2 Tui 15 - Vakavakadewa Vou kei na iVola tale eso

O Asaraia na Tui Juta

¹ Ena i ka 27 ni yabaki ni veiqaravi vakatui i Jeropoama Na i Karua e Isireli, a sa buli me tui o Asaraia na luve i Amasaia me tui Juta.

² A se qai yabaki tinikaono o koya ni tekivu me veiliutaki, ka tui mai Jerusalemi me 52 na yabaki. Na tinana o Jikolaia mai Jerusalemi.

³ A sa dau caka dodonu ena mata i Jiova, me vaka na ka kecega a cakava o Amasaia na tamana.

⁴ Ia a sega ga ni biu tani na veitikina cecere; era a vakacabo i soro tikoga kina na tamata, ka ra vakama tiko kina na ka boi vinaka.

⁵ A sa cudruvi Asaraia o Jiova; a sa yacovi koya kina na mate ni kuli rerevaki ka tauvi koya ena nona bula taucoko. A sa tiko voli ga vakataki koya ena dua na vale, ni sa vakacegui mai na cakacaka vakatui kecega, ka sa liutaka na matanitu o Jocame na luvena.

⁶ Na veika kece sara sa cakava o Asaraia sa volai ena Kedra i Volatukutuku na Tui Juta

⁷ A sa mate o Asaraia ka la'ki vakotori ena i bulubulu vakatui ena Koro i Tevita, ka sa buli me tui o Jocame na luvena me kena i sosomi.

Tui Isireli o Sakaraia

⁸ Ena i ka 38 ni yabaki i Asaraia na tui Juta, a buli me tui vei ira na Isireli mai Samaria o Sakaraia na luve i Jeropoama Na i Karua, ka vula ono na kena dede.

⁹ A dau caka ca o koya ena mata i Jiova, me vaka na ka era a dau cakava na nona qase. A sega ni biuta o koya na i valavala ca i Jeropoama Na i Karua, na luve i Nipati, ka a vakaivalavalacataki ira na Isireli.

¹⁰ A sa bukia na vere i Sakaraia na tui o Salumi na luve i Jepesi, a sa mokuti koya ka vakamatea mai Ipilimi, ka sa buli o koya me kena i sosomi.

¹¹ Na veika kece sa cakava o Sakaraia sa volai ena Kedra i Volatukutuku na Tui Isireli.

¹² Na vosa ni yalayala i Jiova ka sa cavuti vei Jeu oqo: “Na nomu kawa, me yacova na i kava ni tabatamata era na veiliutaki vakatui e Isireli.”

O Salumi na Tui Isireli

¹³ A sa yaco me tui Isireli o Salumi ni donumaka na i ka 39 ni yabaki ni veiliutaki vakatui i Asaraia e Juta; ka sa tui mai Samaria me duabulu ga na vula.

¹⁴ A lako cake mai Tirisa o Minemi na luve i Kati, ka mokuti Salumi na luve i Jepesi mai Samaria, ka vakamatea, ka sa kena i sosomi me tui.

¹⁵ Na vo ni cakacaka kece i Salumi, kei na i talanoa ni buki vere i Minemi, sa volai oqo ena Kedra i Volatukutuku na Tui Isireli.

¹⁶ Ena nona a lesu tiko mai Tirisa o Minemi, a sa ravuta na koro levu o Tapua kei ira kece sa tiko kina, kei na veiyasana voleka, baleta ni a sega ni soro vua na koro levu oqo. A bau tava talega na ketedra na yalewa bukete era tiko kina.

¹⁷ Ena i ka 39 ni yabaki i Asaraia na tui Juta, a tekivu na nona veiliutaki mai Samaria vei ira na Isireli o Minemi na luve i Kati, ka tui tiko me yabaki tini.

¹⁸ Sa dau caka ca o koya ena mata i Jiova, ka sega ni biuta ena gauna taucoko a bula kina na i valavala ca i Jeropoama na luve i Nipati, ka vakaivalavalacataki ira na Isireli.

¹⁹ A sa lako mai o Tikilaci Pilesa na tui Asiria me valuti Isireli, ka solia kina vua o Minemi e 34,000 na kilokaramu na siliva me rawa ni lomani ka totaki mai vua ena kena vakataudeitaka na kaukauwa i Minemi ena matanitu.

