2 Samuela 21 - Vakavakadewa Vou kei na iVola tale eso

Era sa Vakamatei na Kawa i Saula

¹ E a yaco e dua na dausiga levu ena gauna ni veiliutaki vakatui i Tevita, ka tolu na yabaki veitaravi na kena dede. A sa masuti Jiova kina o koya. A qai kaya vua o Jiova, “E a cala ena laba o Saula kei ira na nona matavuvale, ena nodra a vakamatei ira na kai Kipioni.”

² A kacivi ira na kai Kipioni na tui ka vosa vei ira. (Era sa sega ni kawa vaka-Isireli na kai Kipioni; ia oqo o ira na vo-ni-bula ni Amoraiti. E dina ga era a bubuluitaka na Isireli me ra vakabulai ira, ia sa saga o Saula me mokuti ira ena dela ni nona lomakatakata ena vukudra na Isireli kei ira na Juta.)

³ A sa kaya vei ira na kai Kipioni o Tevita, “A cava me'u cakava ena vukumuni? A cava me'u cakava me buluti kina na cala sa vakayacori vei kemuni, me rawa ni o ni vosa vakalougatataki ira kina na tamata i Jiova.”

⁴ Era a kaya vua na kai Kipioni, “Na neimami veicudruvi kei Saula kei ira na nona lewe ni vuvale e sega ni rawa ni sorovaki ena siliva kei na koula, ka keimami sega talega ni vinakata me vakamatei e dua na Isireli ena vuku i keimami.” A sa kaya o Tevita, “Ena ka oqo, a cava o ni vinakata me'u na vakayacora vei kemuni?”

⁵ Era a qai vosa vua na tui na kai Kipioni ka kaya, “Sa vinakata o Saula me vakamatei keimami ka vakawabokotaki keimami, ka me sega kina na neimami i votavota e Isireli.

⁶ Ia mo ni solia ga vei keimami e vitu vei iratou na luvena tagane me keimami qai kunati iratou ena mata i Jiova e Qibea, ena koro i Saula, o koya na tui ka digitaka o Jiova.” A sauma lesu kina vakaoqo na tui, “Au na soli iratou yani.”

⁷ Ia ena vuku ni nodrau veiyalayalati vei Jiova o Tevita kei Jonacani, sa vakabulai Mefiposeci na luve i Jonacani ka makubui Saula kina na tui.

⁸ A sa kauti Erimoni kei Mefiposeci na tui, oqo oi rau na luve i Saula tagane ka sucu mai vei Risipa na luve i Aia; ka sa kauti iratou talega na lewe lima na tagane sa sucu mai vei Merapi, na luve i Saula yalewa ka turaga watina o Atirieli na luve i Basiliai na kai Miola.

⁹ A soli iratou o Tevita vei ira na kai Kipioni, ka ra kunati iratou mai na ulunivanua ena mata i Jiova, ka ratou mate vituvitu vata. E ratou a vakamatei ena i tekivu ni vula i tatamusuki ni a vakatekivu tamusuki kina na barile.

¹⁰ A kauta na i sulu taga o Risipa na luve i Aia, ka birika e dua na nona vale ena dela ni vatu levu, me tiko kina mai na i tekivu ni tamusuki sila, ka yacova ni sa tauca na yagodratou na uca mai lomalagi; a sega ni vakalaiva na manumanu vuka me ro vei iratou ena siga, se na manumanu ni vanua ena bogi.

¹¹ Ia ni tukuni vei Tevita na ka a kitaka o Risipa, na luve i Ea, na wati Saula lalai,

¹² a lako o Tevita ka kauta na suidrau o Saula kei Jonacani na luvena, mai vei ira na kai Jepesi mai Kiliati. (Era a butakoca mai na rara ni soqo ni koro mai Peci Sani, ena vanua ka ra a vakaliligi rau kina o ira na kai Filisitia, ena siga era vakamatei Saula kina e Ului Qiliboa.)

¹³ A kauta cake mai kea o Tevita na suidrau o Saula kei Jonacani na luvena; era a kumuna vata na suidra na kunati.

¹⁴ Era a buluta vata na suidrau o Saula kei Jonacani na luvena ena vanua nei Penijamini mai Sela, ena i bulubulu i Kisi na tamana; era a kitaka na ka kecega a vakarota na tui. Ia ni oti na veika oqo; a qai rogoca na Kalou na vakamamasu lokomi ena vuku ni vanua.

Veivaluvaluti kei Ira na Tuwawa ni Filisitia

¹⁵ Era a vala tale kei ira na Isireli o ira na kai Filisitia; a lako sobu o Tevita, vata kei ira na nona tamata; era a vala kei ira na kai Filisitia; a sa wawale mai o Tevita.

¹⁶ A sa dua na luve ni tamata qarikau levu, o Isipipinopi, ka rauta ni 3.5 kilokaramu na bibi na nona moto, a tokara tiko e dua na i seleiwau vou; ka nanuma tiko o koya me vakamatei Tevita kina.

¹⁷ Ia a qai mai vukei Tevita o Avisai na luve i Seruwaia, ka mokuta mate na kai Filisitia. Era a qai vakamasuti Tevita vakabibi, ka kaya, “O ni sa na sega tale ni lako vata kei keimami ki vala; de o ni yali, ka qai boko vakadua kina na cina e Isireli.”

¹⁸ Ni oti na ka oqo, a dua tale na i valu kei ira na kai Filisitia mai Kopo; a vakamatei Safi, e dua vei ira na kawa ni tamata qarikau levu o Sipikali na luve i Usa.

¹⁹ A dua tale na i valu kei ira na kai Filisitia mai Kopo, ia o Elanani na luve i Jereoritiki na kai Peceliema, a qai vakamatea na taci Koliaci na kai Kaca; na dia ni nona moto sa vaka na nodra kau balavu na dautalitali.

²⁰ A dua tale na i valu mai Kaca, na vanua a tiko kina e dua na kawa ni tamata qarikau levu, ka tau ya ono na i qaqalo ni ligana ruarua, ka tau ya ono na i qaqalo ni yavana ruarua, a ruasagavulu ka va taucoko ni wili vata.

²¹ Ia ni bolei ira na kai Isireli o koya, sa qai vakamatei koya o Jonacani na luve i Semeai na tuakai Tevita.

²² O iratou na lewe va oqo, e ratou kawa ni tamata qarikau lelevu mai Kaca, ka ratou a vakamatei ena liga i Tevita kei na ligadra na nona tamata.