2 Timoci 3 - Vakavakadewa Vou kei na iVola tale eso

Na Veisiga Emuri

¹ Mo kila talega oqo, ni na yaco mai na gauna dredre eso ena veisiga emuri.

² O ira na tamata era na daunanumi ira vakataki ira ga, era na dauvinakata na i lavo, era na dokadoka ka qaciqacia, era na sega ni dokai ira na nodra i tubutubu, era na sega ni dau via vakavinavinaka, era na sega ni daulotu,

³ era na sega ni dau kauwaitaki ira na tamata, ena kaukauwa na nodra i vakarau, era na dauveibeitaki vakailasu, era na daucudrucudru; era na cata na veika e vinaka;

⁴ era na dauveidabui, era na dui vakayaco lomadra, era na sinai ena dokadoka; era na dau lomana ga na marau ka sega ni lomana na Kalou;

⁵ Era sa vakayacora me ka vakarairai ga na nodra lotu ka sega ni ka mai na yalodra dina. Kakua ni dau veitokani kei ira na tamata vakaoqo.

⁶ Eso vei ira era sa dau lako ki na veivale ka rawai ira na yalewa malumalumu vakayalo era se bikai tu ena nodra i valavala ca ka lewai mai na nodra gagadre ca e vuqa,

⁷ o ira na yalewa ka ra sa dau tovolea vakaukauwa me ra vakavulici, ia era sa sega ga ni kila rawa na ka dina.

⁸ Me vaka na nodrau saqati Mosese o Jani kei Jabari, era sa saqata vakakina na ka dina na tamata vakaoqo. Sa tauvimate na nodra vakasama ka sega ni vakadonui na nodra vakabauta.

⁹ Ena sega ni balavu sara na nodra toso, baleta ni ra na raica na tamata kecega na nodra lecaika. Sa i koya o ya na ka sa yaco vei Jani kei Jabari.

Na i Otioti ni Vakaro vei Timoci

¹⁰ Ia o iko, o sa dau muria na noqu i vakavuvuli, na noqu i tovo, na i naki ni noqu bula, na noqu vakabauta, na noqu vosota vakadede, na noqu loloma, na noqu vosota na veika dredre,

¹¹ na vakacacani ni noqu vakabauta, kei na noqu vakararawataki mai na veika ka'u a sota kaya mai Anitioki, kei Ikoniona, kei Lisitira. Sa ka levu dina sara na veivakararawataki ka'u sa curuma rawa! Ia sa vakabulai au na Turaga mai na veika kece oqori.

¹² O ira yadua sa gadreva me ra bulataka na bula vakalou ena vuku i Karisito Jisu era na vakacacani.

¹³ Ia ena toso cake ga vakalevu na nodra veidabui kei na veivakacalai o ira na tamata ca kei ira na dauvosalasu, ni ra sa vakacalai ira eso ka vakacalai ira vakai ira talega.

¹⁴ Ia o iko, mo tudei tikoga ena veika dina o sa vakavulici kina, ka vakadinata baleta ni o sa kilai ira sa vakatavulici iko.

¹⁵ Ni o sa kila rawa na i Vola Tabu o iko mai na gauna o se gone kina, ka sa vakavukui iko na ka oqo me nomu rawa kina na bula ni o sa vakabauti Karisito Jisu.

¹⁶ Ni sa ceguva na i Vola Tabu kecega na Kalou, a sa yaga oqo me ia kina na veivakavulici, me vunauca na ca, me vakadodonutaka na cala, me ia kina na veituberi ena valavala dodonu,

¹⁷ ka me yaco kina vua na tamata ni Kalou me vakarautaki koya vinaka sara ki na kena cakacakataki na veika vinaka kece sara.