2 Samuela 20 - Vakavakadewa Vou kei na iVola tale eso

Na Talaidredre nei Sipa

¹ A tiko mai kea e dua na tamata ca, na yacana o Sipa, na luve i Pikiri, ena mataqali i Penijamini; a sa uvuca o koya na davui ka kacivaka yani, “Sa sega na ka eda taukena vei Tevita, ka segai na i votavota vua na luve i Jese! I Isireli, mo lesu ga ki na nomu valelaca!”

² Era a vakasuka tani mai vei Tevita o ira kecega na Isireli, me ra sa muri Sipa na luve i Pikiri; ia o ira na Juta era kabita tudei tu ga na nodra tui me tekivu mai na Joritani ka yaco sara i Jerusalemi.

³ A lako o Tevita ki na nona vale mai Jerusalemi; kauti ira na watina lailai e lewe tini, ka biuti ira tiko me ra vakatawa vale, ka la'ki biuti ira ena dua na vale me ra yadravi kina, ka kana kina, ka sega sara ni curu tale vei ira. Era a sogolati tu me yacova na siga era na mate kina, ka ra tiko vakayada ga.

⁴ A vosa vei Amasa o Tevita na tui ka kaya, “Mo vakasoqoni ira vata mai vei au na kai Juta ena loma ni tolu na siga; ia mo tiko talega e ke o iko.”

⁵ A lako o Amasa me soqoni ira vata na Juta; ia sa sega ni lesu o koya ena siga a lokuca vua na tui.

⁶ A sa kaya vei Avisai o Tevita, “Ena levu cake na ca ena vakayacora vei keda o Sipa na luve i Pikiri, ka lailai na ka sa kitaka o Apisalome; mo kauti ira na nona tamata na nomu turaga, ka cici muri koya, de la'ki curuma eso na koro vakabai, ka yali kina vei keda o koya.

⁷ Era a muri koya yani na tamata i Joape, ira na Kireci, na Pileci, kei ira na tamata qaqa kecega. Era a biuti Jerusalemi me cici muri Sipa, na luve i Pikiri.

⁸ Ia ni ra a voleka ki na vatu levu mai Kipioni, a mai tavaki ira o Amasa. A sulumaka tu na nona i sulu vakaivalu o Joape, ka vau e tolona e dua na i seleiwau ena kena taga. Ia ni lako yani ki liu, a taucu ka lutu na kena taga.

⁹ A sa kaya vei Amasa o Joape, “O sa bula vinaka, na wekaqu?” A taura na kumi i Amasa o Joape ena ligana i matau me reguci koya.

¹⁰ Ia sa sega ni raica o Amasa na i seleiwau ena liga i Joape; a suaka kina na yagona o Joape, ka kasabura na nona wawa ki na qele, ka sega tale ni suaki koya vakarua; a mate o Amasa. E rau cici muri Sipa na luve i Pikiri o Joape kei Avisai na tacina.

¹¹ A tu vakadua mai kea e dua na tamata i Joape, ka kaya, “O koya sa vinakati Joape kei koya sa totaki Tevita me muri Joape.”

¹² A davoca no o Amasa na vanua ka dave kina na nona dra ena salatu. Ia ni raica ni ra sa tu vakadua na tamata kecega, a qai kauti Amasa tani vakatikitiki mai na salatu ki na lomanivanua, a ubia na yagona ena dua na i sulu, ni raica o koya era a tu vakadua o ira kece ka mai donui koya.

¹³ Ni a kau tani mai na salatu na yagona, era a qai lako yani na tamata kecega, me muri Joape, ka cici muri Sipa na luve i Pikiri.

¹⁴ A lakova yani o Sipa na nodra mataqali kecega na Isireli, ka yaco ki Epeli Peci Maka ki vei ira kece talega na Peri; era a la'ki soqoni vata ka muri koya.

¹⁵ A sa rogoca na tamata i Joape ni sa tiko e kea o Sipa, ka ra sa lako ka buku druadrua mai Epeli kei Pecimaka. Era a binia na qele ena bainikoro ka kelia talega na ruku ni bai me vakabalei sobu kina.

¹⁶ A sa qai kaci mai na loma ni bai ni koro e dua na yalewa yalomatua, ka vaka, “Ni vakarorogo mada! Ni rogoca mada oqo! Ni tukuna mada vei Joape me lako mada mai vei au me keirau veivosaki.”

¹⁷ A sa lako vua o Joape, a sa kaya na yalewa, “O iko li o Joape, se segai?” A sauma o Joape, “Sai au ga.” A qai tukuna vua na yalewa, “Mo ni rogoca mada na nona vosa na nomuni vada.” A sa kaya o Joape, “Io, au sa vakarorogo tiko.”

¹⁸ Sa qai kaya na yalewa, “Era dau tukuna vakaoqo ena gauna e liu, ‘Mo la'ki rogoca na nomu i sau ni taro mai na koro levu o Epeli;’ ka sai koya oqori na ka era a kitaka.

¹⁹ Oi au e dua vei ira sa cata na i valu ka yalodina tiko ki Isireli. Ia o iko sa vinakata mo vakarusa e dua na koro ka vakatinani kina o Isireli. O sa vinakata li o iko mo vakarusa e dua na ka sa nei Jiova?

²⁰ A sa kaya o Joape, “E sega sara! Au na sega ni vakacacana na nomuni koro!

²¹ Oqori e sega ni neimami i naki. Sa dua na tamata na yacana o Sipa na luve i Pikiri mai na vanua veiulunivanua o Ifereimi, ni a dodoka na ligana vua na tui o Tevita; mo ni soli koya duadua ga mai, ka'u na qai lako tani mai na koro.” A sa kaya vei Joape na yalewa, “Raica, ena viritaki yani vei iko na uluna ki taudaku ni bai.”

²² A lako na yalewa ka vakaraitaka na nona i tuvatuva vuku vei ira kecega na tamata. Era a tamusuka na ulu i Sipa na luve i Pikiri, ka viritaka yani vei Joape. A uvuca na davui o Joape, ka ra veisukayaki mai na koro na tamata yadua ki na nona vale. A sa lesu ki Jerusalemi o Joape vua na tui.

O Ira na Vakailesilesi i Tevita

²³ A sa liutaka vakadua na mataivalu ni Isireli o Joape; a sa liutaka na sotia matayadra i Tevita o Penaia na luve i Jioiata.

²⁴ A sa liutaka na nodra qaravi na tamata cakacaka o Etorami; a sa dau vola na i tukutuku ni matanitu o Josefati na luve i Eailute;

²⁵ E a vunivola ni mataveilewai o Siva, ka rau a bete o Setoki kei Epaiaca;

²⁶ ka sa dua talega vei ira na bete i Tevita o Ira mai na koro o Jaire.