2 Samuela 18 - Vakavakadewa Vou kei na iVola tale eso

Druka ka Mate o Apisalome

¹ A wiliki ira na tamata era a tu vata o Tevita, ka lesia e so me nodra turaga na veiyaya udolu, ka so me nodra turaga na veiyaya drau.

² A tala na nona i valu o Tevita, ka wasea tolu, e dua na kena i wase me liutaki ira o Jekope, na i karua me lewai ira o Avisai na taci Joape na luve i Seruwaia, kei na i katolu me lewai ira o Itai na kai Kaca. A sa kaya vei ira na tamata na tui, “Au na lako vata talega kei kemuni.”

³ Ia era a qai kaya vua na tamata, “Mo ni kakua ni la'ki vala. Ni na ka wale ga vei ira kevaka keimami dro. Ena ka wale talega vei ira kevaka era la'ki mate e veimama ni keimami i wiliwili. Ia oi kemuni na tui, o ni sa tautauvata kei na lewe tini na udolu vei keimami; ia sa vinaka cake mo ni vakauta mai na veivuke mai na koro.”

⁴ A sa kaya vei ira na tui, “A ka ga e vinaka vei kemuni, au na cakava.” A la'ki tu voleka ki na matamata ni koro na tui, era a curu yani vakayayadrau, ka vakayayaudolu na tamata kecega.

⁵ A vakaroti iratou o Joape, o Avisai, kei Itai na tui ka kaya, “Ena vukuqu, mo ni kakua ni vakamavoataki Apisalome.” Era a rogoca na tamata kecega ni vakaroti ira na kavetani ni valu na tui ena vuku i Apisalome.

⁶ Era a lako yani na tamata ki na vanua ni vala kei ira na Isireli; a tekivu na vala ena veikau mai Ifereimi.

⁷ Era a vakamalumalumutaki ira na Isireli mai kea na mataivalu i Tevita; a sa dua na druka vakaloloma ka vakamatei kina e lewe 20,000 na tamata ena siga o ya.

⁸ A dewa yani na i valu ki na yasa ni vanua taucoko, ka sa lewe levu era mate e loma ni veikau mai vei ira era mate ena veivaluvaluti.

Mate o Apisalome

⁹ A sa sota kei ira na tamata i Tevita o Apisalome. A vodo voli ena nona meule; ia ena gauna e cici yani kina na meule ena ruku ni dua na vuni oki levu ka levu na tabana, a qai tacori na ului Apisalome ena dua na taba ni oki. A sa mani lili koto kina e macawa ka toso tikoga yani na meuli a vodoka tiko.

¹⁰ A sa raici koya e dua na tamata, ka la'ki tukuna vei Joape, ka kaya, “Au a kunei Apisalome ni lili tu ena vuni oki.”

¹¹ A sa kaya o Joape vua na tamata ka la'ki tukutuku yani, “Oi, o a raici koya! A cava o sega ni mokuti koya kina ena gauna vata ga oqori? Ena ka ni marau vei au me'u solia vei iko e tini na tiki ni siliva, kei na dua na beleti.”

¹² Ia a kaya na tamata vei Joape, “Kevaka sara mada ga o solia vei au e dua na udolu na siliva, au na sega ga ni dodoka na ligaqu vua na luvenitui; ni keimami a rogoca ni a vakaroti kemudou na tui, o iko, o Avisai kei Itai, ni a kaya, ‘Dou maroroya vinaka na cauravou o Apisalome ena vukuqu.’

¹³ Ia kevaka me'u a cakava na ka ca ka vakamatei koya, ni sa sega ni dua na ka me vuni vua na tui, o na sega talega ni totaki au.”

¹⁴ A sa kaya o Joape, “Au na sega ni vakaoti gauna tale tiko vaka oqo vei iko.” A kauta e tolu na moto leleka o Joape, ka coka kina na uto i Apisalome, ni lili bulabula toka ena taba ni oki.

¹⁵ E ratou a tu wavoliti Apisalome e le tini na cauravou daucola i yaragi i Joape, eratou a qai cokai koya, ka vakamatea.

¹⁶ A uvuca na davui o Joape, ka ra lesu tale mai na tamata me ra kakua ni muri ira na Isireli; ni a tarovi ira o Joape.

¹⁷ Era a kauta na yago i Apisalome, ka biuti koya ki na loma ni dua na i keli levu e veikau o ya, era a binia e delana e dua na i binibini vatu levu sara; ka ra dui dro kece na Isireli ki na nodra veivale.

