2 Tui 8 - Vakavakadewa Vou kei na iVola tale eso

Vakalesui na Nona i Yau na Yalewa ni Sunemi

¹ A sa kaya oti o Ilaisa vua na yalewa ni Sunemi, ka luvena sa vakabula o koya mai na mate, ni sa na vakayacora na dausiga ni vanua o Jiova me vitu na yabaki na kena dede, ka sa dodonu me ratou lako tani kina vakavuvale ki na dua tale na vanua me ratou la'ki bula kina.

² A sa muria na nona vosa na tamata ni Kalou na yalewa oqo; a sa lako yani kei ira na wekana, ka tiko vakavulagi ena nodra vanua na kai Filisitia me vitu na yabaki.

³ Ni sa oti na vitu na yabaki, a qai lesu tale mai na yalewa ni Sunemi mai na nodra vanua na kai Filisitia, ka la'ki masuta na tui ena vuku ni kena vakalesui tale mai na nona vale kei na nona tiki ni vanua.

⁴ A sa raica ni rau veivosaki tiko na tui kei na dauveiqaravi nei Ilaisa o Keasi; ka ni gadreva na tui me kila na veicakacaka mana lelevu sa cakava o Ilaisa.

⁵ Ena gauna e talanoataka tiko kina o Keasi vua na tui na nona a vakabula o Ilaisa e dua na gone sa mate tu, a sa lako yani na yalewa ka vakaraitaka na nona kerekere vua na tui. A sa kaya o Keasi, “Kemuni na tui, sai koya sara ga oqo na yalewa kei na luvena tagane ka vakabula mai na mate o Ilaisa!”

⁶ Ena kena saumi lesu na taro ni tui, a sa vakadeitaka na yalewa na dina ni i talanoa nei Keasi, ka vakavuna oqo me kaciva kina na tui na nona i vakalesilesi ka tukuna vua me vakasukai na veika kece e taukena na yalewa, ka okati kina na i sau ni nona i tei sa tamusuki mai na nona i teitei ena loma ni yabaki vitu ka yali tu kina.

O Ilaisa kei Penietati na Tui Siria

⁷ A sa lako ki Tamasiko o Ilaisa ena gauna e tauvi mate tiko kina o Penietati na tui Siria. Ni sa tukuni vua na tui ni tiko voli e kea o Ilaisa,

⁸ a sa kaya vua na nona i vakalesilesi o Eseeli, “Mo kauta mada e dua na ka ni loloma vua na parofita, ka kerea vua me vakataroga mada vei Jiova ena vuku ni noqu tauvi mate, se'u na bula tale mai, se segai.”

⁹ A sa vakavodoka o Eseeli ena dela ni 40 na kameli na veimataqali ka ni loloma digitaki mai Tamasiko, ka sa lako yani vei Ilaisa. Ni rau sa sota, a sa kaya o Eseeli, “Na nomuni tamata o tui Penietati sa talai au mai me'u taroga vei iko se na bula tale mai na nona tauvi mate se segai.”

¹⁰ A sa kaya vua o Ilaisa, “Mo la'ki kaya vua, ‘O na bula vakaidina o iko’; ia sa vakatakila vei au o Jiova ni na mate vakaidina o koya.

¹¹ A sa qai wanonovi koya matua sara vakadede o Ilaisa me yacova ni sa madua o Eseeli. A vakasauri ni sa tagi na tamata ni Kalou.

¹² A sa taroga o Eseeli, “A cava o sa tagi kina na noqu turaga?” A sauma o koya ka vaka, “Baleta ni'u sa kila tu na ka ca o na cakava vei ira na Isireli. O na vakama na nodra veikoro vakabai, o na vakamatei ira na nodra cauravou ena i seleiwau, o na mokumokulaki ira vakaca na luvedra me yacova na nodra mate, ka tava na ketedra na yalewa bukete.”

¹³ A sa kaya o Eseeli, “Ena rawa vakacava me tu vei au na mataqali kaukauwa vaka oqori? Sa sega ni dua na ka oi au!” A sauma o Ilaisa ka kaya, “Sa vakatakila vei au o Jiova ni o na yaco mo tui Siria.”

¹⁴ A sa lesu yani o Eseeli vei Penietati, ka sa tarogi koya, “A cava sa kaya vei iko o Ilaisa? A sauma o Eseeli ka vaka, “Sa kaya vei au ni o na bula vakaidina.”

¹⁵ Ia ena siga ka tarava, a sa taura o Eseeli na i tutuvi, ka tonia ena wai, ka ovica kina na mata ni tui me yacova ni sa mate. A sa veisosomitaki vei Penietati o Eseeli me tui Siria.

O Jiorami na Tui Juta

¹⁶ Ena i kalima ni yabaki i Jorami na luve i Eapi na tui Isireli, a veiliutaki o Jiorami na luve i Josefati na tui Juta.

¹⁷ A yabaki tolusagavulu karua o koya ni a buli me tui, ka tui tiko mai Jerusalemi me yabaki walu.

¹⁸ A muria o koya na nodra i valavala na tui Isireli, me vaka a cakava na mataqali i Eapi, ni a watina na luve i Eapi. A dau caka ca o koya ena mata i Jiova.

¹⁹ Ia a sega ni via vakawabokotaki ira na Juta o Jiova ena vuku i Tevita na nona tamata, me vaka ni a yalataka vua ni ra na veiliutaki vakatui tikoga na nona kawa.

²⁰ Ena gauna ni veiliutaki vakatui nei Jiorami, era a bese ni muri lewa ki Juta na kai Itomi, ka ra tauyavutaka na nodra matanitu vakataki ira.

²¹ A sa lako yani o Jiorami ki Sea vata kei na nona qiqinivalu kece, ka sa vakavolivoliti ira na mataivalu ni Itomi. Ia ni sa bogi na vanua, sa cavutu o koya kei ira na nona turaganivalu ni qiqinivalu me ra botea na i lati ka dro tani, ka ra sa veiseyaki na nona sotia ki na nodra veivale.

²² Era a tu vakataki ira ga na kai Itomi ka sega ni qali ki Juta me yacova na siga oqo. O ira talega na kai Lipina era a vuki tani ena gauna vata o ya.

²³ Ia na vo ni cakacaka i Jiorami kei na ka kecega sa cakava o koya sa volai ena Kedra i Volatukutuku na Tui Juta.

²⁴ A sa mate o Jorami ka la'ki bulu ena i bulubulu vakatui ena Koro i Tevita, ka sa sosomitaki koya me tui o Esaia na luvena.

O Esaia na Tui Juta

²⁵ Ena kena i katinikarua ni yabaki i Jorami na tui Isireli, na luve i Eapi, a sa yaco me tui Juta o Esaia na luve i Jiorami.

²⁶ A yabaki ruasagavulu karua o Esaia ena gauna a buli kina me tui, ka tui mai Jerusalemi ka yabaki dua. Ia na yaca i tinana o Acalaia na luve i Omirai na tui Isireli.

²⁷ A muria talega na i valavala ni mataqali i Eapi, o koya, ka dau caka ca ena mata i Jiova me vaka a cakava na mataqali i Eapi, ni a veivugoni o koya kei na vuvale i Eapi.

²⁸ E rau a lako kei Jorami na luve i Eapi ki na i valu i Eseeli na tui Siria mai Remoci-kiliati; na vanua ka ra vakamavoataki Jorami kina o ira na kai Siria.

²⁹ A lesu ki Jesireli o Jorami na tui, me la'ki vakabulabula ena vuku ni nona mavoa mai Rama, a sa lako yani o Esaia me mai sikovi koya e kea.