2 Tui 22 - Vakavakadewa Vou kei na iVola tale eso

O Josaia na Tui Juta

¹ A sa yabaki walu o Josaia ena gauna a buli kina me tui Juta, ka sa veiliutaki mai Jerusalemi me 31 na yabaki. Na tinana o Jetita, na luve i Ataia mai na koro o Posikaci.

² A sa caka dodonu o Josua ena mata i Jiova, ka talairawarawa ki na i valavala kecega i Tevita na nona qase, ka muria vinaka na lawa kece ni Kalou.

Sa Kune na i Vola ni Lawa

³ Ia ena i ka 18 ni yabaki ni veiliutaki vakatui i Josaia, a sa qai tala o koya na vunivola ni lawa o Safani, na luve i Asalaia ka makubui Mesulame, me kauta ki na Valenisoro na i vakaro oqo:

⁴ “Mo lako cake vei Ilikaia na Bete Levu ka taura mai vua na i tukutuku vakailavo ni veika era sa soqona rawa na bete ena mata ni Valenisoro mai vei ira na tamata.

⁵ Mo kaya vua me solia na i lavo vei ira era veiliutaki tiko ena kena qaravi na cakacaka ni kena vakavinakataki na Valenisoro. Me ra veisaumitaki ira

⁶ na matai ni vale, o ira na dautara vale, na matai ni vatu, ka me ra volia kina na kau kei na vatu sa ta me ra vakavinakataka kina na vale.

⁷ Sa sega soti ni yaga me qai vakaivolataki na i lavo sa soli vei ira na veiliutaki baleta ni ra sa tamata daucakacaka vakadodonu.”

⁸ A sa kaya o Ilikaia na bete levu vei Safani na vunivola, Au sa kunea na i vola ni vunau ena vale i Jiova. A solia na i vola vei Safani o Ilikaia, a wilika o koya.

⁹ A sa lako vua na tui o Safani na vunivola, ka kaya vua, “Era sa kauta na nomuni dauveiqaravi na i lavo sa tiko ena Valenisoro ka ra sa solia sara vei ira sa liutaka tiko na cakacaka ni kena vakavinakataki tale na Vale i Jiova.”

¹⁰ A sa tukuna vua na tui o Safani na vunivola, “Sa solia vei au e dua na i vola o Ilikaia na bete.” A sa qai wilika o Safani vua na tui.

¹¹ Ia ni rogoca na tui na vosa ni vola ni vunau, a sa dresulaka na nona i sulu, ni sa cokai na yalona.

¹² A sa qai vakaroti Ilikaia na bete na tui, kei Eaikami na luve i Safani, kei Akipori na luve i Mikaia, kei Safani na vunivola, vata kei Asaia, e dua na tamata ka dau qarava na tui, ka kaya,

¹³ “Dou lako ka tarogi Jiova ena vukuqu, kei na vukudra na tamata, kei na vukudra kece talega na Juta me baleta na vosa ni vola ni vunau sa qai kune oqo. Sa cudruvi keda o Jiova baleta ni ra sa sega ni vakarorogo ki na vosa ni vola oqo o ira na noda qase.”

¹⁴ A ratou sa qai lako o Ilikaia na bete, o Eaikimi, o Akipori, o Safani, kei Asaia vei Ulita na parofita yalewa ka vakaitikotiko ena tikina vou e Jerusalemi. (Na wati Ulita o Salumi, na luve i Tikiva ka makubui Ariasi, o koya sa dau maroroya na i sulu ni vale ni Kalou.) E ratou a vakamacalataka vua na ka sa yaco,

¹⁵ ka sa tukuna vei iratou o Ulita na parofita me ratou lesu vua na tui ka solia vua

¹⁶ na i tukutuku oqo mai vei Jiova: “Au sa na vakarau totogitaki Jerusalemi kei ira na kena lewenivanua, me vaka sa volai ena vola sa wilika oti o tui Juta.

¹⁷ Era sa biuti au ka vakacaboisoro ki na kalou tani eso, ka ra sa vakacudrui au ena cakacaka kecega ni ligadra. Sa waqa kina na noqu cudru taucoko ki na vanua oqo, ka na sega ni bokoci rawa.

¹⁸ Ia mo dou kaya vakaoqo vei tui Juta, o koya ka a talai kemudou mai me tarogi Jiova, Sa kaya vakaoqo o Jiova na nodra Kalou na Isireli: O a vakarorogo ki na veika sa volai ena i vola,

¹⁹ ka veivutuni na lomamu, ka vakamalumalumutaki iko ena mata i Jiova, ka dresulaka na nomu i sulu, ka tagi ni o sa rogoca na noqu vosa ni'u na cudruvi Jerusalemi kei ira na tamata era tiko kina. Io au na vakavuna me rairai ca ka vakadomobula na vanua o ya, ka me dua na vanua sa rukaki mai vei ira na tamata. Ia au sa rogoca na nomu masu,

²⁰ kei na totogi me na tau vei Jerusalemi ena sega ni yacovi iko me yacova na nomu mate. Au na laivi iko mo mate ena vakacegu.” E ratou a qai la'ki tukutuku lesu tale ki vua na tui.