2 Tui 2 - Vakavakadewa Vou kei na iVola tale eso

Kau Cake ki Lomalagi o Ilaijia

¹ E rau a lesu tiko mai Kilikali o Ilaijia kei Ilaisa ni donuya na gauna e vakarau kauti Ilaijia cake kina ki lomalagi o Jiova ena dua na covulaca.

² A sa kaya vei Ilaisa o Ilaijia, “Mo tei toka mada eke, ni sa talai au ki Peceli o Jiova.” A qai kaya vua o Ilaisa, “Me vaka sa bula o Jiova, ka o sa bula o iko, au na sega sara ni laivi iko.” E rau a qai lako sobu vata ki Peceli.

³ Era a lako mai vei Ilaisa eso na i lawalawa parofita ka ra tiko mai Peceli, ka kaya vua, “O sa kila tiko beka ni na kauti koya tani na nomu turaga mai vei iko edaidai o Jiova?” A sa kaya o Ilaisa, “Io, au sa kila; dou tiko lo ga.”

⁴ A sa kaya vua o Ilaijia, “I Ilaisa, au kerea mo tiko mada ga e ke; sa talai au o Jiova me'u lako ki Jeriko.” Ia sa tukuna lesu o Ilaisa, “Me vaka ni sa bula o Jiova ka o sa bula talega o iko, au na sega sara ni laivi iko.” E rau a qai lako vata yani ki Jeriko.

⁵ Era a toro volekati Ilaisa yani o ira na i lawalawa parofita ka ra a tiko mai Jeriko, ka ra kaya vua, “O sa kila beka ni na kauta tani na nomu turaga edaidai o Jiova?” A sauma o koya ka kaya, “Io, au sa kila; dou tiko lo ga.”

⁶ A sa kaya vua o Ilaijia, “Au kerei iko mo tiko mada ga e ke, ni sa talai au o Jiova ki na Joritani.” A qai kaya vua o koya, “Me vaka sa bula o Jiova, ka o sa bula o iko, au na sega ni laivi iko.” E rau a lako ruarua yani.

⁷ Era a vakamuri rau talega ki na Joritani e lewe limasagavulu na parofita mai na i lawalawa parofita. E rau sa la'ki tu vakadua ena yasa ni uciwai o Ilaijia kei Ilaisa, ka ra tucake vakayawa tu mai na parofita.

⁸ A taura na nona i tutuvi o Ilaijia, ka lobika, ka samuta kina na wai. A sa tawase rua kina na wai, ki na i matau kei na mawi, ka rau sa taubale takoso ki tai kadua ena qele mamaca.

⁹ Ia ni rau yaco yani ki na tai kadua, a kaya vei Ilaisa o Ilaijia, “Mo tukuna mada mai vei au se na cava me'u cakava vei iko ni se bera ni'u kau tani mai vei iko.” A sa kaya o Ilaisa, “Au vakamasuti iko mo vakaruataka vei au na i votavota ni yalo sa tu vei iko.”

¹⁰ A sa kaya o Ilaijia, “Sa ka dredre na ka o sa kerea; ia kevaka o na raici au tiko ni'u sa kau tani mai vei iko, ena soli me nomu i votavota; ia kevaka o sega ni raici au, ena sega ni votai vei iko.”

¹¹ E rau a veitalanoa tikoga ni rau lako voli; ia, sa qai vakasauri na kena basika mai ena kedrau maliwa na qiqi bukawaqa sa dreti mai na ose bukawaqa, ka sa kau bulabula cake o Ilaijia ena dua na covulaca.

¹² Ni raica o Ilaisa, a qai qolouvaka, ka kaya, “I tamaqu! I tamaqu! na nodra qiqinivalu na Isireli kei na nodra tamata dauvodo ose!” A sega ni qai raici Ilaijia tale. Ni sa rarawa o koya, sa qai taura na nona i sulu ka dresulaka me rua na tikina.

Sa Sosomitaki Ilaijia o Ilaisa

¹³ A taura cake na i tutuvi i Ilaijia ka a lutu tani mai vua, ka lesu tale ka la'ki tu ena bati ni Joritani.

¹⁴ A taura o Ilaisa na i tutuvi i Ilaijia ka a lutu tani mai vua, ka samuta kina na wai, ka kaya, “Sa evei o Jiova, na Kalou i Ilaijia?” Ia ni samuta oti na wai o ya, a tawase rua, ka taubale takoso yani ki tai kadua o Ilaisa.

¹⁵ Ia ni ra raica koya mai vakayawa o ira na i lawalawa parofita ka ra a tiko mai Jeriko, era sa kaya, “Na kaukauwa i Ilaijia e sa tiko oqo vei Ilaisa.” Era a lako mai vua ka tavaki koya, ka cuva sobu ki na qele e matana.

¹⁶ Era a kaya vua, “Raica, era sa tiko kei keitou oqo e lewe limasagavulu na nomu tamata kaukauwa; keitou kerea me ra lako mada ka la'ki vakasaqarai koya na nomu turaga, de kauti koya cake na Yalo i Jiova, ka qai la'ki biuti koya ki na dua na ulunivanua, se ki na dua na buca.” A sa kaya o Ilaisa, “Ni kakua ni lako.”

¹⁷ Ia ni ra cikevi koya tikoga, a sa madua kina o koya ka tukuna kina me ra lako ga. Era a vakasaqaqara yani na lewe limasagavulu oqo me siga tolu, ka sega ni kunei koya.

¹⁸ Ia ni ra sa lesu tale mai vei Ilaisa, ni a tiko ga mai Jeriko o koya, a qai kaya vei ira o koya, “Au a sega li ni kaya vei kemudou mo dou kakua ni lako?”

Na Cakacaka Mana i Ilaisa

¹⁹ Era a kaya vei Ilaisa na lewe ni koro o ya, “Raica mada, sa daumaka na i tutu ni veika ena koro oqo, me vaka sa raica tiko na noqu turaga; ia sa ca ga na wai, ka sega ni vuavuai vinaka na qele.”

²⁰ A sa kaya o koya, “Ni kauta mai vei au e dua na bilo vou, ka biuta kina na masima.” Era a kauta vua.

²¹ A lako yani o koya ki na i vurevure ni wai, ka biuta kina na masima, ka kaya, “Sa vosa vakaoqo o Jiova: ‘Au sa vagunuvinakataka na wai oqo; me vakatekivu mai na gauna oqo, ena sega tale ni vu mai kina na mate, se na vakalutu dole.’ ”

²² A vinaka na wai me vakatekivu mai na gauna o ya me yacova mai na gauna oqo, me vaka na vosa a cavuta o Ilaisa.

²³ A lako cake mai kea o koya ki Peceli; ia ni lako cake tiko ena sala, era a curu mai na koro eso na gonetagane lalai ka ra vakalialiai koya. Era a kailavaka vua, “Mo lako tani, qase ulucou!”

²⁴ A sa vuki mai o Ilaisa ka vakaraici ira matua, ka vosa cudruvi ira ena yaca i Jiova. E rau a qai basika mai veikau e rua na bea yalewa, ka basuraki ira vakamatailalai e lewe 42 na gonetagane lalai.

²⁵ A lako yani ki na ulunivanua o Kameli o Ilaisa, ka qai lesu tale ki Samaria.