2 Tui 23 - Vakavakadewa Vou kei na iVola tale eso

Tarova o Josaia na Qaravi Kalou Tani

¹ A sa kacivi ira vata na i liuliu kece e Juta kei Jerusalemi o Josaia na tui,

² ka ra sa lako vata yani ki na Valenisoro kei ira na bete, kei ira na parofita, kei ira kecega na tamata era vutuniyau se dravudravua. Sa qai wilika na tui ena domoilevu e matadra na vosa kece ni i vola ni veiyalayalati ka kunei ena Valenisoro.

³ E a tucake tu ena tutu vakaturaga na tui ka cakava na nona veiyalayalati vei Jiova me na talairawarawa vua, ka me maroroya na nona i vunau kei na i vakaro ena lomana taucoko kei na yalona taucoko, ka me vakayacora sara na vosa kece ni veiyalayalati sa volai ena i vola oqo. Era sa qai yalataka me ra maroroya na veiyalayalati oqo o ira kece na tamata.

⁴ A sa vakarota o Josaia na tui vei Ilikaia na bete levu kei ira na bete lalai, kei ira na dauyadrava na Valenisoro me ra kauta tani mai na Valenisoro na i yaya kecega sa qaravi kina o Peali, na kalou yalewa o Asera, kei na kalokalo ni lomalagi. A sa vakama na tui na i yaya ni sokalou kece oqo ena taudaku ni koro ka volekata na buca mai Kitironi, ka qai kau yani ki Peceli na kena dravusa.

⁵ A vakasivoi ira na bete vakatevoro na tui, kei ira ka ra lesia o ira na tui Juta me ra vakama na ka boi vinaka ena i cabocabonisoro ni kalou tani ena veikoro e Juta kei na veivanua e voliti Jerusalemi. E okati talega kina o ira era vakama na ka boi vinaka vei Peali, ki na matanisiga, na vula, na vuravura tale eso, kei na kalokalo ni lomalagi.

⁶ A sa kauta tani o koya na i yaloyalo ni kalou yalewa o Asera, ka kauta ki na taudaku ni koro e koto volekata na bucabuca mai Kitironi, ka vakama, ka tukia matailalai na kena dravusa, ka kaburaka yani ena nodra i bulubulu na lewenivanua.

⁷ A sa basuraka sobu o Josaia na veitikotiko ena loma ni Valenisoro ka ra sa la'ki tikora tiko na bete ni burekalou. (O ya na vanua era sa dautalia kina na yalewa na i sulu ni sokalou vua na kalouyalewa ni veikau.)

⁸ A kauti ira tani kece na bete mai na veikoro e Juta o koya ka basuraka na veitikina cecere era a vakama kina na ka boi vinaka o ira na bete me vakatekivu mai Kipa ka yaco yani ki Perisepa. A sa basuraka talega na i cabocabonisoro ki na kalou tani ena i curucuru ki na Matamata i Josua, na kovana ni koro ena yasana i mawi ni matamata ni koro.

⁹ O ira na bete oqo era sa vakatabui me ra qarava na cakacaka vakabete ena Valenisoro, ia era rawa ga ni kania na madrai sa sega ni vakatubu sa vakarautaki ena vukudra na bete.

¹⁰ A sa vakacacani Tofeci talega o Josaia na tui, ka oqo na vanua ni vakacaboisoro ki na kalou tani ena Buca kei Inomi, me kakua kina ni dua tale na tamata me vakacabora na luvena tagane se na luvena yalewa me i soro kama vua na kalou o Moloke.

¹¹ A kauta tani na ose era a vakacabora ki na matanisiga o ira na tui Juta mai na i curucuru ki na Valenisoro, ka voleka ki na vale i Necanimeleki na enuki, ka tu ena i bili ni koro; a vakama ena bukawaqa na qiqinivalu eso a vakacabori ki na matanisiga.

¹² A basuraka sobu na tui na i cabocabonisoro sa tu mai na i taba vale e cake i Easi era a cakava na tui Juta; a talaraka sobu na i cabocabonisoro a cakava o Manasa ena rara vakabai ruarua ni Valenisoro, ka biuta na kedra kuvu ki na Buca o Kitironi.

¹³ Ia a vaqeleqelewataka na tui na veitikina cecere a tu ena tokalau kei Jerusalemi, vaka ki na ceva ni ulunivanua ni veivakacalai ka a cakava o Solomoni na tui Isireli vei Aseteroci, na nodra ka vakasisila na kai Saitoni, vei Kimosi talega, na nodra ka vakasisila na Moapi, kei Moloke na nodra ka vakasisila na luve i Amoni.

¹⁴ A sa vorolaka vakamatailalai o koya na veiduru vatu, ka musuka laivi na i vakatakarakara ni kalou yalewa o Asera, ka vakatawana na vanua era tu kina ena sui ni tamata.

¹⁵ Ia na i cabocabonisoro talega mai Peceli, kei na tikina cecere a cakava o Jeropoama, na luve i Nipati, o koya ka vakaivalavalacataki ira na Isireli, io, a basuraka sobu o koya na i cabocabonisoro o ya kei na tikina cecere, vakama, vorolaka vakamatailalai na kena vatu me kuvu ni qele; ka vakamai Asera na kalou yalewa ni veikau.

¹⁶ A vuki o Josaia, ka raica na veibulubulu ka ra tiko e delana mai kea; a talatala o koya, ka la'ki kau mai na sui mai na veibulubulu, ka vakama ena dela ni cabocabonisoro, ka vakacacana me vaka na vosa i Jiova sa tukuna oti na parofita ni na yaco ena gauna e muri.

