2 Veigauna 18 - Vakavakadewa Vou kei na iVola tale eso

Parofisaitaka na Druka o Mekaia

¹ Ia oqo a vutuniyau vakalevu sara o Josefati, ka dokai talega vakalevu; ka vakawati ki na mataqali i Eapi.

² Ia ni oti e vica na yabaki a lako sobu vei Eapi ki Samaria. A vakamatea e levu na sipi kei na bulumakau me kena, kei ira na nona lewe ni lawalawa, a cikevi koya o Eapi me lako ki Remocikiliati.

³ A sa kaya o Eapi na tui Isireli vei Josefati na tui Juta, O na lako vata li kei au ki Remocikiliati se sega? A qai kaya vua, Oi kedaru vata ga; sa duavata ga na nodaru tamata. Ia keimami na duavata kei iko ena i valu.

⁴ A sa kaya vua na tui Isireli o Josefati, Mo taroga taumada na vosa i Jiova.

⁵ A vakasoqoni ira vata era lewe va na drau na parofita na tui Isireli, ka kaya vei ira, “Me keimami lako li ki vala ki Remocikiliati se me kakua?” Era a kaya, “Ni lako ga, ka ni sa soli Remocikiliati ki ligana na tui na Kalou.”

⁶ Ia a kaya o Josefati, Sa sega beka li ni tiko e ke e dua na parofita i Jiova, me daru tarogi koya?

⁷ A sa kaya vei Josefati na tui Isireli, Sa qai vo ga e dua na tamata me daru tarogi koya me baleti Jiova; o ya o Mekaia na luve i Imila. Ia ka'u a cati koya ni sega ni dau parofisaitaka na ka vinaka e mataqu, na ka ca ga. A sa kaya o Josefati, Me kakua ni kaya vaka o ya na tui.

⁸ A qai kaciva e dua na turaganivalu na tui isireli, ka kaya, Me la'ki kacivi mai vakatotolo o Mekaia na luve i Imila.

⁹ Ia oqo e rau a dui tiko ena nodrau i tikotiko vakaturaga na tui Isireli, kei Josefati na tui Juta, e rau a vakaisulu tu vakaturaga, ena rara ni samu sila mai na matamata ni koro mai Samaria, ka ra a parofisai tiko e matadrau o ira kece na parofita.

¹⁰ A bulia o Setekaia na luve i Kinana eso na i leu ni manumanu kaukamea, ka kaya, Sa kaya vakaoqo o Jiova, O ni na cumuti ira tani na kai Siria ena veika oqo, me yacova sara ni ra vakarusai.

¹¹ Era a parofisai vakakina o ira kecega na parofita, ka kaya, Mo ni lako cake ki Remocikiliati, ka la'ki qaqa kina; ka na solia o Jiova ki na ligamuni na tui.

¹² A sa kaya vei Mekaia na tamata ka la'ki kaciva, Mo raica, ni sa duavata tikoga na nodra vosa na parofita ni ra sa tukuna na ka vinaka vua na tui; ia me tautauvata mada na nomu vosa kei na nona vosa e dua vei ira, ka mo cavuta na vinaka.

¹³ Ia a kaya o Mekaia, Me vaka sa bula o Jiova, au sa na vosataka ga na ka sa kaya na noqu Kalou.

¹⁴ Ia ni lako mai vua na tui, ka kaya vua, I Mekaia, me keimami lako li ki Remocikiliati me vala kina se me kakua?

¹⁵ A sa kaya vua na tui, Me'u vakabubuluitaki iko vakavica tale, me cavuta kina vei au na ka dina kece ena yaca i Jiova?

¹⁶ A sa kaya o Mekaia, Au sa raici ira kecega na Isireli, ni ra sa dui kabuwacara tu ena veiulunivanua, me vaka na sipi sa sega na kedra i vakatawa; a kaya o Jiova Sa sega na nodra turaga o ira oqo; me ra dui lesu ena vakacegu ki na nodra vale.

¹⁷ A sa kaya na tui Isireli vei Josefati, Au a sega li ni kaya vei iko, ni na sega ni parofisaitaka o koya e dua na ka vinaka ena vukuqu, na ka ca ga?

