2 Tui 13 - Vakavakadewa Vou kei na iVola tale eso

O Jioasi na Tui Isireli

¹ Ena i ka 23 ni yabaki i Joasa na tui Juta, na luve i Esaia, a buli me tui vei ira na Isireli mai Samaria o Jioasi na luve i Jeu, ka tui me yabaki tini kavitu.

² A dau caka ca o koya ena mata i Jiova ka muria na i valavala ca i Jeropoama na luve i Nipati, ka ni a vakaivalavalacataki ira na Isireli; ka sega ni biuta tani o koya.

³ A waqa na cudru i Jiova vei ira na Isireli, a soli ira ki na liga i Eseeli na tui Siria, kei Penietati na luve i Eseeli ena veigauna kecega.

⁴ A vakamamasu vei Jiova o Jioasi, ka sa rogoci koya o Jiova ni sa raica na nodra vakasaurarataki na Isireli mai vei tui Siria.

⁵ A solia o Jiova vei ira na Isireli e dua na i vakabula, ka ra dro tani mai kina mai na ligadra na kai Siria; era a tiko tale ena nodra veivale o ira na Isireli, me vaka e liu.

⁶ Ia era a sega ga ni biuta na i valavala ni mataqali i Jeropoama, era a muria tikoga; a tu talega mai Samaria na i vakatakarakara ni kalou yalewa o Asera.

⁷ E a sega ni vakavotaka tu vei Jioasi o Eseeli na tamana, e dua na mataivalu, vakavo ga e lewe 50 na tamata dauvodo ose, ka tini na qiqinivalu, ka lewe 10,000 na tamata i valu yava, ni a vakarusa kece na kena vo o tui Siria, ka vaka na kuvu ni qele sa buturaki.

⁸ Ia na vo ni cakacaka i Jioasi, kei na ka kecega a cakava o koya, kei na nona kaukauwa, a sega li ni volai ena i Vola ni Veika sa Caka ena nodra Veigauna na tui Isireli?

⁹ A mate o Jioasi, ka moce kei ira na nona qase, era a buluti koya mai Samaria; a sa tui o Joasa na luvena me kena i sosomi.

O Jioasi na Tui Isireli

¹⁰ Ena i ka 37 ni yabaki i Jioasi na tui Juta, a tekivu me tu vei ira na Isireli mai Samaria o Jioasi na luve i Jioasi, ka veiliutaki me yabaki tinikaono.

¹¹ A dau caka ca o koya ena mata i Jiova, a sega sara ni biuta tani na i valavala ca i Jeropoama na luve i Nipati, o koya ka a vakaivalavalacataki ira na Isireli, ia a muria tikoga o koya.

¹² Ia na vo ni cakacaka i Jeosi, kei na ka kecega a cakava o koya, kei na nona qaqa a vala kina kei Amasaia na tui Juta, a sega li ni volai ena i Vola ni Veika sa Caka ena nodra Veigauna na tui Isireli?

¹³ A mate, ka moce kei ira na nona qase o Jeosi; a bulu vata kei ira na tui Isireli mai Samaria; a sa tiko ena nona i tikotiko vakaturaga o Jeropoama.

Na Mate i Ilaisa

¹⁴ A sa tauvi Ilaisa e dua na mate levu; ia ni sa voleka ni mate, a sa la'ki sikovi koya o Jeosi na tui Isireli, a sa tagi ka kaya, “I tamaqu! I tamaqu! O iko na qaqa sa dau taqomaki Isireli!”

¹⁵ A sa kaya vua o Ilaisa, “Taura e dua na dakaititi kei na kena gasau.” A sa vakarautaka mai o Jeosi,

¹⁶ ka sa kaya o Ilaisa vei Jeosi me vakadreta na dakaititi me vakarau vanataka. A sa vakayacora vakakina na tui, a sa biuta na ligana o Ilaisa ki na ligana na tui.

¹⁷ A sa kaya o koya, “Mo dolava na katubaleka sa qara vaka ki Siria;” a sa dolava na tui. A sa kaya o Ilaisa, “Mo vana!” ka sa vana o koya. Ena gauna ga e vanataka kina na dakaititi na tui, a qai kaya cake mai na parofita, “Sai iko na gasau i Jiova; ena rawata na qaqa vei Siria o Jiova ena vukumu. O na valuti ira na kai Siria mai Efeki me yacova na nomu sa vakadrukai ira.”

¹⁸ A sa kaya o Ilaisa vua na tui, “Mo taura na vo ni gasau;” a sa taura o koya. A sa kaya o koya vua na tui Isireli, “Mo samuta na qele ena gasau oqori.” A sa mokuta vakatolu na qele, ka qai cegu.

¹⁹ Na ka oqo sa cudru kina o Ilaisa, ka sa kaya vua na tui, “E dodonu mo a mokuta vakalima se vakaono, baleta ni o na qai rawata vakadua kina na qaqa vei Siria; ia oqo, o na vakadrukai ira ga vakatolu.”

²⁰ A sa mate o Ilaisa ka ra sa buluti koya. Era sa dau lako mai eso na batikadi ni Moapi me ra valuta na vanua o Isireli ena veiyabaki.

²¹ Ia ena dua na gauna ni qaravi tiko e dua na veibulu, era a raica e dua na batikadi ni Moapi na lewenivanua, ka ra mani viritaka kina na yago ni mate ki na loma ni bulubulu i Ilaisa, ka dro yani. Ena gauna ga e tara kina na sui i Ilaisa na yago ni mate, a sa bula tale mai na tamata mate ka tucake tu e yavana.

Na Veivaluvaluti nei Isireli kei Siria

²² A vakasaurarataki ira na Isireli o Eseeli na tui Siria ena gauna i Jioasi.

²³ Ia sa lomani ira o Jiova, ka yalololoma vei ira, ka sa nanumi ira ena vuku ni nona veiyalayalati kei Epara-ama, kei Aisake, kei Jekope, ka sega sara ni via vakarusai ira; ka sega ni biuti ira tani e matana.

²⁴ A mate o Eseeli na tui Siria; a sa tui o Penietati na luvena me kena i sosomi.

²⁵ Ia o Jioasi na tui Isireli sa vakadrukai Penietati vakatolu ka taura lesu na veikoro lelevu ka kovea tani o Penietati ena dela ni gauna ni veiliutaki vakatui i Jioasi, na tama i Jioasi.