2 Samuela 4 - Vakavakadewa Vou kei na iVola tale eso

Na Labati nei Isiposeci

¹ Ia ni rogoca o Isiposeci na luve i Saula ni a mate o Epineri mai Epironi, a sa tarai koya na rere ka ra kidroa talega kina o ira kece na tamata e Isireli.

² E rau lewe rua tiko na nona tamata na luve i Saula e rau turaganivalu ni nona mataivalu; na yacadrau o Peana kei Rekapi, ka rau luve i Rimoni na kai Penijamini mai Pieroci. (E kilai tale tu ga o Pieroci ni ra kai Penijamini.

³ Era a dro ki Kiteimi na kai Pieroci; era a tiko vulagi kina ka yacova na gauna oqo.)

⁴ O Jonacani na luve i Saula, e dua tiko na luvena ka lokiloki tu na yavana ruarua. A sa yabaki lima tiko o koya ena gauna a kau yani kina mai Jesireli na i tukutuku baleti Saula kei Jonacani. E a keveti koya cake na nona yalewa meimei, ka drotaki koya yani; ia ena nona dro tiko vakatotolo o ya sa mani vakalutuma na gone, ka lokiloki sara kina o koya. Ia na yaca ni gone o ya o Mefiposeci.

⁵ A rau sa lako o Rekapi kei Peana na luve i Rimoni na kai Pieroci, ka rau tadu yani ki na vale i Isiposeci ni donumaka na katakata tu na siga ena sigalevu, ni a vakacegu koto o koya.

⁶ E rau a raica sara ni vakacagina witi tiko na yalewa dauveiqaravi, ka a mani sosovu sara ka moce; e rau a mani mai curu lo yani ki vale o Rekapi kei Peana na tuakana.

⁷ Ia ni rau curu yani ki vale, a rau sa lako ki na rumu ni moce nei Isiposeci, ni sa moce lutu koto, ka rau vakamatei koya. A rau sa qai tamusuka laivi na uluna, ka taura mai, ka muria mai na Buca o Joritani ena nodrau taubale mai ena bogi taucoko.

⁸ A rau sa kauta yani na ulu i Isiposeci ki Epironi vei Tevita na tui, ka kaya vua, “Oqori na ulu i Isiposeci, na luve i Saula na kemuni meca, o koya sa tovolea me vakamatei kemuni. Sa vakatara vei kemuni edaidai o Jiova mo ni sausaumi lesu vei Saula kei na nona kawa.”

⁹ A sa tukuna o Tevita vei Rekapi kei Peana na tuakana, o rau na luve i Rimoni na kai Pieroci, “Au sa vosa bubului ena vuku i Jiova, o koya sa bula ka taqomaka na noqu bula mai na veileqa kecega!

¹⁰ Na tamata ka a mai tukuna vei au na mate i Saula mai Sikilaki sa nanuma ni a kauta tiko mai na i tukutuku vinaka. Ia au a qai tauri koya ka vakamatei koya. Sai koya o ya na i cocovi ka'u solia vua me baleta na nona i tukutuku.

¹¹ Ia ena qai vakacava li na bibi cake ni totogi vei ira na tamata ca era vakamatea e dua na tamata ni moce vakadodonu tu ena nona loma ni vale! Au na sauma lesu vei kemudrau oqo ena vuku ni nomudrau vakamatei koya ka'u na vaqeyavutaki kemudrau mai na dela ni vuravura?”

¹² A vakaroti ira na nona cauravou o Tevita me ra vakamatei rau o Rekapi kei Peana, ka muduka tani na ligadrau kei na yavadrau, ka vakaliligi rau ena tutu ni mataniwai mai Epironi. Ia era sa kauta na ulu i Isiposeci, ka buluta ena i bulubulu qara vatu i Epineri mai Epironi.