2 Samuela 8 - Vakavakadewa Vou kei na iVola tale eso

Na Qaqa Vakaivalu i Tevita

¹ Ni oti e dua na gauna, a valuti ira na kai Filisitia na tui o Tevita ka vakamalumalumutaki ira, ka muduka na nodra veiliutaki ena vanua o ya.

² A sa vakamalumalumutaki ira talega na kai Moapi. A sa vakarota me ra davo sobu ki na qele o ira sa tauri vakavesu ka vakamatea e lewe rua mai na veiyatolu na tamata era sa vesuki tu. Era a qali kina vei Tevita na kai Moapi me ra nona tamata ka ra soli i vakacavacava vua.

³ A vakamalumalumutaki Etateseri na luve i Riopi na tui Sopa o Tevita, ka lako yani o koya me taura tale na nona lewa mai na uciwai na Uferetisi.

⁴ A taura mai vua o Tevita e 1,700 na lewe ni mataivalu vodo ose kei na 20,000 na lewe ni mataivalu ni vanua. A sa maroroya eso na ose me veirauti kei na dua na drau na qiqi ni valu, ka vakacacani ira na vo ni qiqi.

⁵ Ena gauna era a lako kina na kai Siria mai Tamasiko me ra mai vukei Etateseri na tui Sopa, a qai vakamatea o Tevita e lewe 22,000 na tamata vei ira na kai Siria.

⁶ A qai vakatikora na veimataivalu ni tawa vanua o Tevita e Arami mai Tamasiko; era a qali vei Tevita na kai Siria ka ra dau soli i vakacavacava vua. A solia vei Tevita o Jiova na qaqa kei na lagilagi ena vanua kecega sa lakova.

⁷ A taura o Tevita na i sasabai koula ka nodra na kai Etateseri ka kauta ki Jerusalemi.

⁸ A taura talega o Tevita na tui e levu na parasa mai Peta kei Perocae, oi rau na koro mai Etateseri.

⁹ Ni rogoca o Tou na tui Emaci ni a vakamalumalumutaka na mataivalu taucoko nei Etateseri o Tevita,

¹⁰ a qai talai Jorame na luvena tagane vei Tevita na tui, me kidavaki koya ka vosa vakacaucautaki koya ena nona qaqa vei Etateseri ena i valu; ka ni rau a dau veivaluvaluti vakawasoma e liu kei Etateseri o koya. E a kauta tiko o Jorame na veiyaya siliva kei na koula, kei na veiyaya parasa.

¹¹ Oqori talega a vakacabora na tui o Tevita vei Jiova, ka vakakina na siliva kei na koula a rawata o koya mai na veimatanitu kece a vakamalumalumutaka;

¹² mai Itomi kei Moapi, na luve i Amoni, na kai Filisitia, na Amalekaiti, kei na i toki ni valu mai vua na luve i Riopi na tui Sopa o Etateseri.

¹³ A rogo levu na yaca i Tevita ena nona lesu mai ni vakamatei ira oti e lewe 18,000 na kai Itomi ena Buca ni Masima.

¹⁴ A lesia o Tevita na mataivalu ni tawa vanua ena veivanua e Itomi, ka ra qali na kai Itomi me ra nona tamata. A solia vei Tevita o Jiova na lagilagi kei na qaqa ena veivanua kecega a lako kina.

¹⁵ A nodra tui e Isireli taucoko o Tevita, ka vakataulewa dodonu ka savasava vei ira kecega na nona tamata.

¹⁶ A liutaka na nona mataivalu taucoko o Joape na luve i Seruwaia, ka vunivola levu ni matanitu o Josefati na luve i Eailute;

¹⁷ e rau kena bete o Setoki na luve i Eitupe kei Eimeleki na luve i Epaiaca; ka vunivola o Siraia.

¹⁸ A veiliutaki vei ira na Kireci kei na Pileci o Penaia na luve i Jioiata, ka ra sa bete na luve i Tevita.