2 Samuela 5 - Vakavakadewa Vou kei na iVola tale eso

Buli o Tevita me Tui Isireli kei Juta

¹ Era a lako yani vei Tevita ki Epironi o ira na mataqali kece ga e Isireli, ka kaya vua, “O keimami oqo sa suimuni ka lewemuni dina.

² Ena veigauna e liu, ni a neimami tui o Saula, sai kemuni ga ka liutaki ira yani na Isireli ki na i valu, ka sa tukuna talega vei kemuni o Jiova mo ni vakatawani ira na nona tamata ka nodra i liuliu.”

³ Era a qai lako mai vua na tui mai Epironi o ira kecega na qase e Isireli. A sa veiyalayalati kei ira o Tevita, ka sa lumuti mai vei ira na qase me nodra tui na Isireli.

⁴ A yabaki tolusagavulu o Tevita ena gauna a buli kina me tui; ka tui tiko o koya me yabaki vasagavulu.

⁵ E a nodra tui tiko na Juta o ya mai Epironi me yabaki vitu ka vula ono; a nodra tui na Isireli kecega, kei ira na Juta mai Jerusalemi me yabaki tolusagavulu katolu na kena dede.

Buli me Koroturaga ni Matanitu Cokovata o Jerusalemi

⁶ A qai lako na tui kei ira na nona tamata ki Jerusalemi. Era a tiko e kea na Jepusaiti ka ra nanuma ni sega ni rawa vei Tevita me vakarusa na koro; ia era a qai kaya vua, “O na sega ni rawa ni curu mai ki ke, o ira sara mada ga na mataboko kei na lokiloki era rawa ni ra sabai iko tani.”

⁷ (Ia a sa ravuta o Tevita na koronivalu o Saioni ka liutaka, ka sa yaco edaidai me vakatokai na “Koro i Tevita”.)

⁸ A sa kaya vei ira na nona tamata o Tevita ena siga o ya, “O cei vei kemuni oqo e cati ira vakalevu na Jepusaiti me vakataki au? Me rawa ni vakamatei ira? Dou qai lakova cake na i keliwai ka ravuti ira na mataboko kei ira na lokiloki.” (O koya oqo a dau kainaki kina, “Era na sega ni curu ki loma ni vale o ira na mataboko kei na lokiloki.”)

⁹ A tiko o Tevita ena koro ni valu o ya, ka vakatoka, “Na koro i Tevita.” A tara wavoki na koro o Tevita me vakatekivu mai Milo, ka kauta ki loma.

¹⁰ A levu cake tikoga na i tutu cecere i Tevita, ka yaco sara, ni sa totaki koya o Jiova na Kalou ni lewe vuqa.

¹¹ A talai ira eso na tamata o Irami na tui Taia vei Tevita; era sa kauta yani eso na kau sitari, eso na tamata cakacaka vakamatai, kei ira eso na daubuli vatu me ra tara na valenitui.

¹² A sa raica ka kila o Tevita ni sa vakataudeitaki koya o Jiova me nodra tui na Isireli, ka sa vakasaututaka na nona matanitu ena vukudra na nona tamata.

¹³ A sa tauri ira mai Jerusalemi o Tevita eso tale na watina lalai kei na vica tale na watina mai na gauna a biuti Epironi kina; ka sucu tale e vuqa na luvena tagane kei na luvena yalewa.

¹⁴ Ia oqo o ira na luvena era a sucu mai Jerusalemi: o Samua, kei Sopapi, kei Necani, kei Solomoni,

¹⁵ kei Ipiari, kei Ilisua, kei Nefeki, kei Jefia,

¹⁶ kei Ilisama, kei Elaiata, vata kei Ilifeleti.

Na Rawati ni Qaqa vei Ira na Filisitia

¹⁷ Ia ni ra rogoca na kai Filisitia ni sa lumuti o Tevita me nodra tui na Isireli, era a lako cake na sotia ni Filisitia me vesuki koya. Ia sa rogoca oqo o Tevita ka sa lako sobu ki na vanua ni veitaqomaki vakaivalu.

¹⁸ Era a lako mai na kai Filisitia, ka ra tuvai ira vakaivalu ena buca o Refeimi.

¹⁹ E a qai tarogi Jiova o Tevita, ka kaya, “Me'u lako cake li vei ira na kai Filisitia, se me'u kakua? O ni na soli ira li ki na ligaqu, se segai?” A sauma lesu vei Tevita o Jiova ka kaya, “Mo lako cake ga, ni'u sa soli ira vakaidina na kai Filisitia ki ligamu.”

²⁰ A sa lako o Tevita ki Peali Pirasimi, ka vakamalumalumutaki ira na kai Filisitia mai kea. A sa kaya, “Sa botei ira na noqu meca e mataqu o Jiova me vaka sa coka na dobui.” O koya oqo, a vakayacana kina na tikina o ya me o Peali Pirasimi.

²¹ Ni ra sa dro tani na kai Filisitia, era a biuta tu e kea na nodra veimatakau, ka mani kauta tani yani o Tevita kei ira na nona tamata.

²² Era a mani lesu tale mai na kai Filisitia, ka taura lesu na buca o Refeimi.

²³ Sa qai tarogi Jiova tale o Tevita, ka i sau ni nona taro e vakaoqo, “Mo kakua ni valuti ira eke, ia mo lako wavokiti ira ga mai dakudra ka valuti ira ni o sa donuya na veivunikau ni saluwaki boi vinaka.

²⁴ Ia ni o rogoca na domo ni cavu yava ena tuvuka ni veikau oqori, mo qai valuti ira baleta ni'u sa liu tiko vei iko me'u vakadrukai ira na sotia ni Filisitia.”

²⁵ A kitaka vakakina o Tevita, me vaka a vakarota vua o Jiova, ka ravuti ira na kai Filisitia me vakatekivu mai Kipa ka yaco sara ki Keseri.