2 Samuela 17 - Vakavakadewa Vou kei na iVola tale eso

¹ A sa kaya vei Apisalome o Eitofeli, “Me'u digitaka mada e lewe 12,000 na tamata, ka'u na qai vakasasataki Tevita ena bogi edaidai.

² Au na qai valuti koya ena gauna sa oca kina ka yalolailai. Ena tarai koya na rere, ka ra na veidroyaki na nona tamata. Au na vakamatea duadua ga na tui,

³ ka kauti ira kece tale mai na nona tamata vei iko, me vaka na nona kau yani e dua na yalewa sa musuki tu vua na watina. O vinakata wale ga me vakamatei e dua bulu na tamata, ka ra na tiko vakacegu na tamata kecega.”

⁴ A vinaka sara vei Apisalome na i vakasala oqo, ka vakakina vei ira na qase ni Isireli.

⁵ A sa kaya o Apisalome, “Me tei kacivi mada mai o Usaia na Ariki, me da rogoca talega na ka e kaya.”

⁶ A lako mai vei Apisalome o Usaia, ka vosa vua o Apisalome, ka kaya, “Sa vakaoqo na i vakasala i Eitofeli; sa vaka e vei, me da muria li na nona vosa se sega? Kevaka e sega, ia mo vosa mai.”

⁷ A qai kaya vei Apisalome o Usaia, “Sa sega ni vinaka na i vakavuvuli nei Eitofeli ena siga oqo.”

⁸ A sa kaya talega o Usaia, “O ni kilai tamamuni vakavinaka sara kei ira na nona tamata, ni ra tamata qaqa ka ra cudrucudru sara me vaka e dua na tina ni bea sa butakoci na luvena lailai. Ia o tamamu e dua e matai vinaka sara ena vala ka sega ni dau tiko kei ira na nona tamata ena bogi.

⁹ Raica, ena gauna mada ga oqo, sa la'ki vuni tiko o koya ena dua na qara se ki na dua tani tale na vanua. Ia ni ra bale mate e so na tamata ena i matai ni kaba koro, o ira era rogoca, era na kaya, ‘Raica, sa yaco e dua na ravuravu levu vei ira na tamata era muri Apisalome.

¹⁰ O ya era na rawa ni datuvu kina o ira na tamata yalo qaqa ka vaka tu na yalo ni laione na yalodra; ni ra sa kila o ira kecega na Isireli ni tamata qaqa o tamamu, ka ra tamata qaqa talega o ira era tu vata.

¹¹ O koya oqo, au sa kaya kina me ra soqoni vata yani vei kemuni o ira kece na Isireli, me vakatekivu mai Tani me yaco ki Perisepa, ia mo ni liutaki ira ena valu me vaka na mata ni nuku ni matasawa.

¹² Eda na tauri koya ena dua na vanua sa kune kina, eda na qai mokuti koya ena gauna e lutu kina na tegu e dela ni qele; ia ena vaqeyavutaki vakadua o koya kei ira na tamata era tu vata.

¹³ Ia kevaka sa vakasuka o Tevita ka curuma e dua na koro, era na kauta mai na dali ki na koro o ya o ira kecega na Isireli, eda na qai talaraka na koro ki na buca, me yacova sara ni sa sega ni kune tale kina e dua na vatu lailai.”

¹⁴ A sa kaya o Apisalome kei ira kece na Isireli, “Sa vinaka cake na ka sa vakavulica o Usaia na Ariki mai na kena a dusimaka o Eitofeli.” Ni sa lewa o Jiova me vakawaletaki na i vakavuvuli vinaka i Eitofeli, ka me kauta o koya na ka ca vei Apisalome.

Dro Bula o Tevita

¹⁵ A la'ki vosa o Usaia vei rau na bete, o Setoki kei Epaiaca, ka kaya, “Sa vakaoqo na i vakavuvuli i Eitofeli vei Apisalome kei ira na qase ni Isireli; ka vaka talega oqo na noqu i vakavuvuli.