²⁰ A lavaka na i lavo o Minemi vei ira na Isireli, io, mai vei ira kecega na tamata vutuniyau, me ra tau ya 50 na tiki ni siliva ka me soli vua na tui Asiria. A sa lesu tale kina ki na nona vanua o Tikilaci Pilesa.

²¹ Na veika kece sara sa cakava o Minemi sa volai ena Kedra i Volatukutuku na Tui Isireli.

²² A sa mate ka bulu, a sa buli me tui o Pikaya na luvena me kena i sosomi.

²³ Ena i ka 50 ni yabaki i Asaraia na tui Juta, a tekivu me veiliutaki vei ira na Isireli mai Samaria o Pikaya na luve i Minemi, ka tui me yabaki rua.

²⁴ A dau caka ca o koya ena mata i Jiova, ni sa muria voli na i valavala ca i Jeropoama na luve i Nipati, o koya ka vakaivalavalacataki ira na Isireli.

²⁵ Ia a bukiveretaki Pikaya o Peka na luve i Rimalaia, na nona kavetani ni valu, kei ira e lewe 50 na kai Kiliati. Era a mokuti koya ena tikina cecere ni valenitui mai Samaria. A sa vakamatei Pikaya o Peka, ka sa veisosomitaki me tui.

²⁶ Na veika kece sara sa cakava o Pikaya sa volai ena Kedra i Volatukutuku na Tui Isireli.

²⁷ Ena i ka 52 ni yabaki ni veiliutaki vakatui i Asaraia na tui Juta, a sa buli me tui Isireli o Peka na luve i Rimalaia, ka veiliutaki voli mai Samaria me yabaki ruasagavulu.

²⁸ A sa dau kitaka o koya na i valavala ca ena mata i Jiova, ni sa muria na i vakarau vakasisila i tui Jeropoama na luve i Nipati, o koya ka a vakaivalavalacataki ira na Isireli.

²⁹ Ena gauna i Peka na tui Isireli, a lako mai o Tikilaci Pileseri na tui Asiria, ka valuta na veikoro o Aijoni, o Epeli Peci Maka, o Janoa, o Ketesi, o Asori, o Kiliati, kei Kalili, na vanua taucoko o Navitalai, ka kauti ira vakabobula na tamata ki Asiria.

³⁰ Ena i ka 20 ni yabaki ni veiliutaki vakatui i Jocami na luve i Asaraia e Juta, a sa bukiveretaki Peka na tui Isireli o Osea na luve i Ela, ka vakamatei koya, ka sosomitaki koya me tui.

³¹ Na veika kece sara sa cakava o Peka sa volai ena Kedra Volatukutuku na Tui Isireli.

O Jocame na Tui Juta

³² Ena i karua ni yabaki i Peka na tui Isireli, na luve i Rimalaia, a sa tekivu me veiliutaki vakatui mai Juta o Jocame na luve i Asaraia.

³³ A sa yabaki 25 o koya ka sa veiliutaki vakatui mai Jerusalemi me yabaki tinikaono. Na tinana o Jirusa na luve i Setoki.

³⁴ A dau caka dodonu o koya ena mata i Jiova me vaka na ka kecega a cakava o Asaraia na tamana.

³⁵ Ia a sega ni biuta tani na vanua ni vakacaboisoro ki na kalou matakau eso, ka ra tomana tikoga kina na tamata na nodra vakacaboisoro kei na vakamai ni ka boi vinaka e kea. A sa tara o Jocame na Matamata ni Vualiku ni Valenisoro.

³⁶ Na veika kece sa cakava o Jocame sa volai ena Kedra i Volatukutuku na Tui Juta.

³⁷ Ena dela ni nona gauna ni veiliutaki, a sa ia na veitalai o Jiova vei rau o Risini na tui Siria kei Peka na tui Isireli me rau valuti Juta.

³⁸ A sa mate o Jocame ka bulu ena nodra i bulubulu na tui ena Koro i Tevita; a sa veisosomitaki me tui o Easi na luvena.