2 Samuela 22 - Vakavakadewa Vou kei na iVola tale eso

Na Sere ni Vakavinavinaka i Tevita

¹ Ena siga sa vakabulai Tevita kina o Jiova mai na ligadra na nona meca kecega kei na liga i Saula, sa qai lagata kina o Tevita na qaqa ni sere oqo vei Jiova:

² A noqu uluvatu o Jiova; Sa i koya ga na noqu bai kaukauwa.

³ Na noqu Kalou sa dau taqomaki au, ka'u sa vakarurugi vua. Sa dau taqomaki au me vaka na i sasabai; A noqu bai kaukauwa ka noqu i vunivuni o koya. O koya sa noqu i vakabula; sa maroroi au ka vueti au mai na i tovo kaukauwa.

⁴ A voqa yani na noqu kaci vei Jiova, o koya sa kilikili me vakacaucautaki, Ka'u sa vakabulai mai vei ira na kequ meca. Me lagiti o Jiova!

⁵ Sa vakavolivoliti au na biau ni mate; Ka sa ologi au na ua ni veivakacacani.

⁶ Sa vakavivigi au na i vesu nei bulubulu, Ka sa tu e mataqu na i cori ni mate.

⁷ Ena dela ni noqu rarawa, au a tagi vei Jiova; Ka kaci veivuke vua na noqu Kalou. A sa rogoca na domoqu mai na nona vale tabu, Ka vagolea na daligana ki na noqu tagi ni kere veivuke.

⁸ Sa qai yavavala na vanua ka sautaninini; Sa kureitaki na vu ni lomalagi Ka sa uneune, baleta ni sa cudru o koya.

⁹ Sa kuvu cake na kubou mai ucuna, Ka caudre mai gusuna na bukawaqa Kei na qilaiso katakata.

¹⁰ Sa basuka na lomalagi ka siro sobu mai, Kei na o butobuto ena ruku ni yavana.

¹¹ A sa vuka vakatotolo ena nona jerupi; Ka veitosoyaki voli ena taba ni cagi.

¹² A sa solegi koya ena butobuto; Sa viribaiti koya na o loaloa vavaku suasua;

¹³ Ka caudre cake mai na qilaiso waqa ena livaliva sa koto e matana.

¹⁴ Sa kurukuru mai lomalagi o Jiova, ka sa rogo cake na domo i Koya sa Cecere Sara.

¹⁵ A sa vanataka na nona gasau ni dakaititi ka ra veiseyaki kina na meca; sa vakacicivi ira ena tibi ni livaliva.

¹⁶ Sa rairai na dreke ni wai ni wasa liwa, Ka sa vakavotui mai na yavu ni vuravura, Ni sa vunauca o Jiova, Ni sa tasoro na i cegu mai na ucuna.

¹⁷ “A sa tatara mai cake o Jiova, ka tauri au, Sa vueti au o koya mai na wasawasa e vuqa.

¹⁸ Sa vakabulai au mai vei ira na kequ meca kaukauwa, Mai vei ira kece sa cati au — Ni ra sa rui kaukauwa cake vei au.

¹⁹ Ni'u a tiko leqa, era sa vakasosataki au, Ia sa taqomaki au ga o Jiova.

²⁰ Sa vukei au ena veileqa eso; Sa vakabulai au, ni sa dau vinakati au.

²¹ “Sa sauma vei au o Jiova ni'u sa daucaka dodonu; Sa vakalougatataki au ni sa sega na noqu cala.

²² Au sa talairawarawa ki na lawa i Jiova; Au se sega ni vuki tani mai vua na noqu Kalou.

²³ Ni sa tu ga e mataqu na nona lawa kecega, Ka'u sega ni gole tani mai na nona i vakaro.

²⁴ Sa kila o koya na dodonu ni yaloqu, Ni'u sa dau maroroi au mai na caka ca.

²⁵ O koya oqo sa sauma kina vei au o Jiova Me vaka na noqu i valavala dodonu, Ni sa kila na savasava ni lomaqu.

