2 Samuela 7 - Vakavakadewa Vou kei na iVola tale eso

Tukutuku o Necani vei Tevita

¹ A sa tiko vakacegu ena nona valenitui o Tevita na tui, ka sa maroroi koya o Jiova mai vei ira na kena meca.

² Ia sa qai vosa vei Necani na parofita na tui, ka kaya, “Mo raica mada oqo, au sa tiko oqo ena vale sitari, ia na Kato ni Veiyalayalati sa tiko ga ena valelaca.”

³ A sa kaya vua na tui o Necani, “Mo ni cakava na veika kecega sa tu e lomamuni; ni sa tiko kei kemuni o Jiova.”

⁴ Ia ena bogi vata ga o ya, a sa yaco vei Necani na vosa i Jiova, ka vaka:

⁵ “Mo la'ki tukuna oqo vua na noqu tamata o Tevita: ‘Sa vosa vakaoqo o Jiova: O na tara rawa beka li e dua na noqu vale me'u tiko kina?

⁶ Au se sega mada ni bau tiko ena dua na vale tudei me vakatekivu mai na siga ka'u a kauti ira cake mai kina na Isireli mai Ijipita, me yacova na siga edaidai, ia au a tiko voli ga ena valelaca.

⁷ Ena veivanua kecega au lako voli kina kei ira na Isireli, au a sega vakadua ni bau taroga vei ira na qase ni Isireli au sa digitaka se cava na vuna era sega kina ni tara e dua na noqu vale sitari.’

⁸ “Mo qai tukuna kina vua na noqu tamata o Tevita, ni sa vosa vakaoqo vua o Jiova ni lewe vuqa, ‘Au a kauti iko mai na cakacaka ni vakatawa sipi ena veibuca ka vakayacori iko mo liutaki ira na noqu tamata na Isireli.

⁹ Au a tiko kei iko ena vanua kecega o sa lakova, ka'u sa vakarusai ira oti kece na kemu meca mai na matamu. Io au na vakarogoya na yacamu me vaka na yacadra na tamata rogo e vuravura.

¹⁰ Au na digia e dua na vanua me nodra na noqu tamata na Isireli, ka vakatikori ira kina, ka vakataudeitaki ira me ra tiko kina me nodra, ka me kakua tale ni dua me vakasosataki ira; ka me ra kakua ni vakararawataki ira tale na tamata i valavala kaukauwa, me vaka e liu,

¹¹ me vakatekivu mai na gauna au a lesi ira kina na dauveilewai me ra liutaki ira na noqu tamata na Isireli; ka'u na taqomaki iko mai vei ira kece na kemu meca. Sa vakataudeitaka talega o Jiova vei iko ni na tauyavutaka ena vukumu o Jiova e dua na vale.

¹² Ena gauna o mate kina ka la'ki bulu vata kei ira na nomu qase, au na vakayacora me tui e dua vei ira na luvemu tagane, ka vakataudeitaka na nona matanitu.

¹³ O koya oqo ena qai tara na noqu vale, ka'u na vakataudeitaka na veiliutaki vakatui ni nona kawa ka tawa mudu.

¹⁴ Au na tamana oi au, ka na luvequ o koya. Kevaka sa kitaka na ca, au na cudruvi koya me vaka sa kanakuitataki luvena e dua na tama.

¹⁵ Ia au na sega ni kauta tani mai vua na noqu yalololoma, me vaka ka'u a vakayacora vei Saula, o koya ka'u a vakasivoya me yaco rawa kina mo tui.

¹⁶ Na nomu mataqali kei na nomu matanitu ena vakataudeitaki e mataqu, ka sega ni oti. Ena vakataudeitaki ka tawa mudu na nomu i tikotiko vakatui.’ ”

¹⁷ A sa tukuna vei Tevita o Necani na veivosa kecega oqo me vaka na nona raivotu.

Masu ni Vakavinavinaka i Tevita

¹⁸ A sa curu yani o Tevita na tui ki na loma ni Valelaca i Jiova, ka dabe sobu, ka cavuta na vosa oqo ni sa masu, “Oi kemuni na Turaga o Jiova, sa sega sara ni kilikili kaya kei au se ki na noqu matavuvale na veika o ni sa vakayacora oti oqo vei au.

¹⁹ Ia sa ka levu tikoga na veika o ni sa cakava, kemuni na Turaga o Jiova; ka o ni sa vosa ni yalayala oti me baleta na noqu kawa ena i tabatamata mai muri. Ka o ni sa vakatara me raica na tamata na ka oqo, kemuni na Turaga o Jiova!

²⁰ A cava tale beka me'u na kaya vei kemuni? O ni sa kilai au vinaka, oi au na nomuni tamata.

²¹ Ena vuku ni nomuni vosa ni yalayala, me vaka na lomamuni, o ni sa vakayacora kina na veika lelevu kecega oqo me vakatavulici au.

²² I Jiova na Kalou levu, o ni sa rui levu ka dokai! Sa sega tale ni dua me tautauvata kei kemuni; io keimami sa kila ni o kemuni duadua ga sa Kalou.

²³ Sa sega ni dua tale na matanitu e vuravura me vakataki Isireli, o ira o ni a vakabula mai na veivakabobulataki, ka qai okati ira me ra nomuni tamata. Na veika lelevu ka cecere o ni a vakayacora vei ira sa vakarogoya na yacamuni ena vuravura taucoko. O ni a vagalalataki ira na kai matanitu tani kei na nodra kalou ni ra sa toso yani na nomuni tamata, o ira o ni a vagalalataki ira mai Ijipita me ra sa nomuni.

²⁴ O ni sa vakataudeitaki Isireli me ra sa nomuni tamata ka tawa mudu, kei kemuni Jiova, o ni sa nodra Kalou.

²⁵ Ia oqo, kemuni Jiova na Kalou, mo ni vakadeitaka ka tawa mudu na vosa o ni a cavuta ena vukuqu kei na noqu mataqali, ka vakayacora vakakina me vaka o ni sa yalataka.

²⁶ Ena tubu vakalevu sara na kemuni i rogorogo, ka ra na kaya na tamata, ‘O Jiova na Kalou Cecere sa nodra Kalou na Isireli’; ka na yaco me vakataudeitaki vakadua e matamuni na veiliutaki ni kawa nei nomuni tamata o Tevita.

²⁷ Kemuni Jiova na Kalou Cecere, na nodra Kalou na Isireli! Sa doudou na yaloqu me'u cavuta na masu oqo vei kemuni baleta ni o ni sa vakatakila oti na ka kece oqo vei au na nomuni tamata, ka o ni sa tukuna oti ni ra na yaco me ra tui na noqu kawa.

²⁸ Ia oqo, kemuni na Turaga Jiova, sai kemuni na Kalou; ka sa dina na nomuni vosa, ka o ni sa yalataka na ka vinaka oqo vei au na nomuni tamata.

²⁹ Ia mo ni qai yalololoma mai ka vakalougatataka na noqu kawa me rawa kina ni ra sotava tikoga na nomuni veivakarautaki ena veigauna taucoko. Sai koya oqo na nomuni vosa ni yalayala, kemuni na Turaga o Jiova, ka me na sobuti ira na noqu kawa na nomuni veivakalougatataki me tawa mudu.”