2 Samuela 19 - Vakavakadewa Vou kei na iVola tale eso

Vosa vei Tevita o Joape

¹ A tukuni vei Joape, ka vaka, “Raica, sa tagicaki Apisalome ka yasovaki koya tiko o Tevita na tui.”

² Ia a vuki kina na siga ni qaqa o ya me nodra siga ni vakaloloku o ira na tamata kecega; ni ra a rogoca na tamata na i tukutuku, “Sa rarawa na tui ena vuku ni luvena.”

³ Era a lako lo ki na koro na tamata ena siga o ya, me vaka na nodra lako lo na sotia era sa madua ni ra dro mai na i valu.

⁴ A tabonaka na matana na tui, ka qoqolou vakadomoilevu, ka vaka, “Isa Apisalome na luvequ! Isa Apisalome! Na luvequ, na luvequ!”

⁵ A lako mai ki vale vua na tui o Joape, ka kaya, “Ena siga edaidai o ni sa vakamaduataki ira na nomuni tamata, o ira ka a vakabulai kemuni kei ira na luvemuni tagane, na luvemuni yalewa, na watimuni, kei ira na watimuni lalai.

⁶ O ni sa lomani ira era sa cati kemuni ka cati ira era lomani kemuni! Ni o ni sa vakadinadinataka edaidai ni a ka walega vei kemuni o ira na nomuni vakalesilesi kei ira na tamata; ni'u a qai kila edaidai ni vinaka cake vei kemuni kevaka sa bula o Apisalome ka mate oi keimami kece oqo.

⁷ Ia oqo, mo ni lako yani ka vosa vakayaloqaqataki ira na nomuni tamata. Au sa bubului vei Jiova ni kevaka o ni sega ni lako yani, ena sega ni tiko tale kei kemuni e dua na tamata ena kida ni mataka. O ya sa na qai ka ca levu sara me yacovi kemuni me vakatekivu mai na gauna ni nomuni cauravou me yacova mai na gauna oqo.”

⁸ A tucake na tui ka la'ki tiko ena matamata ni koro. A sa tukuni vei ira kecega na tamata, ka vaka, “Raica, sa tiko na tui ena matamata ni koro;” era a qai lako kece mai na tamata vua na tui. Ni yaco tiko na veika oqo, era sa dro kece na Isireli ki na nodra dui i tikotiko.

Kacivi Lesu i Jerusalemi o Tevita

⁹ Era a veileti ka veisaqasaqa vakai ira na tamata ena mataqali kecega e Isireli, ka ra kaya, “Sa vakabulai keda na tui o Tevita mai na ligadra na noda meca kecega, ka vakabulai keda talega mai na ligadra na kai Filisitia; ia oqo, sa qai dro tani mai na vanua ena vuku i Apisalome.

¹⁰ Eda a lumuti Apisalome me noda tui, ia sa mate ena i valu o koya. Ia na cava na vuna e sega kina ni dua me bau sasagataka na vakalesui mai nei Tevita na tui?”

¹¹ A sa yaco yani na i tukutuku ni nodra veivosaki na Isireli vei Tevita na tui. Sa qai talai rau yani kina na bete o Setoki kei Epaiaca me rau la'ki tarogi ira na i liuliu ni Juta, ka kaya, “A cava beka na vuna mo ni qai otioti kina ni tamata mo ni vakalesuya tale kina na tui ki na nona i tikotiko vakatui?

¹² Oi kemuni na wekaqu voleka, na tiki ni yagoqu dina kei na dra; a cava mo ni otioti kina ni tamata ena noqu vakalesui tale mai?”

¹³ A sa kaya talega vei rau o Tevita me cavuti oqo vei Amasa, “O iko na wekaqu dina. Mai na siga oqo ka lako yani, au sa lesi iko me liutaka na noqu mataivalu me i sosomi kei Joape. Me qai totogitaki au na Kalou kevaka au sega ni vakayacora oqo.”