²⁶ I Jiova, o ni sa dau yalodina vei ira sa dau yalodina vei kemuni, Ka dau vinaka vei ira sa vinaka sara.

²⁷ O ni sa cakacaka vakayalododonu vei ira sa yalododonu, Ia sa veisaqasaqa ga kei ira sa dauloma ca.

²⁸ O ni sa dauvakabulai ira era sa yalomalumalumu, Ia o ni sa vakamalumalumutaki ira ga era sa viavialevu ka dokadoka.

²⁹ Oi kemuni Jiova na noqu vu-ni-rarama; O ni sa vakararamataka na noqu butobuto.

³⁰ O ni sa dau ia na veivakaukauwataki Me'u ravuti ira rawa kina na kequ meca, Ka rawa na nodra sasaga ni tataqomaki.

³¹ Na Kalou oqo sa vinaka vakaoti na nona i valavala, Sa vakadinati sara na nona vosa! Ni sa vaka na i sasabai o koya Vei ira sa gadreva na nona veimaroroi.

³² Sa Kalou duadua ga o Jiova; Sa noda i sasabai ga na Kalou.

³³ Sa noqu bai kaukauwa ga na Kalou oqo; Sa taqomaka na noqu i lakolako o koya.

³⁴ Sa bulia me dei na yavaqu me vaka na dia; Sa maroroi au vinaka ena veidelana.

³⁵ Sa vakavulici au ena veika vakai valu, Me'u rawa ni'u vanataka kina na dakaititi kaukauwa sara.

³⁶ I Jiova, o ni sa taqomaki au ka vakabulai au; Na nomuni veivuke loloma sa laveti au cake.

³⁷ O ni sa maroroi au me'u kakua ni vesu, Ka'u se sega vakadua ni bale.

³⁸ Au a vakasasataki ira na kequ meca ka vakadrukai ira; Au a sega sara ni cegu me yacova ni'u sa vakarusai ira.

³⁹ Au a mokuti ira ka ra sega ni tucake tale; E a sa sega ni tucake rawa tale; Io, era sa bale sobu ena ruku ni yavaqu.

⁴⁰ O ni sa vakaukauwataki au ena i valu Kei na noqu qaqa vei ira kequ meca.

⁴¹ O ni sa vukici ira na kequ meca me ra dro tani mai vei au, Me'u vakarusai ira era sa cati au.

⁴² Era sa kere veivuke voli, ka sa sega e dua me vakabulai ira, era tagi vei Jiova, ka sega ni vosa vei ira o koya.

⁴³ Au sa butuqaqi ira, ka ra sa vaka na kuvu ni qele; Ka'u sa butubutuki ira me vaka na soso e gaunisala.

⁴⁴ O ni sa vakabulai au mai vei ira na noqu tamata veilecayaki Ka maroroya na noqu veiliutaki ena veimatanitu; Era sa yaco me noqu tamata o ira ka'u a sega ni kilai ira tu eliu.

⁴⁵ Era sa vakarokorokotaki au na vulagi; Ni ra sa rogoci au, era sa talairawarawa sara.

⁴⁶ Era sa yalolailai na vulagi; Era sa lako rerere mai na nodra i vunivuni.

⁴⁷ Sa bula o Jiova! Sa cecere na noqu uluvatu! Kacivaka na cecere i koya na Kalou kaukauwa sa vakabulai au!

⁴⁸ Sa solia vei au na qaqa vei ira na kequ meca; Ka vakamalumalumutaki ira na veivanua e rukuqu

⁴⁹ Ka kauti au tani mai vei ira na noqu meca. I Jiova, o ni sa solia vei au na qaqa vei ira sa saqati au, Ka taqomaki au mai vei ira na tamata i tovo kaukauwa.

⁵⁰ O koya oqo ka'u sa vakacaucautaki kemuni kina Ena kedra maliwa na veivanua; Ka seretaka na yacamuni.

⁵¹ Na Kalou sa solia na qaqa vua na nona tui; Sa solia na nona loloma tudei vua na nona i lumuti, Io, vei Tevita kei na nona kawa me tawamudu.”