¹⁸ Ia ni a bula tiko o Apisalome, a vakaduria cake e dua na duru vatu ena Buca ni Tui, ka kaya, “Sa sega na luvequ tagane me vakabula tiko na yacaqu.” A mani vakatokai na duru vatu o ya me yacana: Na i Vakananumi kei Apisalome, me yacova mai na siga oqo.

Sa Tukuni na Mate i Apisalome

¹⁹ A sa kaya o Eimasi, na luve i Setoki na bete, “Me'u cici mada ka la'ki tukuna vua na tui ni sa vakabulai koya o Jiova mai vei ira na kena meca.”

²⁰ A sa kaya vua o Joape, “Mo kakua mada ni la'ki tukutuku e daidai; mo qai lako ena dua tani tale na siga: ia me kakua ga e daidai, ni sa mate na luvena na tui.”

²¹ A qai kaya vua na nona bobula kai Eciopea o Joape, “Mo lako ka tukuna vua na tui na ka o sa raica.” A vakarokoroko na bobula ena mata i Joape ka cici yani.

²² A sa kaya tale o Eimasi, “Laiva me'u cici muria na bobula, ka veitalia ga na ka ena yaco.” Ia a kaya o Joape, “A cava mo cici kina na luvequ, baleta ni na sega ni dua na kemu i sau ena vuku ni ka oqori.”

²³ A sa kaya tale mai o Eimasi, “Veitalia ga ke mani qai yaco e dua na ka, au via cici mada.” A sa kaya o Joape, “Mo cici ga.” A sa cici o Eimasi vaka ki na Buca o Joritani, ka cici sivita na bobula.

²⁴ A tiko o Tevita ena kedrau veimama na matamata ruarua; ka cabe cake ki na dela ni matamata ni bainikoro na i vakatawa; a tacake, ka raica e dua na tamata ni cici duadua tiko mai.

²⁵ A kaci na i vakatawa, ka tukuna vua na tui. A sa kaya na tui, “Ia ke cici duadua ga mai o koya, sa na dua na i tukutuku e kauta tiko mai.” A cici vakatotolo o koya, ka toro voleka yani.

²⁶ A raica na i vakatawa ni a cici mai e dua tani tale na tamata. A kacivaka ki matamata na i vakatawa, ka kaya, “Raica, sa cici duadua mai e dua tani tale na tamata!” A sa kaya na tui, “Sa kauta talega mai na i tukutuku o koya.”

²⁷ A sa kaya na i vakatawa, “Au sa raici koya ka a cici mai e liu, ka sa vaka na cicici nei Eimasi, na luve i Setoki.” A sa kaya na tui, “A tamata vinaka o koya, sa kauta mai na i tukutuku vinaka.”

²⁸ A kaci o Eimasi, ka kaya vua na tui, “Sa vinaka tu na veika kece.” A cuva vakatoboicu ki na qele ena mata ni tui, ka kaya, “Me vakarokorokotaki o Jiova na nomu Kalou, o koya ka soli ira mai na tamata era a dodoka na ligadra vei kemuni na noqu turaga na tui.”

²⁹ A taroga na tui, ka kaya, “Sa vinaka tiko li na cauravou o Apisalome se sega?” A sa kaya o Eimasi, “Ni sa talai au o Joape na nomuni tamata na tui, au rogoca e dua na maue levu, ia ka'u sega ga ni kila na kena i balebale.”

³⁰ A sa kaya na tui, “Mo vakatikitiki mada, ka mo tu e ke.” A lako vakatikitiki o koya ka la'ki tu vakadua.

³¹ Ka raica, a lako mai na bobula ni Eciopea; a kaya, “Sa dua na i tukutuku vinaka vei kemuni na noqu turaga na tui; ni sa vakabulai kemuni ena siga oqo o Jiova mai na nodra kaukauwa o ira kecega ka ra a tucake me ra saqati kemuni.”

³² A taroga na bobula na tui, ka kaya, “Sa vinaka tiko li na cauravou o Apisalome, se segai?” A sa kaya na bobula, “Me ra vakataki koya mada ga na cauravou o ya o ira kece na nomuni meca na noqu turaga na tui, kei ira era tucake me ra saqati kemuni.”

³³ A bibi sara na nona rarawa na tui, a cabe ki na vale e dela ni matamata ni koro, ka tagi, ka kaya ni lako tu, “Isa lei na luvequ Apisalome, Isa na luvequ, na luvequ Apisalome! Ke'u a mate ga me'u kemu i sosomi, ke sa vinaka, Isa Apisalome, na luvequ, na luvequ!”