¹⁸ A sa kaya o Mekaia, O koya oqo, mo ni rogoca kina na vosa i Jiova: Au a raici Jiova, ni a tiko ena nona i tikotiko vakaturaga, ka ra tiko voleka vua ena i matau kei na mawi o ira kecega na lewe i lomalagi;

¹⁹ a kaya o Jiova, O cei ena temaki Eapi na tui Isireli, me lako cake me bale mate mai Remocikiliati? A qai vosa e dua ka kaya e dua na ka, ka dua tale a kaya e dua tale na ka.

²⁰ A lako mai e dua na yalo, ka la'ki tu ena mata i Jiova, ka kaya, Oi au ga, ka'u na temaki koya. Ka kaya vua o Jiova, Ena sala cava?

²¹ A sa kaya o koya, Au sa na lako yani, ka na la'ki vaka e dua na yalo lasulasu ena gusudra kece na nona parofita. A sa kaya o Jiova, O iko ga o sa na temaki koya, ka o sa na rawata; mo lako yani ka cakava vakakina.

²² Ia oqo, raica, a vakacuruma o Jiova e dua na yalo lasulasu ena gusudra na nomuni parofita oqo; a sa vosataka na ka ca o Jiova me baleti kemuni.

²³ A toro voleka mai o Setekaia na luve i Kenana ka sabici Mekaia e baluna, ka kaya, A sala cava sa lako tani kina mai vei au na Yalo i Jiova me vosa vei iko?

²⁴ A sa kaya o Mekaia, Raica, o sa na qai kunea ga ena siga o na la'ki curu kina ki na dua na rumu e loma mo vunitaki iko kina.

²⁵ A sa kaya na tui Isireli, Mo ni vesuki Mekaia, ka kauti koya tale vei Emoni na kovana ni koro, kei Joasa na luvenitui;

²⁶ ka kaya, Sa vosa vakaoqo na tui, Drau biuti la na tamata oqo ki na vale ni veivesu, ka vakalailaitaka na kena kakana kei na mena wai, me yacova ni'u sa lesu tale mai ena vakacegu.

²⁷ A sa kaya o Mekaia, Kevaka o ni lesu dina mai ena vakacegu, sa na qai sega ni vosa e gusuqu o Jiova. A sa kaya o koya, Ni rogoca mada oi kemuni kecega na tamata!

Na Mate i Eapi

²⁸ E rau a lako cake ki Remocikiliati o Eapi na tui Isireli kei Josefati na tui Juta.

²⁹ A sa kaya vei Josefati na tui Isireli, Au na veisautaka na noqu i sulu ka lako vakalecaleca ki na i valu, ia mo tokara ga o iko na nomu i sulu vakatui. A mani lako vakavuni se vakalecaleca ki na i valu na tui Isireli.

³⁰ Ia a vakarota vei ira na nona turaga ni qiqinivalu na tui Siria, ka vaka, Ni kakua sara ni veivala kaya e dua e lailai, se e dua e levu, vei koya duadua ga na tui Isireli.

³¹ Ni ra sa raici Josefati o ira na turaga ni qiqinivalu, era sa vakasasataki koya ni ra namuma ni o koya na tui Isireli. Ia sa kaila ena domo levu o Josefati, ka sa vukei koya na TURAGA na Kalou. Sa vakayarayarataki ira tani mai vua na Kalou.

³² Ena gauna ga era raica kina na kavetani ni qiqinivalu ni a sega ni tui Isireli o koya, era a lesu ki muri ka ra sega ni vakasavi koya.

³³ Ia sa qai dua na sotia ni Siria sa vanataka na dakaititi ka lauti Eapi na tui ena vanua e sema kina na nona i sulu ni valu. Sa tukuna kina vua na draiva ni nona ose ni qiqinivalu; Mo vuki lesu ka kauti au tani mai na vanua ni veiraravui oqo, ni'u sa mavoa.

³⁴ A katakata cake na veivaluvaluti ena siga o ya, ia sa vakaukauwataki koya tikoga me duri cake toka ga na tui Isireli ena nona qiqinivalu, me vala kei ira na kai Siria me yacova na yakavi; a qai mate o koya ena dromu ni siga.