2 Samuela 2 - Vakavakadewa Vou kei na iVola tale eso

¹ Ia ni sa oti na ka oqo, sa qai tarogi Jiova o Tevita, ka kaya, “Me'u lako cake beka ki na dua na nodra koro na Juta, se me'u kakua?” A sa kaya vua o Jiova, “Io, mo lako.” A sa kaya o Tevita, “Na koro cava beka me'u lako kina?” A sa kaya vua o Jiova, “Ki Epironi.”

² E ratou sa qai lako cake kina o Tevita kei rau talega na watina, o Einoami na yalewa ni Jesireli kei Avikali na yalewa ni Kameli, na yada i Nepali.

³ A sa kauti ira cake na nona tamata era tu vata o Tevita; na tamata yadua kei ira na nona lewe ni vale ka ra la'ki vakaitikotiko ena veikoro mai Epironi.

⁴ Era a qai lako mai na Juta, ka lumuti Tevita me nodra tui. Era a qai tukuna vei Tevita, “Sai ira na kai Jepesi mai Kiliati sa buluti Saula,”

⁵ a sa qai tala o Tevita eso na nona tamata vei ira na kai Jepesi mai Kiliati, ka kaya vei ira, “Me vakalougatataki kemudou o Jiova ni dou sa vakaraitaka na nomudou yalodina vei Saula na nomudou turaga, ni dou sa buluti koya.

⁶ Ia oqo me qai vakaraitaka o Jiova vei kemudou na nona loloma tudei kei na nona yalodina. Oi au talega ka'u na caka vinaka vei kemudou ena vuku ni ka oqo.

⁷ Ia oqo mo ni kaukauwa ka qaqa! Sa mate o Saula na nomuni tui, ka ra sa lumuti au na Juta me'u nodra tui.”

Buli me Tui Isireli o Isiposeci

⁸ A sa kauti Isiposeci na luve i Saula o Epineri na luve i Neri ka kavetani ni valu i Saula, ka sa kauti koya mai Meeneimi ki Kipioni.

⁹ A sa buli koya me tui ni vanua o Kiliati, kei Asuri, kei Jesireli, kei Ifereimi, kei Penijamini, kei ira kecega na Isireli.

¹⁰ Sa yabaki 40 o Isiposeci ena gauna sa buli kina oqo me tui Isireli, ka veiliutaki me yabaki rua. Ia era a muri Tevita voli ga na yavusa Juta,

¹¹ ka a veiliutaki mai Epironi o Tevita me vitu veimama na yabaki.

Veivaluvaluti o Isireli kei Juta

¹² A sa lako yani mai Meeneimi ki Kipioni o Epineri na luve i Neri, kei ira na tamata i Isiposeci na luve i Saula.

¹³ O Joape na luve i Seruwaia kei ira na tamata i Tevita era a la'ki veitavaki vei ira ena mataniwai mai Kipioni; sa tiko o Epineri kei ira na nona i lala ena dua na yasa ni drano, ka tiko na i lala i Joape ena yasana ka dua.

¹⁴ A sa kaya vei Joape o Epineri, “Me ra tucake mada na cauravou ka qito vakaivalu e matada.” A sauma o Joape, “Sa donu vinaka.”

¹⁵ E ratou a toso mai e lewe tinikarua ka matataki Isiposeci mai vei ira na Penijamini, ka vala kei iratou e lewe tinikarua na tamata i Tevita.

¹⁶ Era a dui vesuka na ului kedra i sa ka suaka na sarisaridra ena i seleiwau, ka ra sa bale sobu ka mate kece kina na lewe 24. Ena vuku ni ka oqo sa vakatokai kina na tiki ni vanua o ya mai Kipioni me o Elakaca-asurimi, a kena i balebale, “Na Rara ni Veiseleiwau.”

¹⁷ A kaukauwa sara na i valu ena siga o ya, ka vakadrukai Epineri kei ira na Isireli kina o ira na tamata i Tevita.

¹⁸ E ratou a tiko tolutolu mai kea na luve i Seruwaia: o Joape, kei Apisai, kei Asaeli. Ia sa daucici me vaka na dia ni veikau o Asaeli.

¹⁹ A cici muri Epineri o koya, ka sega tale ni qai gole tani ki na i matau se ki na i mawi ena nona cici voli.

²⁰ A rai mai ki muri o Epineri, ka kaya, “O iko beka oqori, Asaeli? A sauma lesu o koya, “Io, oi ga oqo.”

²¹ A sa kaya vua o Epineri, “Kua ni cemuri au tiko! Mo cemuria tale e dua vei ira na sotia ka taura na nona i yaragi.” Ia sa cici muri Epineri tikoga o Asaeli.

²² A mani kaya tale vei Asaeli o Epineri, “Muduka na nomu cemuri au tiko! O via vakaukauwataki au li me'u vakamatei iko? Ena qai rawa vakacava me keirau veisotari e matana votu kei tuakamu o Joape?”

²³ Ia sa sega ga ni via soro o Asaeli; a sa qai vakasuka lesu yani vakaukauwa na dia ni nona moto o Epineri ni sa suaki Asaeli, ka la'ki curu basikata sara na dakuna na moto o ya. A sa bale sobu e kea o Asaeli ka mate kina, ka ra sa tu vakadua o ira kecega ka a yaco yani ki na tikina sa davo matemate koto kina o Asaeli.

²⁴ Ia e rau a qai muri Epineri o rau o Joape kei Apisai. Ia ni dromu tiko na matanisiga, e rau a yaco sara ki na delana o Ama, o ya a donui Qia ena sala ki veikau kei Kipioni.

²⁵ Era a soqoni vata na luve i Penijamini, ka muri Epineri, me ra dua na i lala ka ra la'ki tu ena dua na delana.

²⁶ A kacivi Joape o Epineri ka kaya, “E dodonu li me da veivaluvaluti tikoga ka tawa mudu? O ni sega beka ni raica ni tinitini ga ni veivaluvaluti sai koya na yalo ca? Eda veiwekani veivolekati tikoga oqo. A cava na kena dede mo sega ni tukuna kina vei ira na nomu tamata me sa rauta na nodra cemuri keimami tiko?

²⁷ A sa kaya vua o Joape, “Me vaka sa bula o Jiova, kevaka o a sega ni vosa, era na sega ni cegu na noqu tamata ena cici muri iko me yacova sara na mataka.”

²⁸ A uvuca na davui o Joape, ka ra tu vakadua na tamata kecega, ka sega tale ni ra muri ira tiko na Isireli, ka sa mudu tale e kea na veivala.

²⁹ A sa tayabe yani ena Buca o Joritani o Epineri kei ira na nona tamata ena bogi taucoko o ya; ka ra kosova na Uciwai na Joritani, ka tayabe yani ena mataka taucoko o ya ni bera ni ra yaco yani ki Meenieimi.

³⁰ A lesu mai o Joape mai na nona cici muri Epineri; ia ni a vakasoqoni ira vata na nona tamata, a yali vei ira e lewe tini kaciwa na tamata i Tevita kei Asaeli.

³¹ Ia o ira na tamata i Tevita era a vakamatea e lewe tolu na drau ka onosagavulu vei ira na Penijamini, kei ira na tamata i Epineri.

³² Era a kauti Asaeli, ka buluti koya ena i bulubulu i tamana mai Peceliema. Era a lako tu ena bogi taucoko o ya na tamata i Joape ka la'ki kida vei ira na mataka mai Epironi.