2 Samuela 15 - Vakavakadewa Vou kei na iVola tale eso

Veisaqasaqa o Apisalome

¹ Ni oti oqo, a qai taura o Apisalome eso na qiqi ni valu, na ose, kei na limasagavulu na tamata me ra cici tiko e liu vua.

² A sa dau yadra vakamataka o Apisalome ka la'ki tu ena bati ni sala ena matamata ni koro. Ni sa dau lako yani vua na tui na tamata sa vinakata me walia na tui e dua na ka sa veiletitaki, a sa dau kacivi koya o Apisalome ka tarogi koya, “E vei na koro o sa lako mai kina?” Ia ni sa kaya, “Na nomuni tamata sa lako mai na dua vei ira na mataqali e Isireli.”

³ A sa dau qai kaya o Apisalome, “Raica, sa vinaka ka dodonu na ka o lako mai kina; ia sa sega na tamata sa lesia na tui me kena i sosomi me na rogoci iko.”

⁴ A qai kaya tale o Apisalome, “Au diva mada ga me'u turaganilewa! Ke sa vakakina, era na qai lako mai vei au na tamata yadua sa gadreva me'u walia se lewa na nodra leqa, ka'u na solia vua na lewa dodonu.”

⁵ Ni sa toro mai na tamata me vakarokoroko vua, a sa dau dodoka yani na ligana o koya me tauri koya ka reguca.

⁶ A sa cakava vakaoqo o Apisalome vei ira kecega na Isireli era lako mai vua na tui me ra kerea na vakatulewa dodonu, ka sa rawa kina o koya na yalodra na Isireli.

⁷ Ia ni oti e va na yabaki, a qai kaya vua na tui o Apisalome, “Au kerea me'u sa lako mada ki Epironi ka vakayacora na noqu vosa ni yalayala ka'u a vakayacora vei Jiova.

⁸ Ena noqu a tiko voli e Kesuri mai Siria, au a yalataka vei Jiova ni kevaka ena vakalesui au tale ki Jerusalemi, au na la'ki qaravi koya mai Epironi.”

⁹ A sa kaya na tui, “Mo lako ena vakacegu.” A sa qai lako yani ki Epironi o Apisalome.

¹⁰ A tala eso na tamata o Apisalome me ra lako lo vei ira na nodra mataqali kece na Isireli, me ra kaya, “Ni o ni sa rogoca na domo ni davui, mo ni qai kaya, ‘Sa tui mai Epironi o Apisalome.!”

¹¹ Era a lako vata kei Apisalome e lewe rua na drau na tamata mai Jerusalemi; era a sureti me ra lako vata kaya ka ra sega ni kila kina e dua na ka.

¹² Ia ni vakacabora tiko na i soro o Apisalome, a talatala o koya ki na koro o Kilo me la'ki lako mai o Eitofeli na kai Kilo ka daunivakasala vei Tevita. A tubu cake me kaukauwa na vere, ni ra a lewe levu cake tikoga na tamata era a vuki vei Apisalome.

Dro mai Jerusalemi o Tevita

¹³ A lako mai vei Tevita e dua na tamata daukau i tukutuku, ka kaya, “Sa golevi Apisalome na yalodra na Isireli.”

¹⁴ A sa kaya o Tevita vei ira kece na tamata era tu vata mai Jerusalemi, “Me da cavutu, ka dro, de da qai sega ni dro tani rawa mai vei Apisalome; mo ni kusarawa, ka lako, de tauri keda vakasauri o koya, ka vakacacani keda, ka la'ki ravuravu ena i seleiwau ena koro.”

¹⁵ Era a kaya vua na tui na nona tamata, “Mo ni raica, na neimami turaga na tui, ni keimami sa tu vakarau tu na nomuni tamata me cakava na ka kecega o ni sa vinakata.”

¹⁶ A lako yani na tui, ka ra muri koya kece na nona lewe ni vale. A laivi ira tiko na tui e lewe tini na yalewa watina lalai, me ra vakatawa vale.

¹⁷ A lako yani na tui, ka ra muri koya kecega na tamata; era a qai la'ki tucake tu ena i otioti ni vale.

¹⁸ Era a qai tayabe siviti koya kece na nona tamata, ka vakakina o ira na kai Kireci kei ira kecega na kai Pileci; era tayabe talega ena mata ni tui na kai Kaca era lewe 600 ka ra a muri koya mai Kaca.

¹⁹ A qai vosa na tui vei Itai na kai Kaca, ka kaya, “A cava o sa lako talega kina kei keimami? Mo lesu tale ka la'ki tiko vua na tui vou; ni o sa kai tani ka tiko vulagi.

