2 Tui 16 - Vakavakadewa Vou kei na iVola tale eso

O Easi na Tui Juta

¹ Ena i ka 17 ni yabaki ni veiliutaki vakatui i Peka na luve i Rimalaia e Isireli, a sa yaco me tui Juta o Easi na luve i Jocame.

² A sa yabaki 20 o Easi ni sa buli me tui ka vakataulewa voli mai Jerusalemi ena loma ni 16 na yabaki. A sa sega ni muria o koya na i valavala vinaka ni tui o Tevita na nona qase; ia sa cakava ga na veika sa sega ni dodonu vei Jiova na nona Kalou

³ ka muria ga na nodra i valavala na tui Isireli. E a vakacabora na luvena tagane me i soro kama ena bukawaqa, ni sa vakamuria na nodra i vakarau vakasisila na veimatanitu sa vakasavi ira tani o Jiova e matadra na Isireli.

⁴ A sa vakacaboisoro o Easi ka vakacabora talega na ka boi vinaka ena veitikina cecere, kei na veidelana, kei na veiruku ni kau drokadroka kecega.

⁵ A sa valuti ka buku na druadrua kei Jerusalemi mai vei rau o Risini na tui Siria kei na tui Isireli o Peka na luve i Rimalaia, ia sa sega ga ni vakamalumalumutaki rawa o Easi.

⁶ Ena gauna vata o ya, a sa taura lesu na tui Itomi na veiliutaki ni koro levu o Elaci, ka vakasavi ira tani na Juta mai kea. Era sa qai lako yani ki Elaci na kai Itomi me ra tiko kina, ka yacova na siga oqo.

⁷ A sa tala o Easi eso na tamata vei Tikilaci Piliseri na tui Asiria me ra kauta na i tukutuku oqo: “Oi au na nomu tamata, ka luvemu talega. Mo lako cake mai mo vakabulai au mai na ligadra na tui Siria kei tui Isireli, ka rau valuti au tiko.”

⁸ A sa taura o Easi na siliva kei na koula mai na valeniyau ni Valenisoro kei na valenitui ka vakauta me ka ni loloma vua na tui Asiria.

⁹ A rogoci koya o tui Asiria, ka lako cake me valuti Tamasiko, a sa vesuka, ka vakamatei Resini, ka kauti ira vakabobula na lewena ki Kiri.

¹⁰ Ni sa lako yani ki Tamasiko o Easi na tui me tavaki Tikilaci Piliseri na tui Asiria, a sa raica o koya na i cabocabonisoro mai Tamasiko ka sa vakauta lesu vei Uraia na bete e dua na kena i vakatakarakara, ka okati kina na kena droini kei na i vakamacala matailalai taucoko.

¹¹ A sa tara o Uraia na bete e dua na i cabocabonisoro me vaka na kena i vakamacala, ka sa vakaotia ni bera ni lesu mai o Easi.

¹² Ni sa lesu mai Tamasiko, a sa raica o Easi ni sa tara oti na i cabocabonisoro,

¹³ ka sa vakama kina na nona i soro kama, kei na nona i madrali laukana; a sa livia kina na nona i madrali liviraki, ka kuretaka na dra ni nona i soro ni veivinakati ena i cabocabonisoro.

¹⁴ Na i cabocabonisoro parasa sa cabori vei Jiova sa toka ena maliwa ni i cabocabonisoro vou kei na Valenisoro, ka mani tosoya o Easi na i cabocabonisoro oqo ki na yasana ena vualiku ni nona cabocabonisoro vou.

¹⁵ A sa qai vakaroti Uraia na bete ka kaya, “Mo vakama ena i cabocabonisoro levu oqo na i soro kama ni mataka, na madrali laukana ni yakavi, na nona i soro kama na tui, na nona i madrali laukana, na nodra i madrali liviraki, ka kuretaka ki delana na dra kecega ni soro kama, kei na dra ni soro kece; ia mo biuta tikoga na cabocabonisoro parasa me'u dau vakatataro kina.”

¹⁶ A sa cakava o Uraia na bete na veika kece sa vakarota o Easi na tui.

¹⁷ A sa seresereka o Easi na tui na qiqi parasa era dau vakayagataki ena Valenisoro ka kauta laivi na beseni era toka kina; a sa vagalalataka talega na taqe parasa e dabe toka ena deladratou na bulumakau parasa e tinikarua, ka vakatikora ena dua na yavu vatu.

¹⁸ Ena vukuna na tui Asiria, a vagalalataka kina o Easi na i tutu ni dabedabe vakaturaga mai na Valenisoro, ka sogota na i curucuru ni tui ki na Valenisoro.

¹⁹ Na veika kece sara sa cakava o Easi sa volai ena Kedra i Volatukutuku na Tui Juta.

²⁰ A sa mate o Easi ka la'ki bulu ena nodra i bulubulu na tui ena Koro i Tevita, ka sa sosomitaki koya me tui o Esekaia na luvena.