2 Tui 12 - Vakavakadewa Vou kei na iVola tale eso

O Joasa na Tui Juta

¹ Ena i kavitu ni yabaki i Jeu, a sa tui Juta kina o Joasa, ka veiliutaki vakatui mai Jerusalemi me 40 na yabaki. A tinana o Sipia mai na koro levu o Perisepa.

² A caka dodonu o Joasa ena mata i Jiova ena gauna kece ni nona tui, baleta ni dau vakavulici koya tiko o Jioiata na bete.

³ Ia sa sega ga ni kau laivi na veitikina ni qaravi kalou matakau, ka ra tomana tikoga na tamata na nodra vakacaboisoro kei na vakamai ni ka boi vinaka e kea.

⁴ A sa kacivi ira na bete o Joasa ka vakaroti ira me ra soqona na i lavo kece sa kau mai me baleta na veiqaravi ena Valenisoro. Oqori na i lavo sa kumuni me saumi kina na ka tabu me vakacabori kei na i lavo kecega era sa solia vakailoloma na tamata.

⁵ Na bete yadudua me ra dui qarauna na i lavo era sa kumuna mai vei ira era veiqaravi kina, ka me vakayagataki na i lavo ena kena vakavinakataki na Valenisoro, me vaka e gadrevi.

⁶ Ia me la'ki yacova na i ka 23 ni yabaki ni veiliutaki vakatui i Joasa, a ra se sega ga ni qarava na cakacaka ni vakavinakataki Valenisoro o ira na bete.

⁷ A sa qai kacivi Jioiata na bete kei na so tale na bete o Joasa na tui, ka kaya vei ira, “A cava dou sa sega ni vakavinakataka kina na veitiki ni Valenisoro sa kabasu? Me tekivu oqo ka lako yani, mo dou kakua tale ni qai taura tiko na i lavo dou sa ciqoma; ia mo dou solia mai me rawa ni toso kina na cakacaka.”

⁸ Era a vakadonuya oqo na bete, ka ra vakadonuya talega me ra kakua ni vakavinakataka na veitiki ni Valenisoro sa kabasu.

⁹ A sa kauta e dua na kisi o Jioiata na bete, ka cakava e dua na qara ena kena i sogo, ka biuta voleka ki na i cabocabonisoro ena yasa i matau ni ra curu yani ki na Valenisoro. O ira na bete ka dauvakatawa na katuba era sa vakatawana ki loma ni kisi na i lavo kece era dau solia na mai sokalou.

¹⁰ Ena gauna e levu kina na i lavo e loma ni kato, e rau sa dau lako yani na vunivola ni tui kei na bete levu me rau kumuna na i lavo, ka tawana ena taga.

¹¹ Ni sa volai oti na levu ni lavo, a rau sa solia sara na siliva vei ira na i liuliu ni cakacaka ena Valenisoro, ka ra sa qai veisaumitaki ira na matai ni kau, kei ira na matai ni vatu,

¹² kei ira na dauviri bai, kei ira na dautavatu, ka me voli kina na kau vata kei na vatu ni cakacaka, ka saumi kina na veika kece e gadrevi.

¹³ Ia sa sega sara ni dua na i lavo me saumi kina na caka ni bilo siliva, na beseni, na davui, se na i yaya ni cina, se i yaya cava ga me buli ena siliva se na koula.

¹⁴ A sa vakayagataki kecega me ra veisaumi kina na tamata cakacaka ka voli kina na i yaya ni cakacaka.

¹⁵ Me vaka ni ra tamata daucakacaka vakadodonu o ira na i liuliu ni cakacaka, sa sega kina ni gadrevi me ra soli ripote ena vuku ni vakayagataki ni lavo.

¹⁶ Me baleta na i lavo sa soli ena vuku ni caka cala kei na i valavala ca, oqo sa sega ni vakacurumi ki na kato ni lavo; ni sa nodra i wasewase na bete oqo.

¹⁷ Ena gauna o ya, a ravuta kina o Eseeli na tui Siria na koro levu o Kaca, ka rawata na qaqa; a sa qai nanuma me ravuti Jerusalemi.

¹⁸ A sa taura o Joasa na tui Juta na veisolisoli yaya tabu kece sa cabora vei Jiova o ira na tui me vakataki Josefati, o Jorami, kei Esaia, ka vakuria ena nona i solisoli vakataki koya kei na koula kece ni valeniyau ni Valenisoro kei na valenitui, ka qai vakauta kece vakailoloma vei tui Eseeli, ka sa mani lako tani kina mai Jerusalemi.

¹⁹ Na veika tale eso e vakayacora o Joasa na tui sa volai e Na Kedra i Volatukutuku na Tui Juta.

²⁰ Era a bukiveretaki Joasa na nona vakailesilesi, ka sa vakamatei o Joasa mai Vale i Milo, ena sala ka lako sobu ki Sila.

²¹ O rau na i vakalesilesi ka mokuti koya o Josakari na luve i Semeace kei Jiosevata na luve i Someri. A sa bulu vata kei ira na nona qase o Joasa ena Koro i Tevita; a sa buli me tui o Amasaia na luvena, me kena i sosomi.