¹⁶ Ia mo drau talatala sara vakatotolo ka tukuna vei Tevita, ka kaya, ‘Mo kakua ni moce ena bogi edaidai ena tai ni wai ena yasa ni veikau, ia mo kusarawa sara ki tai kadua de ra na qai tauri koya kina na tui kei ira na tamata kece era lako kaya, ka ra qai vakamatei.”

Mate o Eitofeli

¹⁷ E rau a wawa tiko o Jonacani kei Eimasi mai Enirokeli; a dau lako tiko e dua na vada me kau i tukutuku vei rau, ka rau dau qai la'ki tukuna vei Tevita na tui; ia a tabu sara me rau raici ni rau curuma yani na koro, me rau la'ki tukutuku vei Tevita na tui.

¹⁸ Ia a mani raici rau e dua na cauravou, ka la'ki tukuna vei Apisalome; e rau a vakatotolo sara yani ka la'ki curu ki na nona vale e dua na tamata mai Peurimi, ka tiko ena lomanibai e dua na i keliwai, ka rau siro sobu kina.

¹⁹ A cavutu na yalewa ka la'ki tevuka e dua na i sulu me i ubi ni gusu ni keliwai, ka kaburaka kina na sila sa qaqi oti; a sega ni kilai na ka o ya.

²⁰ Ia ni ra lako mai ki na vale o ya na tamata i Apisalome, era a kaya, “Sa e vei o rau o Eimasi kei Jonacani? A sa kaya vei ira na yalewa, “E rau sa qalo kosova na uciwai.” Ia era a qai vaqaqara tiko ka sega ni kunei rau, era a mani lesu tale ki Jerusalemi.

²¹ Ia ni ra lako yani, e rau a qai lako cake mai ena i keli wai, ka la'ki tukuna vei Tevita na tui. E rau a kaya vei Tevita, “Mo ni cavutu, ka lako vakatotolo ki tai kadua ni uciwai; ni sai koya oqo na i vakavuvuli nei Eitofeli me caka vei kemuni.”

²² A cavutu sara o Tevita kei ira kece na tamata era a tiko kaya, era a vuto kosova na Joritani; ia ni la'ki kida na mataka, a sega tale ni qai vo e dua na tamata me sega ni qalo takoso.

²³ Ia o Eitofeli, ni raica ni sega ni vakabau na ka a tukuna, a qai vesuka na nona i dabedabe ni asa, cavutu, ka lako yani ki na nona vale, ki nona koro. Ia ni tautaunaka na veika kece, a qai kukunataki koya; a mate ka bulu ena i bulubulu i tamana.

²⁴ A yaco ki Meneimi o Tevita. A qalo kosova na Joritani o Apisalome kei ira kece na Isireli era a tu vata.

²⁵ A lesi Amasa o Apisalome me turaganivalu me i sosomi kei Joape. O Amasa na luve i Jicera, e dua na luve i Isimeli; e rau a vakawati kei na luve i Neasi, o Apikali, na taci Seruwaia na tina i Joape.

²⁶ Era a keba tiko na Isireli kei Apisalome ena vanua o Kiliati.

²⁷ Ia ni yaco i Meneimi o Tevita, a tavaki koya mai o Sopi, na luve i Neasi mai Rapa, sa nodra na luve i Amoni, o Mekiri, na luve i Amieli mai Lotipari, kei Basiliai na kai Kiliati mai Rokolimi,

²⁸ e ratou a kauta mai eso na i mocemoce, na beseni, na bilo qele; na witi, na barile, na madrai, na sila tavu, eso na bini droka, na vua ni bini

²⁹ kei na oni, na kirimu, na sipi, kei na jisi mai na sucu ni bulumakau me kania o Tevita kei ira na nona tamata. Era sa kaya vakaoqo, “Era sa viakana, ka oca, ka viagunu na tamata ena loma ni vanua lala.”