²⁰ O a qai lako wale ga mai ena noa, ka cava na vuna me'u vakatara kina mo mai lako voli vata kina kei au? Au sega tiko mada ni kila na vanua ka'u lako tiko kina. Mo lesu tale, ka kauti ira vata lesu na wekamu; ka me yalololoma ka dina vei kemuni o Jiova.”

²¹ A vosa vua na tui o Itai, ka kaya, “Noqu turaga na tui, au sa yalataka oqo ena yaca i Jiova ni'u na lako vata kei kemuni ena vanua cava ga o ni lako kina, ka veitalia ke la'ki tini ena mate.”

²² A sa kaya vei Itai o Tevita, “Mo lako yani ki liu.” A lako yani o Itai na kai Kaca kei ira kecega na nona tamata, kei ira na lalai ka ra tu vata.

²³ Era a tagi vakadomoilevu na lewenivanua kecega ni sa lako yani na tui kei ira na tamata taucoko. A sa kosova na tui na soniwai o Kitironi, ka muri koya yani o ira na nona tamata ni ra sa lako yani ki na vanua lala.

²⁴ A rau a lako cake mai o Epaiaca kei Setoki, kei ira kecega na Livai era tu vata ka ra colata tiko yani na Kato ni Veiyalayalati ni Kalou. Era a qai tauca sobu na Kato ka sega ni laveta cake tale me yacova na gauna era sa lako tani kina mai na koro o ira kece na tamata.

²⁵ A qai vosa na tui vei Setoki, ka kaya, “Mo ni kauta tale yani na Kato ni Veiyalayalati ki na koro. Ke'u sa kune loloma ena mata i Jiova, ena vakalesui au tale o koya ena dua na siga me'u raica na Kato oqo kei na kena i tikotiko.

²⁶ Ia kevaka au sa sega ni kune loloma e matana, ia, me qai vakayacora ga o koya vei au na ka sa vinaka vua.”

²⁷ A sa kaya talega na tui ki vei Setoki na bete, “Raica, mo lesu tale ena vakacegu ki na koro, o iko kei Epaiaca, kei rau na luvemudrau tagane, o ya o Eimasi na luvemu kei Jonacani na luve i Epaiaca.

²⁸ Ia, au na wawa ena i tatakoso ni uciwai ena vanua lala me yacova ni sa yaco mai vei au na nomudou i tukutuku.”

²⁹ Ena ka oqo e rau sa mani colata lesu tale kina na Kato ni Veiyalayalati ki Jerusalemi o Setoki kei Epaiaca, ka rau la'ki tiko mai kea.

³⁰ A cabe cake o Tevita ena i cabecabe ki na Delana ni Veiolive, ka tagi voli ena gauna a lako tiko kina; a sega ni vakaivava o koya ka ubia na uluna me i vakatakilakila ni nona lolosi. Era a ubia talega na uludra na tamata kece era muri koya, ka ra tagi ni ra cabe cake tiko.

³¹ Ia sa tukuni vei Tevita ni o Eitofeli e dua vei ira era bukivere vata kei Apisalome. A sa kaya o Tevita, “I Jiova, au masuti kemuni mo ni vukica na vuku i Eitofeli me lialia.”

³² Ia ni sa yaco ki delana o Tevita, ena vanua ni vakacaboisoro, sa tavaki koya mai kea o Usaia na kai Ariki, ka sa kadresu tu na nona kote ka kabita na uluna na kuvu ni qele.

³³ A sa kaya o Tevita, “Kevaka o lako vata kei au, o na sega ni vukei au ka vakaogaogataki au ga.

³⁴ Ia o na rawa ni vukei au ga kevaka o lesu ki na koro ka la'ki kaya vei Apisalome ni o sa na qaravi koya ena yalodina me vaka na nomu dau qaravi tamana. Ena ka oqo ena rawa ni vakamalumalumutaki kina na i vakasala i Eitofeli ena vukuqu.

³⁵ O rau na bete o Setoki kei Epaiaca e rau na tiko mai kea kei iko. Mo tukuna vei rau na veika kece o rogoca mai na valenitui.

³⁶ Raica, e rau tiko talega kei rau mai kea o rau na luvedrau, o Eimasi na luve i Setoki, kei Jonacani na luve i Epaiaca; ia mo dou qai talai rau mai vei au me rau mai tukuna na veika kecega dou a rogoca.

³⁷ A lako ki na koro o Usaia na i tau i Tevita, ena gauna a curu kina ki Jerusalemi o Apisalome.