¹⁴ Na vosa oqo nei Tevita sa vagolea kece na lomadra na tamata i Juta me ra tokoni koya, ka sa vakadewataka lesu kina na i tukutuku me lesu mai na tui kei ira kece na nona i vakalesilesi.

¹⁵ Ni sa lesu tiko yani na tui, a sa sotavi ira na Juta ena Uciwai na Joritani. Era a lako mai Kilikali o ira na Juta me ra tavaki koya na tui, ka me ra kauti koya ki na tai kadua ni Joritani.

Lesu Tale o Tevita

¹⁶ A vakatotolo mai o Semeai na luve i Kira, na kai Penijaminimai Peurimi, ka lako sobu vei ira na Juta me tavaki Tevita na tui.

¹⁷ Era sa tu vata kaya e lewe 1,000 na tamata mai vei ira na Penijamini. O Sipa, o koya na dauveiqaravi ena vale i Saula, sa lako talega mai kei iratou na luvena tagane e lewe tinikalima, kei ira na nona tamata era lewe ruasagavulu ka ra sa lako yani ki na Joritani ni bera ni yaco yani na tui.

¹⁸ Era a lako kosova na uciwai me ra kauti ira yani na i lakolako vakatui, ka kitaka na veika a vinakata na tui. Ia ni vakarau lako kosova na uciwai na tui, a qai cuva sobu e matana o Semeai na luve i Kira.

¹⁹ A vosa o Semeai vua na tui, ka kaya, “Mo ni kakua ni okati au me'u cala, kemuni na noqu turaga, se mo ni nanuma na i valavala ca ka'u a cakava ena siga o ni a lako tani kina mai Jerusalemi, na noqu turaga na tui; mo ni guilecava sara oqo.

²⁰ Au sa kila tu na nomuni tamata ni'u sa cala; ena ka oqo au sa liu mai kina edaidai vei ira kecega na mataqali i Iosefo, me'u mai tavaki kemuni na noqu turaga na tui.”

²¹ A vosa mai o Avisai na luve i Seruwaia, ka kaya, “Me sega li ni vakamatei o Semeai ena vuku ni ka oqo, ni a rukaki koya sa lumuta o Jiova?

²² A sa kaya o Tevita, “A cava li me'u cakava vei kemudrau na luvei Seruwaia, mo drau mai noqu meca tale kina edaidai? Me vakamatei li e dua na tamata e Isireli edaidai? Au sa sega beka li ni kila ni'u sa nodra tui na Isireli ena siga oqo?”

²³ A qai vosa na tui vei Semeai ka kaya, “O na sega ni mate.” A sa bubului kina vua na tui.

²⁴ A lako sobu o Mefiposeci na makubui Saula me tavaki koya na tui. E a sega tu ni vui na yavana, koti na kumina; se sava na nona i sulu me vakatekivu mai na siga ka a lako tani mai kina na tui o Tevita, ka yacova na siga ka a tale bula mai kina.

²⁵ Ia ni lako mai ki Jerusalemi me tavaki koya na tui, a qai vosa vua na tui ka kaya, “A cava o sega ni lako vata kina kei au, Mefiposeci?”

²⁶ A sa kaya vua o koya, “Noqu turaga na tui, sa cakacaka vakailasu vei au na noqu tamata; ni'u a kaya vua, ‘Mo vakaidabedabetaka vei au na asa, me'u vodo kina, ka lako vata kei na tui, ni'u sa lokiloki oi au na nomuni tamata.

²⁷ A la'ki beitaki au vakailasu na nomuni tamata vei kemuni na noqu turaga na tui. Ia na noqu turaga na tui sa vaka na agilosi ni Kalou; mo ni vakayacora vakakina na ka e sa vinaka vei kemuni.

²⁸ Ni sa kilikili vei ira mai na vale i tamaqu me ra vakamatei mai vei kemuni na tui, ia o ni a solia vei au na dodonu me'u kana mai na nomuni teveli. Sa sega vei au na dodonu me'u kerea tale kina e dua na ka vei kemuni na tui.”

