2 Tui 14 - Vakavakadewa Vou kei na iVola tale eso

O Amasaia na Tui Juta

¹ Ena kena i karua ni yabaki i Jioasi na tui Isireli, na luvei Jioasi, a tekivu me veiliutaki o Amasaia na luve i Joasa na tui Juta.

² A sa yabaki 25 na nona bula ni a tekivu me veiliutaki, ka lewa tiko mai Jerusalemi me 29 na yabaki. Ia na yaca i tinana o Jioatani na marama ni Jerusalemi.

³ A sa vakayacora na ka dodonu ena mata i Jiova, ia sa sega ga ni vakataki Tevita na nona qase. Ena veika kece sara, sa vakamuria na veika sa cakava o Joasa na tamana.

⁴ E a sega ni talaraka sobu na vanua ni sokalou ki na kalou tani, ka ra tomana voli ga kina na tamata na nodra vakacaboisoro kei na vakamai ni ka boi vinaka.

⁵ Ena gauna sa koto dei kina vei Amasaia na kaukauwa vakatui, sa qai vakamatei ira na nona tamata dauveiqaravi ka ra a vakamatei tamana.

⁶ Ia, sa sega ga ni vakamatei ira na luvedra ena vuku ni nona muria na lewa i Jiova sa vakaroti ena Lawa i Mosese, ni sa tukuna: “Me ra kakua ni vakamatei na i tubutubu ena vuku ni veika ca era cakava na luvedra; ka me ra kakua talega ni vakamatei na gone ena vuku ni veika ca era cakava na nodra i tubutubu. Na tamata sa vakamatei me mate ga ena vuku ni ka ca sa cakava.”

⁷ A sa mokuti ira mate e 10,000 na kai Itomi o Amasaia ena Buca ni Masima; a taura vakavesu na koro levu o Sila ena i valu, ka vakatoka me yacana o Jokicieli me yacova na siga oqo.

⁸ E a qai tala yani eso na nona tamata me ra vakau i tukutuku vei Jioasi na tui Isireli, ka bolei koya me rau sota mada.

⁹ A talatala o Joasa na tui Isireli vei Amasaia na tui Juta, ka kaya, Sa talatala mai na co vakavotona mai Lepanoni ki na dua na sitari mai Lepanoni, ka vaka, ‘Mo solia na luvemu yalewa vua na luvequ tagane me watina; a lako voli e dua na manumanu kila mai Lepanoni, ka buturaka sobu na co vakavotona.

¹⁰ E dina ga o sa mokuti ira na Itomi, ka o sa yalo levu kina. Mo tei marautaka mada na nomu lagilagi, ka tiko ena vakacegu ena nomu vale; a cava o vakatubu ca kina me vakavuna na nomu bale o iko vata kei Juta?

¹¹ Ia a sega ni via muria o Amasaia, a lako cake o Jeosi na tui Isireli, e rau a veiqaravi ena i valu kei Amasaia na tui Juta mai Pecisemesi na vanua i Juta.

¹² Era a vakamalumalumutaki ira na Juta na Isireli, ka ra dui dro na tamata ki na nona vale.

¹³ Ia o Jioasi na tui Isireli, a tauri Amasaia na tui Juta, na luve i Joasa na makubui Esaia mai Pecisemesi, ka lako yani ki Jerusalemi, ka basuraka sobu na bainikoro o ya me rauta ni 200 na mita na kena balavu, oqo me vakatekivu mai na Matamata kei Ifereimi ki na Matamata ki Tutuna.

¹⁴ A taura kece na koula o koya kei na siliva, na i yaya kecega a kunea ena vale i Jiova, kei na i yau mai na nona vale na tui, tauri ira vakaukauwa eso na tamata, ka lesu tale ki Samaria.

¹⁵ Ia na vo ni cakacaka i Jeosi me vaka a cakava o koya, na nona kaukauwa, na nona veivala kei Amasaia na tui Juta, a sega li ni volai ena i Vola ni Veika Sa Caka ena nodra Veigauna na tui Isireli?

¹⁶ A mate ka moce kei ira na nona qase o Jioasi, a bulu vata kei ira na tui Isireli mai Samaria; a sa tui o Jeropoama na luvena, me kena i sosomi.

Na Mate i Tui Amasaia

¹⁷ A bula tiko o Amasaia na luve i Jeosi na tui Juta ka yabaki tinikalima ena gauna a mate kina o Jioasi na luve i Jioasi na tui Isireli.

¹⁸ Ia na vo ni cakacaka kece i Amasaia sa volai ena Kedra i Vola Tukutuku na Tui Juta.

¹⁹ Era a bukiveretaki Amasaia mai Jerusalemi, a mani dro o koya ki Lakisi ka ra la'ki vakamatei koya kina.

²⁰ Era a kauta lesu mai na yagona ena ose; a bulu mai Jerusalemi kei ira na nona qase ena koro i Tevita.

²¹ Era a kauti Asaraia o ira kece na kai Juta, ni a qai yabaki tinikaono na nona bula, ka buli koya me tui, me i sosomi kei Amasaia na tamana.

²² E a tara cake tale na koro o Elaci o Asaraia, ka vakasuka tale vei ira na Juta ni sa mate oti o tamana.

Liutaki Isireli o Jeropoama na i Karua

²³ Ena i katinikalima ni yabaki i Amasaia na tui Juta, na luve i Jeosi, a tekivu me veiliutaki mai Samaria o Jeropoama na luve i Joasa na tui Isireli, me yabaki 41.

²⁴ A sa caka cala o koya ena mata i Jiova, ni sa vakamurimuria na i valavala ni tui e liu vua o Jeropoama na luve i Nipati, o koya ka vakaivalavalacataki ira na Isireli.

²⁵ A sa rawata na qaqa ni kena tauri lesu tale na veivanua nei Isireli, me vakatekivu oqo mai na i curucuru ki Emaci ena vualiku me yaco sara ki na Waitui Mate ena ceva. Oqo na ka sa vosa oti kina o Jiova na nodra Kalou na Isireli, ka a tukuna ena gusu i Jona na parofita, na luve i Emitai mai Kaca Eferi.

²⁶ Ni raica o Jiova na nodra rarawa na Isireli ni rui bibi sara, a sega tale ni dua me vukei ira na Isireli.

²⁷ A sega ni kaya o Jiova me bokoca tani na yacadra na Isireli mai na ruku i lomalagi, a vakabulai ira ena liga i Jeropoama na luve i Jeosi.

²⁸ Ia na vo ni cakacaka i Jeropoama Ai Karua, kei na ka kecega sa cakava o koya, kei na nona vakalesui Tamasiko kei Emaci me nodra na Isireli sa volai kece ena Kedra i Volatukutuku na Tui Isireli.

²⁹ A sa mate o Jeropoama ka bulu kei ira na nona qase ena i bulubulu vakatui, ka sa sosomitaki koya ki na i tutu vakatui o Sakaraia na luvena.