2 Tui 19 - Vakavakadewa Vou kei na iVola tale eso

Kere Vakasala o Esekaia vei Aisea

¹ Ni sa rogoca o Esekaia na tui na i tukutuku, a sa dresulaka na nona i sulu, a qai vakasulumi koya ena i sulu taga, ka la'ki curu ki na Valenisoro i Jiova.

² A sa talai Elaiakimi, na i vakalesilesi liu ni valenitui, kei Sepina na vunivola, kei ira na nodra qase na bete ka ra vakaisulu taga kece tu me ra lako vua na parofita o Aisea na luve i Emosi.

³ Oqo na i tukutuku sa kaya vei ratou me vakadewataki vei Aisea, “Oqo na siga ni rarawa; ni keimami sa vunauci ka vakamadualaki. Keimami sa vaka na yalewa e vakarau vakasucu gone, ia sa sega vua na kaukauwa me ia rawa kina na vakasucu.

⁴ O tui Asiria sa tala mai na nona turaganivalu me vosavakacacataka na Kalou. Me rogoca mada o Jiova na nomu Kalou na vosa kece oqo ka totogitaki ira era tukuna mai. O koya oqo mo qai cavuta na masu ena vukudra na vo-ni-bula sa vo tiko.”

⁵ Ni ratou yaco yani vei Aisea na parofita na mata talai i Esekaia na tui,

⁶ a sa tukutuku lesu mai o Aisea ka kaya, “Sa kaya vakaoqo vei kemudou o Jiova mo dou kakua ni vakatara mo yacovi kemudou na rere ena vuku ni nodra vosa na tamata nei tui Asiria ni na sega ni vakabulai kemudou o koya.

⁷ O Jiova ena vakavuna me rogoca o tui Asiria e dua na i tukutuku veivukayaki ka na vakalesui koya lesu tale kina ki na nona vanua; ka na qai vakamatei koya mai kea o Jiova.”

E Dua Tale na Vosa ni Veivakarerei nei Asiria

⁸ A sa rogoca na turaganivalu i tui Asiria ni sa lako tani mai Lakisi o tui Asiria, ka sa vakacibi i valu tiko ena koro levu o Lipina; a sa mani gole yani kina ki kea me tukutuku vua.

⁹ A sa yaco yani vei ira na kai Asiria na i tukutuku ni o ira na mataivalu ni Ijipita, ka liutaka o Tiraka na tui Eciopia, sa lako tiko mai me valuti ira. Ni rogoca oqo o tui Asiria, sa qai vakauta e dua na nona i vola vei Esekaia na tui Juta

¹⁰ me tukuni vua oqo, “Me kakua ni vakaisini iko na nomu Kalou, o koya o sa vakararavi kina, ena nona yalataka ni na sega ni soli o Jerusalemi ki na liga i tui Asiria.

¹¹ O sa rogoca oti na veika sa dau cakava na tui Asiria ki na veivanua kecega e vinakata me vakarusa. O nanuma li ni o rawa ni dro bula?

¹² Era a vakabula vanua li na veikalou ni veivanua oqori ni ra sa vakarusai mai vei ira na noqu qase? Oqori na vanua me vakataki Kosani, Arani, Resefi, kei ira na luve i Iteni era tiko mai Tilasari.

¹³ Sa evei o ira na tui ni veikoro lelevu o Emaci, o Apati, o Sivafeimi, o Iena, kei Iwa?”

¹⁴ A taura na i vola o Esekaia mai ligadratou na tamata talai, ka wilika. Sa qai lako cake ki na Valenisoro ka tevuka na i vola ena mata i Jiova.

¹⁵ A sa masu o Esekaia ena mata i Jiova, ka kaya, “Kemuni Jiova, na nodra Kalou na Isireli, o kemuni sa tiko vakaturaga ena kedrau maliwa na jerupi, oi kemuni vakai kemuni ga sa Kalou ni veimatanitu kecega e vuravura. Oi kemuni ga sa bulia na lomalagi kei na vuravura.

¹⁶ Ia oqo, i Jiova, mo ni raica mada na veika sa yaco tiko oqo vei keimami. Ni rogoca mada na veivosa kece sa tukuna voli o Senakaripi me vosavakacacataki kemuni kina na Kalou bula.

¹⁷ Keimami sa kila kece, i Jiova, ni sa vakarusa oti e vuqa na veimatanitu o tui Asiria, ka vakavuna me rusa na nodra vanua,

¹⁸ ka vakama na nodra kalou — ni ra sa sega dina ga ni kalou baleta ni ra sai vakatakarakara ga ni kalou sa bulia na liga ni tamata mai na kau kei na vatu.

