2 Samuela 9 - Vakavakadewa Vou kei na iVola tale eso

Tevita kei Mefiposeci

¹ A sa kaya o Tevita, “Sa vo tiko li e dua mai na vuvale i Saula me'u caka vinaka vua ena vuku i Jonacani se sega?”

² A sa dua na tamata ena vuvale i Saula, a yacana o Sipa, ka ra a kacivi koya vei Tevita; a tarogi koya na tui, ka kaya vua, “O iko dina o Sipa se sega?” A sa kaya o koya, “Oi au saka o Sipa na nomuni tamata.”

³ A sa kaya vua na tui, “Sa sega li ni vo tiko e dua na tamata ena mataqali i Saula me'u vakaraitaka vua na nona loloma na Kalou?” A sa kaya vua na tui o Sipa, “E bula tiko e dua na luve i Jonacani na luve i Saula, ia e lokiloki na yavana.”

⁴ A sa kaya vua na tui, “Sa evei o koya?” A sa kaya vua na tui o Sipa, “Raica, sa tiko ena vale i Mekiri, na luve i Amieli mai Lotipari”.

⁵ A sa talatala o Tevita na tui, me la'ki kau mai o koya mai na vale i Mekiri, na luve i Amieli mai Lotipari.

⁶ A lako mai vei Tevita o Mefiposeci, na luve i Jonacani, na luve i Saula, a cuva sobu ki na qele ka vakarokoroko. A sa kaya vua o Tevita, “I Mefiposeci!” a sauma ka kaya, “Oi au na nomuni tamata.”

⁷ A sa kaya vua o Tevita, “Mo kakua ni rere ni'u na caka vinaka vei iko, ena vuku i Jonacani na tamamu, ia au na vakasuka vei iko na vanua kecega ka nei Saula na tukamu; ia o na kana tikoga mai na noqu teveli.

⁸ A vakarokoroko o koya ka kaya, “A cava soti mo ni galeleti au kina, ni'u sa sega ni duidui kei na dua na koli mate?”

⁹ A kacivi Sipa, na tamata i Saula na tui, ka kaya vua, “Au sa solia vua na makubuna na nomu turaga, na ka kecega a nei Saula kei ira kecega na nona mataqali.

¹⁰ Ia, o iko, kei ira na luvemu, kei ira na nomu tamata, mo ni teivaka na qele ena vukuna, ka kauta mai vua na vua ni nona qele, me kena na luvena na nomu turaga; ia ena kana tikoga ena noqu teveli o Mefiposeci, na luvena na nomu turaga.” Ia o Sipa a lewe tini kalima na luvena tagane ka lewe ruasagavulu na nona tamata.

¹¹ A sa kaya vua na tui o Sipa, “Ena cakava na nomuni tamata na ka kecega a vakarota na noqu turaga na tui.” A mai kana tiko yani ena teveli i Tevita o Mefiposeci, me vaka e dua vei ira na luvenitui.

¹² A sa dua na luve i Mefiposeci, na gonetagane, a yacana o Maika. Era a dau qaravi Mefiposeci o ira kecega era a tiko ena vale i Sipa.

¹³ A tiko mai Jerusalemi o Mefiposeci; ka kana tikoga mai na nona teveli na tui. A lokiloki na yavana ruarua.