2 Samuela 6 - Vakavakadewa Vou kei na iVola tale eso

Kau ki Jerusalemi na Kato ni Veiyalayalati

¹ A sa vakasoqoni ira vata na nona sotia digitaki e Isireli o Tevita, era lewe 30,000 na tagane.

² Sa qai liutaki ira yani ki Beala mai Juta me ra la'ki kauta mai na Kato ni Veiyalayalati, ka sa vakayacani ena yaca i Jiova ni lewevuqa, o koya sa tiko ena kedrau veimama na jerupi.

³ Era a vakavodoka na Kato ni Veiyalayalati ki na dua na qiqi ni yaya vou, ka ra kauta tani mai na vale i Amenatave, ka toka ena delana mai Qibea.

⁴ E rau a vakauta tiko na qiqi ni yaya vou ka vodo tiko kina na Kato ni Kalou o rau o Usa kei Eio na luve i Amenatave.

⁵ Ia a tabalaka na lagalaga sere kei na mekemeke ena mata i Jiova o Tevita kei ira kecega na mataqali i Isireli, ena i qiriqiri vaka wa, na api na soliteri, na tibereli, na sibali kei na kasitaneti.

⁶ Ni ra yaco yani ki na rara ni samu sila nei Nakoni, a tarabe na bulumakau ka dreta tiko na qiqi ka vakavuna oqo me tara yani na Kato ni Veiyalayalati o Usa baleta ni sa yavalati.

⁷ A sa waqa na cudru katakata i Jiova vei Usa ka mokuti koya e kea baleta ni sa cala ena nona a dodoka na ligana ka tara na Kato ni Veiyalayalati. A sa mate mai kea o Usa ena yasa ni Kato ni Veiyalayalati.

⁸ A sa rarawataka o Tevita na nona vakamatei Usa o Jiova ena dela ni cudru, ka sa vakayacani na vanua o ya me o Peresi Usa me yacova na siga oqo.

⁹ A sa rerevaki Jiova o Tevita ena siga o ya, ka kaya, “Ena kau rawa mai vakacava vei au na Kato ni Veiyalayalati?”

¹⁰ A sega soti ni guta o Tevita me kauta na Kato ni Kalou ki Jerusalemi; ia, sa qai kauta vakatikitiki ga ki na vale i Opeti Itomi na kai Kaca.

¹¹ A tiko na Kato ni Veiyalayalati ena vale i Opeti Itomi na kai Kaca me vula tolu na kena dede. A vakalougatataki Opeti Itomi o Jiova kei ira kecega na nona lewe ni vale.

¹² A tukuni vei Tevita na tui, ka vaka, “Sa vakalougatataka o Jiova na vuvale i Opeti Itomi kei na veika kecega e taukena ena vuku ni Kato ni Kalou.” A lako o Tevita ka la'ki kauta cake na Kato ni Veiyalayalati ena yalo mamarau mai na vale i Opeti Itomi ki na koro i Tevita.

¹³ Ia ni qai ono ga na i kalawa era lakova na colata na kato ni Kalou, sa tarovi ira o Tevita me ra tu vakadua ka cabora e dua na bulumakau yadru kei na dua na luve ni bulumakau uro.

¹⁴ A qai tabalaka na meke o Tevita ena yalona taucoko me vakacaucautaki Jiova, ka sa vakaisulu ena dua na efoti lineni.

¹⁵ A kauta cake na Kato i Jiova o Tevita kei ira na mataqali kece e Isireli, ka ra sa kaila ena reki kei na uvu davui.

¹⁶ Ia ni sa yaco yani na Kato ni Veiyalayalati ki na Koro i Tevita, sa vakararai tu mai katubaleka o Mikali na luve i Saula, ka raici Tevita ni ladelade ka mekemeke voli ena mata i Jiova; ia sa sega ni taleitaki Tevita kina o koya.

¹⁷ Era a kauta na Kato i Jiova ka ra la'ki vakotora ki na kena i tikotiko, ena loma ni Valelaca ka birika tu o Tevita me tikori kina; sa qai vakacabora o Tevita eso na i soro kama kei na i soro ni veivinakati ena mata i Jiova.

¹⁸ Ni sa cabora oti o Tevita na i soro kama kei na i soro ni veivinakati, sa qai vakalougatataki ira na tamata ena yaca i Jiova ni lewe vuqa,

¹⁹ ka veivotayaka na kakana vei ira kece sara. A sa vota vua na tagane kei na yalewa yadudua e tau yadua na i buli madrai, e yadua na tiki ni lewe ni manumanu sa vavi oti, kei eso na keke sa waki vata kei na qerepi mamaca. Era a qai veisukayaki yani na tamata yadua ki na nona vale.

²⁰ A lesu o Tevita ki na nona vale me kidavaki iratou na lewe ni vuvale. A curu mai ki tuba o Mikali na luve i Saula me tavaki koya, ka kaya, “Sa dua na ka na levu ni nona vakacerecerei koya na tui Isireli e daidai, ena nona luvawale tu e matadra na vada dauveiqaravi me vaka sa luvata tu na nona i sulu e dua na tamata lialia!”

²¹ A sa kaya vei Mikali o Tevita, “Au a meke voli me'u vakacaucautaki Jiova, o koya sa digitaki au me'u liutaki ira Isireli, ka segai o tamamu kei ira na nona vuvale. Ia ka'u na meke tikoga ena marau me vakarokorokotaki kina o Jiova,

²² ka vakamaduataki au vakalevu cake sara. O sa nanuma beka ni'u sa rairai beci ka lolovira e matadra, ia o ira na vada dauveiqaravi o tukuna tiko era na raici au cake ena vakarokoroko!”

²³ A sega ni vakaluveni o Mikali na luve i Saula, me yacova na siga sa mate kina.