¹⁷ A sa taroga o koya, “A i bulubulu cava oqori ka'u sa raica?” Era sa kaya vua na lewenivanua o Peceli, “Na i bulubulu ni tamata ni Kalou, o koya ka a lako mai Juta, ka mai tukuna rawa na veika sa yaco oqo ena i cabocabonisoro e Peceli.”

¹⁸ Sa qai tukuna o Josaia, “Dou laiva ga; me kakua ni dua na tamata me yavalata na nona sui.” Era a sega ni yavalata na nona sui, ka vakakina na nona sui na parofita ka a lako mai Samaria.

¹⁹ A biuta tani talega o Josaia na veivale kece mai na veitikina cecere ena veikoro mai Samaria, era a cakava na tui Isireli me vakacudrui kina o Jiova, ka cakava kina na veika me vaka na ka a cakava o koya mai Peceli.

²⁰ A vakamatei ira kecega na bete ni veitikina cecere, ka ra a tiko mai kea ena dela ni cabocabonisoro, ka vakama e deladra na sui ni tamata. A lesu tale ki Jerusalemi o Josaia na tui.

Solevutaka na Lakosivia o Josaia

²¹ A sa vakaroti ira tale na tamata kecega o Josaia me ra solevutaka na Lakosivia, me vakarokorokotaki kina o Jiova na nodra Kalou, me vaka sa volai ena i vola ni veiyalayalati.

²² E a se sega ni bau vakayacori tale e dua na Solevu ni Lakosivia vakaoqo mai vei ira na tui Isireli se tui Juta me vakatekivu mai na nodra gauna ni veiliutaki na dauveilewai.

²³ Ia oqo, ena i katinikawalu ni yabaki ni veiliutaki vakatui i Josaia, sa qai ia tale na kena solevutaki na Lakosivia.

Na Veiveisau Tale Eso e Vakayacora o Josaia

²⁴ Sa qai biuta tani o Josaia o ira na daurairai, na daucurumi, na kalou matakau eso, kei na ka vakasisila kecega a kune ena vanua i Juta kei Jerusalemi, me rawa ni vakataudeitaka kina na vosa ni vunau sa volai ena i vola a kunea o Ilikaia na bete ena Valenisoro.

²⁵ A sa sega ni dua na tui ka bula e liu me tautauvata kei Josaia, me golevi Jiova ena lomana taucoko, kei na yalona taucoko, kei na nona kaukauwa kece, ni sa talairawarawa ga ki na Lawa i Mosese kece sara; a sega talega ni qai tubu cake e muri e dua me tautauvata kaya.

²⁶ Ia a sega ni vuki tani o Jiova mai na katakata ni nona cudru levu ka waqawaqa kina vei ira na Juta ena vuku ni veivakacudrui kecega sa vakacudrui koya kina o Manasa.

²⁷ A sa kaya, me vaka ka'u a kauti ira tani na Isireli, au na biuta na koro oqo o Jerusalemi, ka'u a digitaka kei na vale ka'u a kaya kina, ena tiko e kea na yacaqu.”

Na i Tinitini ni Veiliutaki Vakatui nei Josaia

²⁸ Ia na vo ni cakacaka kece sa vakayacora o Josaia na tui sa volai ena Kedra i Vola Tukutuku na Tui Juta.

²⁹ Ena gauna e se tui tiko kina o Josaia, sa liutaka e dua na mataivalu o Niko na tui Ijipita me la'ki vukei tui Asiria ena uciwai na Uferetisi. E a tovolea o Josaia na tui me tarova na mataivalu oqo ni Ijipita mai Mekito ka a mani vakamatei koya mai kea o Niko.

³⁰ Era a vakavodoka na yago i Josaia ena qiqinivalu na nona tamata, ka kauti koya lesu ki Jerusalemi, ka buluta ena nodra i bulubulu na tui. Era a digitaki Jioasi na luve i Josaia o ira na lewenivanua, ka ra lumuti koya, ka buli koya me tui, me i sosomi kei tamana.

O Jioasi na Tui Juta

³¹ A sa yabaki 23 o Jioasi ena gauna sa buli kina me tui Juta, ka veiliutaki mai Jerusalemi me tolu na vula. Na yaca i tinana o Emutali ka luve i Jeremaia mai Lipina.

³² A sa muria na nodra i valavala na nona qase ena nona daucaka ca ena mata i Jiova.

³³ E a cava koso na nona veiliutaki vakatui ena gauna ka tauri koya kina vakavesu o Niko na tui Ijipita mai Ripila, ena vanua o Emaci, ka lavaka vei ira na Juta me ra sauma e 3,400 na kilokaramu na siliva kei na 34 na kilokaramu na koula ena vukuna.

³⁴ E a vakavuna o Niko na tui Ijipita me buli vou o Elaiakimi na luve i Josaia me tui Juta, me i sosomi kei Josaia na tamana, ka veisautaka na yacana me o Jo-akimi. Ia sa kauti Jioasi tani ki Ijipita o Niko, ka sa la'ki mate mai kina.

O Jo-akimi na Tui Juta

³⁵ A sa kumuna o Jo-akimi e dua na i vakacavacava mai vei ira na lewenivanua, ka vakatautaki oqo ki na veika era dui rawata, ka me na saumi kina na veika sa lavaka o Niko na tui Ijipita.

³⁶ A sa yabaki 25 o Jo-akimi ena gauna ka buli kina me tui, ka veiliutaki mai Jerusalemi me tinikadua na yabaki. Na yaca i tinana o Siputa, na luve i Petaia na kai Ruma.

³⁷ A sa daucaka ca o koya ena mata i Jiova, me vaka na ka kecega era a cakava na nona qase.