2 Tui 6 - Vakavakadewa Vou kei na iVola tale eso

Nawa na Yame ni Matau Kaukamea

¹ Era a kaya vei Ilaisa na luvedra na parofita, Raica na noda i tikotiko e sa rui lailai ka osooso vakalevu.

² Me da lako mada ki na Joritani ka la'ki taya kina eso na kau me mai tara kina e dua na noda i tikotiko, me da tiko kina. A sa kaya, Ni lako yani.

³ A sa kaya e dua, Mo ni yalo vinaka mada, ka lako vata kei keimami na nomuni tamata. A sa kaya o Ilaisa, Au na lako vata kei kemuni.

⁴ A lako vata kei ira o koya. Ia ni ra yaco yani ki na Joritani, era a tekivu ta kau sara.

⁵ Ia ni taya tiko e dua na kau e dua vei ira, a mani lutu ki wai na yame ni matau; a tagi o koya, ka kaya, Isa noqu turaga! A kerei mai na matau sa lutu oqo.

⁶ A qai kaya tamata ni Kalou, E vei na vanua a lutu kina? A vakatakila o koya na vanua sa lutu kina. A taya o Ilaisa e dua na taba ni kau ka biuta kina; a vude mai na matau kaukamea.

⁷ A sa kaya o koya, Mo taura cake. A dodoka yani na ligana, ka taura.

Ira na Kai Siria kei Ilaisa

⁸ Ena dua na gauna, a qai vala kei ira na Isireli o tui Siria; a bose vata kei ira na nona tamata o koya, ka kaya, Ena tikina o ya ena tiko kina na noqu i tikotiko ni valu.

⁹ A talatala vei tui Isireli o koya na tamata ni Kalou, ka kaya, Mo qarauni iko, mo kakua ni lako ena vanua o ya, ni ra sa koto vuni kina na kai Siria.

¹⁰ A vakasalataki ira na tamata era tiko e kea na tui Isireli me ra qaqarauni. A yaco vakavuqa na ka oqo.

¹¹ A rarawa vakalevu na yalo i tui Siria ena vuku ni ka oqo; a kacivi ira na nona tamata, ka kaya vei ira, Dou sega beka ni vakatakila vei au, se o cei vei keda sa totaki koya na tui Isireli?

¹² A sa kaya e dua vei ira na nona tamata, Sa sega na noqu turaga na tui; ia o Ilaisa ga na parofita ka tiko mai Isireli, sa dau cavuta vua na tui Isireli na veivosa o cavuta ena nomu rumu ni moce.

¹³ A sa kaya o koya, Dou la'ki raica mada se e vei na vanua e tiko kina, ka me'u talatala me la'ki vesu mai o koya. A tukuni vua, Raica, sa tiko mai Tocani o koya.

¹⁴ A talai ki kea e dua na mataivalu levu, kei na so na ose kei na qiqinivalu; era a lako ena bogi, ka buku na druadrua ni koro.

¹⁵ Ia ni sou ena mataka na nona dauveiqaravi na tamata ni Kalou, ka lako yani, raica, a buku tu na druadrua ena koro ena mataivalu ni Siria, na ose, kei na qiqinivalu. A sa kaya vei Ilaisa na nona dauveiqaravi, Isa noqu turaga! A cava me daru cakava?

¹⁶ A sa kaya o koya, Mo kakua ni rere, ni ra sa lewe vuqa cake era tiko vei kedaru, ka lewe lailai era tiko kei ira.

¹⁷ A masu o Ilaisa, ka kaya, Kemuni Jiova, mo ni dolava mada na matana, me rai rawa o koya. A dolava na matana o Jiova; a rai o koya, ka raica ni a oso na ulunivanua ena ose kei na qiqi bukawaqa, era a tiko vakavolivoliti Ilaisa.

¹⁸ Ia ni ra a lako sobu vua me ra vala kaya o ira na kai Siria, a vakamamasu vei Jiova o Ilaisa, ka kaya, “Au sa vakamamasu vei kemuni Jiova, mo ni cudruvi ira mada na tamata oqo me ra mataboko.” A sa rogoci na masu i Ilaisa, ka ra sa vakamatabokotaki.