¹⁹ Ia oqo, kemuni Jiova na neimami Kalou, mo ni vakabulai keimami mai na ligadra na kai Asiria, me ra na kila kina na veimatanitu kecega e vuravura ni sai kemuni o Jiova, na Kalou sa duabau ga.”

Na i Tukutuku i Aisea Vua na Tui

²⁰ A sa qai vakauta lesu o Aisea na i tukutuku vei Esekaia na tui me baleta na i sau ni nona masu,

²¹ ni sa kaya vakaoqo o Jiova, “I Senakaripi, na koro levu o Jerusalemi sa dredrevaki iko ka beci iko.

²² O cei o nanuma ni o vakalialia tiko ka vosavakacacataka tiko? Sa dua na ka na nomu veibeci vei au, na Kalou yalosavasava i Isireli.

²³ O sa talai ira mai na nomu tamata me ra mai dokadokataka vei au na nomu qaqa vei ira na veiulunivanua cecere e Lepanoni ni sa levu na nomu qiqinivalu. O sa dokadokataka na nomu na taya sobu na kena veisitari babalavu kei na kena veidamanu talei, ka o ni sa yacova sara na loma ni veikau loa.

²⁴ O sa dokadokataka na nomu kelia na nodra veimataniwai na veivanua tani ka gunu kina; ka ra vakamacara na uciwai o Naile mai Ijipita na nomuni sotia ni ra butuka e qeteqete ni yavadra.

²⁵ “O sega beka ni se rogoca ni'u a sa tuvana makawa sara na veika oqo mai liu? Ia oqo au sa tekivu vakayacora. Au a solia vei iko na kaukauwa mo vukica na veikoro vakabai me ra i binibini vatu ni ra sa vakarusai.

²⁶ Sa kau laivi na nodra kaukauwa na tamata era bula e kea; ka ra sa taqaya ka kidacala. Era sa vaka na i rairai ni co ena i teitei se na kau e sa qai cadra cake me bula, ka sa vakarusai ena cagi katakata mai na tokalau.

²⁷ “Ia au sa kila na veika kece me baleti iko, se na cava o cakava tiko kei na vanua o lako kina. Au sa kila na levu ni nomu cudruvi au.

²⁸ Au sa ciqoma na i tukutuku ni nomu cudru kei na nomu dokadoka, ia oqo au na vakacuruma ki ucumu e dua na i qila kei na dua na i varaile ni ose ki gusumu, ka kauti iko lesu ki na sala vata ga o a muria mai.”

²⁹ Sa qai kaya vei Esekaia na tui o Aisea, “Sai koya oqo na i vakatakilakila ni ka ena yaco. Ena yabaki oqo kei na yabaki mai oqo, dou na kania wale ga kina na sore ni sila ni veikau sa tubu vakaveitalia. Ia ena yabaki ka tarava yani, o ni sa na qai rawa ni tea na kemuni sila ka tamusuka, ka tea talega na nomuni veiteitei vaini ka kana mai na vuana.

³⁰ O ira na vo-ni-bula e Juta ena laveti cake na nodra bula me vaka na kau sa vakateteva vakatitobu na wakana ki na qele ka vuavuai vinaka.

³¹ Era na dro bula rawa na vo-ni-bula mai Jerusalemi kei na ulunivanua o Saioni, baleta ni sa vakadeitaka o Jiova me vakayacori na veika oqo.

³² “Sai koya oqo na ka sa tukuna o Jiova me baleti tui Asiria: ‘Ena sega ni curuma mai na koro oqo se vanataka kina e dua na nona gasau ni dakaititi. Ena sega ni dua na sotia e vakaisasabai me na toro volekata mai na koro oqo, ka na sega ni viri wavokita na suvasuva ni buku druadrua.

³³ Ena muria lesu tale na sala vata ga ka muria mai o koya, ka sega ni curu mai ki loma ni koro. Au sa tukuna na veika oqo, oi au o Jiova.

³⁴ Au na totaka na maroroi ni koro oqo, ka taqomaka ena vukuqu kei na vuku i Tevita talega na noqu tamata ka'u a vosa bubului vua.’ ”

Na Druka kei na Mate i Senakaripi

³⁵ Ia ena bogi o ya, sa lako yani na agilosi i Jiova ki na nodra keba na mataivalu ni Asiria, ka vakamatea e lewe 185,000 na sotia. Ni kida cake na mataka ka tarava, era sa davo matemate kece tu.

³⁶ Ena ka oqo, sa vakasuka kina o Senakaripi na tui Asiria ka lesu tale ki Ninive.

³⁷ Ena dua na siga, ka sokalou tiko kina o Senakaripi ena burekalou i Nisiroki na nona kalou, e rau a qai vakamatei koya ena i seleiwau na luvena o Etirameleki kei Saresa, ka rau dro ki na vanua o Ararata. A sa sosomitaki koya o Esaatoni na luvena ena i tutu vakatui.