2 Samuela 3 - Vakavakadewa Vou kei na iVola tale eso

¹ Era a vala vakadede sara na vuvale i Saula kei ira na vuvale i Tevita; ka tubu cake me kaukauwa tikoga mai o Tevita, ka ra malumalumu sobu tikoga na vuvale i Saula.

Ira na Luve i Tevita Tagane

² Era a sucu mai Epironi, eso na luve i Tevita tagane ka nona ulumatua o Amoni, ka tinana o Einoami na yalewa ni Jesireli,

³ kei na kena i karua o Kiliavi, ka tinana o Avikali, na yalewa ni Kameli, na yada i Nepali; kei na kena i katolu o Apisalome na luve i Meka na luve i Talimei na tui Kesuri;

⁴ kei na kena i ka va o Atonaija na luve i Akici, kei na kena i kalima o Sefataia, na luve i Avikali;

⁵ kei na kena i kaono o Iciriami, na tinana o Ekila na wati Tevita. O iratou oqo na luve i Tevita, ka ra sucu mai Epironi.

⁶ Ia ni ra a vala tiko na vuvale i Saula, kei na vuvale i Tevita, a vakataudeitaki koya o Epineri me kaukauwa ena vuvale i Saula.

⁷ Ia e dua tiko na wati Saula e watina lailai o Risipa na yacana, na luve i Aia; a kaya vei Epineri o Isiposeci, “A cava li o mocera kina na wati tamaqu?”

⁸ A cudru katakata o Epineri, ena vuku ni vosa i Isiposeci, ka kaya vua, “Oi au beka na ulu ni koli i Juta? A caka vinaka tiko ena gauna oqo ki na vuvale i Saula na tamamu, kei iratou na tacina kei na wekana, ka sega ni soli iko yani ki na liga i Tevita; ia o beitaki au edaidai ni'u cala ena vuku ni yalewa o ya?

⁹ Me cakacaka vakakina na Kalou vei Epineri, ka vakaikuritaka talega kevaka au sega ni cakava vei Tevita me vaka sa bubului kina vua o Jiova;

¹⁰ me tokia na matanitu mai na vuvale i Saula, ka me vakatura cake na i tikotiko vakaturaga i Tevita me lewai ira na Isireli kei ira na Juta, me vakatekivu mai Tani me yaco sara yani ki Perisepa.”

¹¹ A sega ni vosa rawa tale vei Epineri o Isiposeci, ni a rerevaki koya.

¹² A tala o Epineri eso na mata vei Tevita mai Epironi, ka kaya, “O cei li e nona na vanua? Me daru cakava mada e dua na veiyalayalati, ka'u na vukei iko ena nodra vakalesui kece mai na Isireli vei iko.

¹³ A sa kaya o Tevita, “Sa donu vinaka; au na veiyalayalati kei iko; ia e dua ga na ka au vinakata mo cakava, o ya mo kauti Mikali mai na luve i Saula yalewa ena nomu lako mai mo mai raici au.”

¹⁴ A sa tala eso na tamata o Tevita vei Isiposeci na luve i Saula, ka kaya, “Mo solia mai na watiqu o Mikali. Au a sauma ena dua na drau na vusodra na kai Filisitia me rawa ni'u vakawatitaki koya kina.”

¹⁵ A sa veitalaki o Isiposeci ka sa kau mai o Mikali mai vua na watina o Paliteli na luve i Leisi.

¹⁶ Ia sa vakamumuri ga o Paliteli na watina, ka tagi voli ena gaunisala me yaco sara ki Peurimi. A qai kaya vua o Epineri, “Mo lesu tale ki nomu vale!” A sa lesu yani o Paliteli.

¹⁷ A veivosaki kei ira na qase ni Isireli o Epineri, ka kaya, “Ena vica na gauna sa oti yani, o ni a qarai Tevita me nomuni tui.

¹⁸ Ia oqo, mo ni vakayacora; me vaka ni a yalataka o Jiova vei Tevita, ka kaya, ‘Ena liga i Tevita na noqu tamata, au sa vakabulai ira kina na noqu tamata na Isireli mai na ligadra na kai Filisitia, kei na ligadra na kedra meca kecega.’

¹⁹ A vosa talega o Epineri vei ira na Penijamini; ka lako talega ki Epironi me vosa vei Tevita ena veika kecega a nanuma ni vinaka vei ira na Isireli kei ira na Penijamini.

²⁰ Ni sa lako mai vei Tevita ki Epironi o Epineri kei na nona tamata era lewe ruasagavulu, a sa vakarautaka o Tevita e dua na kedra magiti.

