2 Tui 24 - Vakavakadewa Vou kei na iVola tale eso

¹ Ena gauna ni veiliutaki vakatui i Jo-akimi, a valuti Juta o Nepukanesa na tui Papiloni ka vakamalumalumutaki koya, ka yaco kina me qali vakaukauwa ki na veiliutaki i Nepukanesa o Jo-akimi me yabaki tolu; ia sa qai tavuki tale ka valuti Nepukanesa lesu ni oti o ya.

² A sa vakatala o Jiova na veimataivalu ni vanua o Papiloni, kei Siria, kei Moapi, kei Amoni, ka talai ira yani me ra vala kei ira na Juta ka vakarusai ira, me vaka ga na vosa i Jiova ena gusudra na nona parofita me baleta na veika ena vakayacora.

³ Sa yaco na ka oqo ena lewa i Jiova, me ra kau tani mai na matana o ira na Juta ena vuku ni valavala ca kece sa vakayacora o Manasa na tui,

⁴ ka vakabibi na nona vakamatei ira na tamata e sega ni dua na nodra cala. A sa sega ni rawa ni vosoti Manasa o Jiova ena vuku ni veika oqo.

⁵ Na vo ni cakacaka kece sa vakayacora o Jo-akimi sa volai ena Kedra i Vola Tukutuku na Tui Juta.

⁶ A sa mate o Jo-akimi, ka sa sosomitaki koya o Jo-akini na luvena me tui.

⁷ A sa sega tale vakadua ni biuta na nona vanua o tui Ijipita me la'ki valu baleta ni sa taura kece o tui Papiloni na kaukauwa ni veiliutaki e Ijipita raraba, ka me vakatekivu mai na uciwai na Uferetisi me yaco sara ki na i yalayala ni vanua ena vualiku.

O Jo-akini na Tui Juta

⁸ A sa yabaki 18 o Jo-akini ena gauna ka buli kina me tui Juta, ka veiliutaki e Jerusalemi me tolu na vula. Na yaca i tinana o Niusita, na luve i Elinecani na kai Jerusalemi.

⁹ A daucaka ca o Jo-akini ena mata i Jiova me vaka na ka kecega era a kitaka na nona qase.

¹⁰ E a donumaka na veiliutaki vakatui i Jo-akini na nona a kabati Jerusalemi mai vakaivalu na mataivalu i Nepukanesa na tui Papiloni, ka vesuka vakaukauwa na koro.

¹¹ Ena gauna ka vesuki vakaukauwa tiko kina o Jerusalemi, sa lako mai ki kea o Nepukanesa,

¹² ka sa soro vua o Jo-akini na tui Juta, kei tinana, kei iratou na luvena, kei ira na nona tamata, vata kei ira na i vakalesilesi ni vale vakatui. A tauri koya vakavesu o tui Papiloni ena i kawalu ni yabaki ni nona veiliutaki vakatui e Juta.

¹³ A sa kauta ki Papiloni na i yau talei kecega ni Valenisoro kei na valenitui. Me vaka na vosa i Jiova, a sa musumusuka o Nepukanesa na veiyaya koula kece sara ka a cakava o Solomoni na tui Isireli me vakayagataki ena Valenisoro.

¹⁴ A sa kauti ira yani vakabobula na tamata kece mai Jerusalemi o Nepukanesa, ka okati kina o ira na i vakalesilesi kece ni tui, kei ira na tamata ni valu, ka ra lewe 10,000 taucoko. E a kauti ira talega na tamata cakacaka vakamatai me vakataki ira na matai ni kaukamea; ka sa qai vo duadua ga o ira na lewenivanua dravudravua.

¹⁵ A sa kauti Jo-akini yani vakavesu ki Papiloni o Nepukanesa, ka vakakina na tinana, o iratou na watina, o ira na nona vakailesilesi, kei ira na nona tamata nuitaki.

¹⁶ E a kauti ira tani na tamata nuitaki ka qaqa kece sara ni Juta ki Papiloni o Nepukanesa, ka ra lewe 7,000 taucoko, ka lewe 1,000 na tamata era kila na cakacaka me vakataki ira na matai ni kaukamea, ka tu vakavinaka na i tuvaki ni yagodra ena cakacaka vakasotia.

¹⁷ Sa qai lesia o tui Papiloni me tui o Matanaia na tama i Jo-akimi lailai me kena i sosomi; ka veisautaka na yacana me o Setekaia.

O Setekaia na Tui Juta

¹⁸ E a yabaki 21 o Setekaia ena gauna ka buli kina me tui, ka veiliutaki mai Jerusalemi me tinikadua na yabaki. Na tinana o Emutali, na luve i Jeremaia mai na koro levu o Lipina.

¹⁹ A sa daucaka ca o Setekaia ena mata i Jiova, me vaka na ka kecega ka cakava o Jo-akimi na tui.

²⁰ Sa ka levu na cudru i Jiova vei Jerusalemi kei Juta, ka sa vakavuna me biuti ira tani mai matana.