²⁹ A sa kaya vua na tui, “Sa sega tale ni dodonu mo kaya tale e dua na ka. Au sa lewa oti mo drau wasea na vanua kei Sipa.”

³⁰ A sa kaya vua na tui o Mefiposeci, “Me taura kecega o koya, me vaka ni sa lesu tale mai ena vakacegu ki na nona vale na noqu turaga na tui.”

Sa Lomani Basiliai o Tevita

³¹ Ia oqo, a lako sobu mai Rokolimi o Basiliai na kai Kiliati; a lako vata kaya na tui ki na Joritani, ka me kauti koya ki na tai kadua.

³² A qase sara o Basiliai, a walusagavulu na nona yabaki; a tamata vutuniyau sara o koya ka dau vakania talega na tui ena gauna sa tiko kina mai Meneimi.

³³ A vosa na tui vei Basiliai ka kaya, “Me daru lako vata yani, ka'u na vakani iko ni daru sa tiko mai Jerusalemi.”

³⁴ A sa kaya vua na tui o Basiliai, “Ena vica tale na yabaki na dede ni gauna me'u bula kina, me'u lako cake kina kei koya na tui ki Jerusalemi?

³⁵ Au sa yabaki walusagavulu ena siga oqo, ka na rawa li vei au me'u kila na ka e vinaka mai na ka e ca? Sa na kila rawa li na nomuni tamata na i kanakana ni ka au kania, se na ka au sa gunuva? Au na rogoca rawa li na domodra na tagane kei na yalewa dausere? Ia na cava li me'u la'ki vakaocai kemuni kina na noqu turaga?”

³⁶ Ena lako vakalekaleka ga na nomuni tamata kei kemuni na tui ki na tai kadua ni Joritani. Me sauma vakacava li vei au na tui ena ka levu vakaoqo?

³⁷ Au kerea me'u sa suka tale mada na nomuni tamata, me'u qai la'ki mate ga ena noqu koro, ka voleka ki na i bulubulu i tamaqu kei tinaqu. Ia oqo na nomuni tamata o Kimami; me lako vata yani o koya kei kemuni na noqu turaga na tui, ka kitaka vua na ka ga e vinaka vei kemuni.”

³⁸ A sa kaya na tui, “Ena lako vata kei au o Kimami, ia au na cakava talega vua na ka e vinaka vei iko; na veika kece talega o kerea vei au na kitaka vei iko.”

³⁹ Era a lako na tamata kecega ki na tai kadua ni Joritani, ka vakakina o koya na tui. Ia ni yaco yani ki tai ka dua na tui, a reguci Basiliai o koya, ka vosa vakalougatataka, a lesu tale ki na nona vanua o Basiliai.

Na Veiba i Juta kei Isireli me Baleta na Tui

⁴⁰ A lako yani ki Kilikali na tui, ka lako vata kaya o Kimami; era a kauta na tui o ira kecega na Juta kei na veimama ni kedrai wiliwili na Isireli.

⁴¹ Era a qai lako yani vua na tui o ira kecega na Isireli, ka kaya vua, “A cava era sa butakoci kemuni kina o ira na weka i keimami, na Juta, ka ra qai kauti kemuni na tui kei ira na nomuni lewe ni vale, kei ira kecega na nomuni tamata ki na tai kadua ni Joritani?”

⁴² Era a qai sauma vata kece vakadua na kai Juta, ka ra kaya vei ira na Isireli, “Ni sa weka i keimami dina na tui. A cava na vuna o ni cudruvaka kina na ka oqo? E a bau sauma li na tui na keimami kakana, se bau solia vei keimami e dua na ka?”

⁴³ Era a qai sauma na Isireli vei ira na Juta ka kaya, “Sa vakatinitaki na nomuni taukena na tui, ka la'ki levu cake sara na neimami taukeni Tevita, ka lailai oi kemuni. A cava o ni sa beci keimami kina? E sega li ni o kemuni ka a vosataka taumada na nona la'ki kau mai na tui?” Ia a kaukauwa cake na nodra vosa na Juta, ka malumalumu na nodra vosa na Isireli.