²¹ A sa kaya vei Tevita o Epineri, “Au na tucake ka lako, ka vakasoqoni ira vata kecega na Isireli vua na noqu turaga na tui, ka me caka na veiyalayalati kei kemuni, mo ni lewai ira kecega sa vinakata na yalomuni.” A talai Epineri yani o Tevita; a lako yani ena vakacegu o koya.

Vakamatei Epineri o Joape

²² Ia ena gauna vata o ya, era a qai suka mai ena i valu o ira na tamata i Tevita kei Joape, a levu sara na i toki era a kauta mai; a sega ni tiko kei Tevita mai Epironi o Epineri, ka ni a talai koya yani ena vakacegu.

²³ Ia ni lako mai o Joape, ka vaka, “A lako mai vua na tui o Epineri na luve i Neri, a talai koya yani na tui me lako ga ena vakacegu.”

²⁴ A lako vua na tui o Joape, ka kaya vua, “A cava o sa cakava? Raica, a lako mai vei kemuni o Epineri; a cava li o ni a talai koya yani kina vaka o ya?

²⁵ O sega li ni kila ni a lako mai o Epineri, na luve i Neri, me vakacalai kemuni, me kila na nomuni veilakoyaki, kei na veika kecega o ni a cakava?”

²⁶ Ia ni a lako tani mai vei Tevita o Joape, a qai tala o koya eso na tamata me ra muri Epineri, me ra la'ki vakalesui koya mai na mata ni wai mai Sira, sa sega ni kila na ka oqo o Tevita.

²⁷ Ia ni lesu mai ki Epironi o Epineri, a qai kauti koya vakatikitiki ki na matamata ni koro o Joape, me vosa vua, a cokai koya mai kea e ketena, a mate kina o Epineri, me'i sau ni dra i Asaeli na tacina.

²⁸ Ia ni rogoca o Tevita, na i tukutuku, a kaya, “Au sa sega ni cala ka tawa mudu o au kei na noqu matanitu ena mata i Jiova ena vuku ni dra i Epineri na luve i Neri.

²⁹ Me lutuka mada ga na ulu i Joape, kei na vuvale taucoko i tamana; ia me kakua mada ga ni dua na gauna me sega kina ni dua ena vuvale i Joape na tamata sa turu dra balavu, se na vukavuka, se e dua sa vakaititoko voli, se e dua e bale ena i seleiwau, se e dua sa dravudravua ena kakana.”

³⁰ E rau a vakamatei Epineri o Joape kei na tacina o Avisai, me i sau ni dra i tacidrau o Asaeli ena i valu mai Kipioni.

³¹ A vosa o Tevita vei Joape, kei ira kecega era tu vata, ka vaka, “Mo ni dresulaka na nomuni i sulu, ka tokara na i sulu taga, ka tagicaki Epineri.” A muria na tavata o Tevita na tui.

³² Era a buluti Epineri mai Epironi; a tagi vakadomoilevu na tui mai na i bulubulu i Epineri ka vaka talega kina o ira kecega na tamata.

³³ A sa tagicaki Epineri na tui ena sere oqo: A cava sa mate kina o Epineri me vaka e dua na tamata lialia?

³⁴ A sa sega ni vesuki na ligana, A sa sega ni vesuki na yavana; A sa mate ga me vaka e dua sa vakamatei mai vei ira na tamata ca!” Era sa qai tagicaki koya tale o ira kecega na tamata.

³⁵ Ena siga taucoko o ya era a tovolea na tamata me ra vakamasuti Tevita me kania e dua na kakana, ia sa vosa bubului ga o koya ka kaya, “Me qai yaco ga vei au na veivakarusai ni Kalou kevaka au sa kania e dua na ka ni se bera ni oti na siga edaidai.”

³⁶ Era a vakasamataka na tamata kecega na ka oqo ka yalo vakacegu kina. Ni sa dau vakalomavinakataki ira na tamata na veika kece sara e dau vakayacora na tui.

³⁷ Era a kila o ira kecega na tamata kei ira kece na Isireli ena siga o ya ni a sega ni vuna na tui na mate i Epineri, na luve i Neri.

³⁸ A sa kaya na tui vei ira na nona vakailesilesi, “Dou sega beka ni kila ni a bale edaidai e dua na i liuliu rogo ka kilai e Isireli?

³⁹ E dina ga ni sa digitaki au na Kalou me'u tui, sa dua na malumalumu sa yacovi au ga edaidai. O iratou na luvei Seruwaia oqo eratou sa rui tamata voravora vei au. Me qai sauma ga o Jiova na caka ca oqo me vaka sa veiganiti kaya!”