2 Samuela 16 - Vakavakadewa Vou kei na iVola tale eso

Tevita kei Sipa

¹ Ia ni sivia vakalailai na ulunivanua o Tevita, e rau a sota e kea kei Sipa na tamata i Mefiposeci ni a mai tavaki koya; a sa kauta voli yani o Sipa eso na asa vakaidabedabe era dreketa tiko e 200 na i buli madrai, e dua na drau na i soso vua ni vaini, e dua na drau na vuanikau e dau vakayagataki ena vula i katakata, kei na dua na taga kuli-ni-manumanu na waini.

² A vosa vei Sipa na tui, ka kaya, “A cava o kauta mai kina na veika oqo?” A sa kaya o Sipa, “O ira na asa oqo me ra vodo kina na nomuni lewe ni vuvale na tui, na madrai kei na vuanikau me kedra na cauravou, kei na waini me ra gunuva o ira era sa oca ena loma ni vanua lala.”

³ A sa kaya na tui, “Sa evei ga o Mefiposeci, na makubui Saula na nomu turaga?” A sa kaya o Sipa vua na tui, “E sa tiko ga mai Jerusalemi o koya, baleta ni sa vakadeitaka e lomana ni ra na vakasuka lesu ki vua o ira na Isireli na matanitu nei tukana o Saula.”

⁴ A sa kaya vei Sipa na tui, “Raica, sa nomu na veika kecega sa nei Mefiposeci.” A sa kaya o Sipa, “Au sa nomuni tamata, me'u kune loloma tikoga e matamuni na noqu turaga na tui.”

O Tevita kei Semeai

⁵ Ia ni yaco ki Peurimi o Tevita na tui, a lako mai vua e dua na tamata mai vei ira na mataqali i Saula, a yacana o Semeai na luve i Kira, ka sa vosa cudrucudru vua na tui ni lako voli.

⁶ A vakaviriki Tevita kei ira kecega na nona tamata ena vatu o Semeai, ka dina ga ni ra a vakavolivoliti koya tu na nona tamata kei ira era dau yadravi koya voli.

⁷ A vosa vakacacataki Tevita tiko o Semeai, ka kaya, “Mo lako tani! Mo lako tani! O iko na tamata daulaba! A tamata ca o iko!

⁸ O sa kovea na matanitu i Saula, ia oqo sa cudruvi iko o Jiova ena vuku ni nodra dra kecega na mataqali i Saula. Sa solia o Jiova na matanitu ki na liga i Apisalome na luvemu, ka sa yacovi iko na leqa; ni o sa tamata daulaba!”

⁹ A vosa vua na tui o Apisai na luve i Seruwaia, ka kaya, “A cava e mai vosavakacacataka kina na noqu turaga na tui o koya na koli mate oqo? Mo ni vakatara mada me'u lako i kea me'u musuka laivi mada na uluna.”

¹⁰ Ia sa qai kaya na tui, “E sega ni dua na ka e nomudrau kina, oi kemudrau na luve i Seruwaia. Kevaka sa rukaki au voli baleta ni sa lewa o Jiova me vakakina, sa sega kina ni yaga me da vakataroga, ‘A cava li sa cakava kina o koya na ka oqo?’ ”

¹¹ A qai vosa vei Apisai kei ira kecega na nona tamata o Tevita ka kaya, “Raica, sa qarai au tiko na luvequ dina me vakamatei au; a cava dou sa kurabui kina ena vuku i koya na Penijamini oqo? Ni laivi koya ga me ruru tiko; ni sa tukuna vua o Jiova me vakakina.

¹² Ena qai raica beka o Jiova na noqu rarawa, ka na qai caka vinaka vei au ena vuku ni nona vosavakacacataki au na tamata oqo edaidai.”

¹³ Ena vuku ni ka oqo, a sa tomana tikoga na nodratou i lakolako ena sala o Tevita kei ira na nona tamata. A muri ratou voli o Semeai, ka lako ena veidelana, ka tomana na nona ruru kei na veiviri ena vatu kei na soso.

¹⁴ Ia ni yaco yani ki na Joritani na tui kei ira kece na nona tamata era a lako vata tiko, a sa bikai ira na oca; era sa vakacegu mai kea.

¹⁵ A sa lako mai ki Jerusalemi o Apisalome kei ira kece na Isireli, ka lako vata mai kei ira o Eitofeli.

¹⁶ Ni sa lako mai vei Apisalome na i tokani voleka i Tevita o Usai na Ariki, a sa kaya vei Apisalome, “Me bula balavu na tui! Me bula balavu na tui!”

¹⁷ A sa kaya vei Usaia o Apisalome, “Oqo li na i vakaraitaki ni nomu yalodina vua na nomu i tokani voleka? A cava o sega ni lako vata kina kei koya?”

¹⁸ A sa kaya vei Apisalome o Usaia, “E segai; au na totaka ka tiko talega kei koya sa digitaka o Jiova kei ira kecega na Isireli.

¹⁹ Ia o cei me'u qarava? Sa sega li ni o koya na luvena? Me vaka au a qaravi tamana, ena vaka talega kina vei kemuni.”

²⁰ A sa kaya vei Eitofeli o Apisalome, “Mo solia mada mai na nomu i vakasala; a cava me da cakava?”

²¹ A sa kaya vei Apisalome o Eitofeli, “Mo lako ka la'ki moceri ira na watina lalai na tamamuni, oqo o ira era biu tu mai me ra vakatawana voli na valenitui. Na ka oqo era na kila kina na Isireli taucoko ni sa raici iko o tamamu ni o kena meca, ka na qai vakauqeti ira vakalevu era sa tiko kei kemuni.

²² A sa biriki vei Apisalome e dua na valelaca ena dela ni vale vakatui; ka sa curu ki loma o Apisalome ka moceri ira na watina lalai na tamana e matadra kecega na Isireli.

²³ Ia ena gauna o ya, sa dau rokovi ka ciqomi na i vakasala i Eitofeli me vaka na kena ciqomi na vosa ni Kalou; ka rau dau talairawarawa kina o Tevita kei Apisalome.