2 Samuela 24 - Vakavakadewa Vou kei na iVola tale eso

Veretaki o Tevita

¹ A cudruvi ira tale na Isireli o Jiova, a vakauqeti Tevita o koya, ka vaka, “Mo la'ki wiliki ira na Isireli kei ira na Juta.”

² A sa kaya na tui vei Joape, kei ira na kavetani ni valu era sa tu vata, “Mo lako mada vei ira na veimataqali kecega ni Isireli, mai Tani ka yacovi Perisepa, ka wiliki ira na tamata me'u kila na kedra i wiliwili.

³ A qai vosa vua na tui o Joape ka kaya, “Me vakaikuritaka vakadrau o Jiova na nomuni Kalou na kedrai i wiliwili na tamata, me raici ira talega o koya na noqu turaga na tui; ia ka cava li o ni vinakata kina na ka oqo noqu turaga na tui?

⁴ Ia a gumatua na nona vosa na turaga na tui vei Joape kei ira talega na turaganivalu. A lako tani mai vua o Joape kei ira na turaganivalu me ra wiliki ira na tamata, e Isireli.

⁵ Era a kosova na Joritani ka la'ki keba voli ena ceva kei Aroeri, o ya na koro levu ka koto e lomadonu ni buca ena vanua o Kata. Mai kea, era sa qai lako vaka ki na vualiku ki Jaseri,

⁶ ka lako yani ki Kiliati me la'ki yaco sara ki Ketesi ena nodra vanua na Itaiti. Mai kea, era sa qai lako ki Tani, ka lako vaka ki na ra me yaco ki Saitoni.

⁷ Era sa qai lako vaka ki na ceva ki na koro levu sa vakabai o Taia, kei na nodra veikoro kecega na Aivaiti, kei ira na kai Kenani, ka yaco sara ki Perisepa ena ceva kei Juta.

⁸ A sa oti e ciwa na vula ka ruasagavulu na siga ka ra sa qai lesu ki Jerusalemi, ni ra sa lakova na veivanua kece sara.

⁹ A sa vakadewataka o Joape vua na tui na kedra i wiliwili na tamata ni valu: era lewe 800,000 e Isireli, ka ra lewe 500,000 e Juta.

¹⁰ Ni ra wiliki oti na tamata, a vakatekivu me beitaki Tevita na yalona. A sa kaya vei Jiova o Tevita, “Au sa vakayacora na i valavala ca levu mai na ka au sa cakava oqo. Kemuni Jiova, au vakamasuti kemuni mo ni yalololoma ka vosota na noqu cala; ni'u sa cakava na ka lialia sara.”

¹¹ Ni sa yadra cake o Tevita ena mataka, a sa yaco yani na vosa i Jiova vei Kata, na parofita i Tevita. A sa kaya vakaoqo,

¹² “Mo la'ki tukuna vei Tevita ni sa vosa vakaoqo o Jiova. E tolu na ka au sa cavuta vei iko; ia mo digitaka e dua me'u vakayacora vei iko.”

¹³ A sa lako vei Tevita o Kata ka kaya vua na veika sa vosa kina o Jiova, ka taroga, “O cei vei iratou na tolu oqo? Me na tolu li na yabaki me na yacovi iko tiko kina na dausiga ena nomu vanua? Se mo dro e matadra na kemu meca ka me vula tolu na dede ni nodra vakasavi iko tiko? Se me bogi tolu na mate levu ena nomu vanua? Ia mo vakasamataka mada na veika oqo, ka qai tukuna lesu mai vei au na nomu i sau me'u kauta tale vua sa talai au mai.”

¹⁴ A sa kaya vei Kata o Tevita, “Au sa taqaya vakalevu; me da lutu ga ki na qeteqete ni liga i Jiova, ni sa levu na nona yaloveivosoti; ia me'u kakua ga ni lutu ki na liga ni tamata.”

¹⁵ A vakayacora o Jiova na mate levu me vakatekivu ena mataka o ya, ka yacova na gauna a lokuca; era a mate e lewe 70,000 na tamata mai Tani ka yaco ki Perisepa.

¹⁶ Ia ni sa dodoka na ligana na agilosi vaka ki Jerusalemi me vakarusa, a qai veivutuni o Jiova ena vuku ni nodra vakatotogitaki na tamata, a kaya vua na agilosi ka vakarusai ira tiko na tamata, “Sa rauta oqo; mo tarova na ligamu.” A tu na agilosi i Jiova ena rara ni samu sila nei Arauna na Jepusaiti.

¹⁷ Ia ni raica o Tevita na agilosi a mokuti ira tiko na tamata, sa qai tukuna vei Jiova, “Mo ni raica, sai au ga ka a caka cala; io, ka'u a kitaka na ka ca. Ia na cala cava li era sa cakava na tamata vakaloloma oqo? Me tauci ga vei au kei na noqu matavuvale na nomuni cudru.”

Cabocabonisoro

¹⁸ Ena siga vata o ya, sa lako kina vei Tevita o Kata ka kaya vua, “Mo lako cake ki na rara ni samu sila i Arauna na Jepusaiti, ka mo vakacabora na nomu i soro vei Jiova e kea.”

¹⁹ A lako cake o Tevita me vaka na vosa i Kata, me vaka a vakarota o Jiova.

²⁰ A vakararai voli o Arauna ka raica na tui kei ira na nona tamata ni ra cabe cake tiko yani vua. A lako yani o Arauna, ka cuva vakatoboicu ki na qele vua na tui.

²¹ A sa kaya o Arauna, “A cava o ni sa lako mai kina na noqu turaga na tui vua na nomuni tamata?” A sa kaya o Tevita, “Me'u volia vei iko na rara ni samu sila me'u cakava kina e dua na i cabocabonisoro vei Jiova, me mudu kina na mate levu vei ira na tamata.”

²² A sa kaya vei Tevita o Arauna, “Mo taura ga na noqu turaga na tui, ka cabora na ka e vinaka vua; oqori na bulumakau me i soro kama, ia mo ni qai taura na i yaya ni samu sila kei na i vua ni bulumakau me kena buka.

²³ A veika kecega oqo sa solia vakaturaga o Arauna vei kemuni na tui.” A qai kaya tale o Arauna vua na tui, “Me yalololoma vei kemuni o Jiova na nomuni Kalou ka ciqoma na nomuni i soro.”

²⁴ A sa kaya vei Arauna na tui, “E sega, au na solia vakaidina vei iko na kena i sau; ia au na sega ni vakacabora vei Jiova na noqu Kalou na i soro kama e rawa wale ga.” A volia o Tevita na rara ni samu sila kei na bulumakau ena 50 na tiki ni siliva.

²⁵ A cakava mai kea o Tevita na i cabocabonisoro vei Jiova ka vakacabora kina eso na i soro kama, kei na i soro ni veivinakati. A sa rogoca o Jiova na nona masu ena vuku ni vanua, ka sa mudu na mate levu vei ira na Isireli.