¹⁹ A sa kaya vei ira o Ilaisa, “Sa sala tani oqo, ka sa koro tani oqo, mo ni muri au, ka'u na kauti kemuni vua na tamata o ni vakasaqara tiko.” A sa kauti ira ki Samaria.

²⁰ Ia ni ra yaco ki Samaria, a kaya o Ilaisa, “Kemuni Jiova, mo ni dolava na matadra na tamata oqo, me ra rai rawa.” A dolava na matadra o Jiova, era sa rai rawa, ka raica, era a tiko e loma i Samaria.

²¹ Ia ni a raici ira o tui Isireli, a sa kaya vei Ilaisa, “I tamaqu, me'u vakamatei ira li?”

²² A sa kaya o Ilaisa, “E sega. Mo kakua ni vakamatei ira. O na vesuki ira li mai na tamata o sa tauri ira vakavesu tu oqo ena nomu i seleiwau kei na nomu dakai? Mo solia ga vei ira eso na kakana kei na wai, me ra kana ka gunu, ka me ra lako yani vua na nodra turaga.”

²³ A cakava vei ira o koya e dua na magiti levu; era a kana ka gunu, a talai ira yani o koya, ka ra lako vua na nodra turaga. Era a sega ni lako tale mai me ra valuta na nodra vanua na Isireli o ira na kai Siria.

Buku na Druadrua e Samaria

²⁴ Ni oti na ka oqo, a vakasoqona vata na nona mataivalu o Penietati na tui Siria, lako cake, ka buku na druadrua ki Samaria.

²⁵ A ka levu na dausiga mai Samaria ena gauna a buku kina na druadrua, ka la'ki volitaki kina e dua na ulu ni asa ena 80 na tiki ni siliva, kei na 200 na karamu na deni ruve sa 5 na tiki ni siliva.

²⁶ Ia ni lako voli ena dela ni bainikoro o tui Isireli, a tagi vua e dua na yalewa, ka kaya, Mo ni veivuke, na noqu turaga na tui!

²⁷ A sauma na tui ka kaya, Kevaka sa sega ni vukei iko o Jiova, au na qai vukei iko rawa li vakacava? Mai na rara ni samu sila, se mai na vanua ni loba waini?

²⁸ A sa kaya vua na tui, A cava na nomu leqa? A sauma o koya, Sa kaya vei au na yalewa oqo, ‘Mo solia mada vei au na luvemu tagane me daru kania edaidai, ka me daru qai kania na luvequ tagane ni mataka.’

²⁹ Ia keirau a vakasaqara na luvequ, ka kania. Ena mataka cake, au a qai kaya vua, “Mo solia na luvemu tagane me daru kania.” Ia a sa vunia na luvena o koya.’

³⁰ Ni sa rogoca na tui na nona vosa na yalewa, a sa dresulaka na nona i sulu, ka ra raica na tamata era tiko volekata na bai ni sa daramaka voli e loma na i sulu taga na tui.

³¹ A sa kaya o koya, Me cakacaka vakakina vei au na Kalou, ka me vakaikuritaki talega, ke sa toka dei e tabana na ulu i Ilaisa na luve i Safati edaidai.

³² A tiko ena nona vale o Ilaisa, era a tiko kaya o ira na qase. A tala yani e dua na tamata o koya na tui; ia ni bera ni yaco vei koya na i talai, a kaya o Ilaisa vei ira na qase, Dou sega li ni raica ni sa talatala mai na luve ni daulaba o ya me tamusuka na uluqu? Ia ni dou sa raica, ni sa lako mai na i talai, mo dou sogota na katuba, ka sogoti koya matua ki tautuba. E sega li ni muri koya tiko mai na nona turaga?

³³ Ni ra a veivosaki tiko, raica, a lako sobu mai na i talai vei koya, ka kaya vua, Raica, sa vu mai vei Jiova na ca oqo; a cava li me'u waraki Jiova tale kina?