru lelevu oqo ena i yaloyalo ni talitali me vaka na sinucodo kei na 100 na pomekaraneti parasa.

¹⁷ A vakaduria cake na duru ruarua ena mata ni vale, e dua ki na i matau, kei na kena i karua ki na i mawi; ka sa vakatoka me yaca ni duru sa tu ena i matau o Jakini, kei na yaca ni duru ena i mawi o Poasa.