2 Samuela 14 - Vakavakadewa Vou kei na iVola tale eso

Lakovi o Apisalome

¹ Ia oqo, a kila o Joape na luve i Seruwaia, ni a gole vei Apisalome na yalona na tui.

² A talatala ki Tikoa o Joape, ka kauta mai kina e dua na yalewa vuku, ka kaya vua, “Mo vakalecaleca mada me vaka e dua sa yasovaka na mate, mo la'ki tabuisulu, ka mo kakua ni lumuti iko ena waiwai, ia na nomu i tovo me vaka e dua na yalewa sa vakaloloku vakadede.

³ Ia mo lako yani vua na tui, ka la'ki vosa vakaoqo vua.” A vakavulica vua na vosa me la'ki kaya, o Joape.

⁴ Ia ni lako vua na tui na yalewa ni Tikoa, a cuva e matana, ki na qele, vakarokoroko, ka kaya, “Mo ni vukei au, oi kemuni na tui.”

⁵ A sa kaya na yalewa, “E dina ni'u sa yada, ni sa mate na watiqu.

⁶ Ia sa lewe rua na luvequ tagane na nomuni vada, rau a veivala ena lomanivanua; a sega ni dua e tataro, a mani dua vei rau, a mokuti koya mate na kena i karua.

⁷ Ia era a cudruvi au vakalevu, na mataqali taucoko, ka ra kaya, “Mo soli koya mada mai ka mokuta mate na tacina, me keimami vakamatei koya me i sau ni tacina ka a vakamatea. Ia kevaka era na cakava oqo, sa na qai sega ni dua na luvequ tagane e vo! Era sa na vakarusa vakadua na noqu i nuinui, ka sa na sega na luvena tagane na watiqu me vakabula tiko kina na yacana.”

⁸ A sa kaya vua na tui, “Mo lesu tale ki na nomu vale, ia au sa na qai vakatau lewa ena vukumu.”

⁹ A sa kaya na yalewa ni Tikoa, “Me bale vei au na kena ca kemuni na noqu turaga na tui, ka me baleta talega na mataqali i tamaqu; ia me kakua ga ni cala na tui kei na nona i tikotiko vakaturaga.”

¹⁰ A sa kaya na tui, “Kevaka e dua e vosa tale vei iko, mo kauti koya mai vei au, ena qai sega ni tarai iko tale.”

¹¹ A sa kaya na yalewa, “Kemuni na turaga na tui, mo ni yalo vinaka ka masuti Jiova na nomuni Kalou, me tarova na veivakamatei, me kakua ni saumi na dra me vakamatei na luvequ tagane. A sa kaya na tui, “Me vaka sa bula o Jiova au sa yalataka ni na sega ni vakamatei na luvemu.”

¹² A qai kaya na yalewa, “Mo ni rogoca tale mada e dua na nona vosa na nomuni vada vei kemuni na noqu turaga na tui.” A sa kaya na tui, “Mo vosa ga mai.”

¹³ A sa kaya na yalewa, “A cava o ni sa nakita kina na ca vakaoqo vei ira na tamata ni Kalou? Ni o ni sa tauca na lewa oqo, o ni sa vakacalai kemuni tale, ni o ni a sega ni la'ki kauta tale mai na luvemuni ka sa biu vakatikitiki.

¹⁴ Eda na mate vakaidina kecega; ni da sa vaka na wai sa tasova ki na qele, ka sa sega ni rawa me la'ki takivi tale mai. Ni sa sega ni kauta tani na nona bula e dua na tamata na Kalou, ia na tui e dodonu me vakasaqara e dua na sala me vakalesui mai kina na tamata sa vakasevi tani.

¹⁵ Ia na ka oqo, au sa mai vosa kina vei kemuni na noqu turaga na tui, ni ra a vakarerei au na tamata; ka sa mani nanuma kina na nomuni vada, ka vaka, ‘Au na qai vosa mada vua na tui, de rawa beka ni vakadonuya na nona kerekere na nomuni vada.

¹⁶ Ni na rogoca na tui, ka na vakabula na nona vada mai na liga ni tamata ka tovolea me vakamatei keirau vata kei na luvequ tagane mai na i votavota ni Kalou.’

¹⁷ A sa kaya na nomuni vada, ‘Me ka mada ga ni veivakacegui na vosa ni noqu turaga na tui,’ ni sa vaka na agilosi i Jiova o koya, ni rawa ni vakatakilakilataka na vinaka kei na ca. Me tiko mada ga kei kemuni o Jiova na nomuni Kalou!”

¹⁸ A sa kaya na tui vua na yalewa, “Mo kakua mada ni vunia vei au e dua na ka au na tarogi iko kina.” A sa kaya na yalewa, “Mo ni vosa mada mai na noqu turaga na tui.”

¹⁹ A sa kaya na tui, “A sega beka li ni vukei iko o Joape ena veika kece oqo?” A sa sauma na yalewa ka kaya, “Me vaka ni o ni sa bula na noqu turaga na tui, sa sega ni'u qai levea rawa kina na nomuni taro kecega. Io, sai koya ga nomuni tamata o Joape sa tukuna vei au na veika me'u kaya ka vakayacora.

²⁰ Ia sa kitaka vakaoqo o Joape na nomuni tamata me rawa ni veisautaka se vakadodonutaka kina na i lakolako o ni sa mua tiko kina. Ia sa tu ga vei kemuni na noqu turaga na vuku me vaka na agilosi ni Kalou, ka o ni sa kila na veika kecega e vuravura.”

²¹ A qai vosa na tui vei Joape, ka kaya vua, “Raica, au sa vakadonuya oqo na ka o vinakata; mo lako ka la'ki kauta tale mai na cauravou o Apisalome.

²² A cuva vakatoboicu ki na qele o Joape, a sa vakarokoroko, ka vakavinavinaka vua na tui. A sa kaya o Joape, “Sa kila edaidai na nomuni tamata ni'u sa kune loloma e matamuni na noqu turaga na tui, ni o ni sa vakadonuya na kerekere ni nomuni tamata.”

²³ Sa qai lako yani o Joape ki Kesuri, ka kauti Apisalome mai ki Jerusalemi.

²⁴ A sa kaya na tui, “Me la'ki tiko ga vakatikitiki ki nona vale, ka me kakua ni rairai mai vei au.” A mai tiko yani vakatikitiki e nona vale o Apisalome, ia a sega ga ni rairai vei koya na tui.

Veivinakati Tale o Apisalome kei Tevita

²⁵ A sa sega ni dua vei ira na Isireli me qoroi ena kena rairai vinaka me vakataki Apisalome; ni sa sega na ka me vakamelei vua me tekivu mai uluna ki yavana.

²⁶ Sa vavaku sara na drauniuluna, ka sa dau kotiva vakadua ena veiyabaki ni sa balavu sivia ka bibi vua. Na kena bibi e vakarautaki ni sivia e 2 na kilokaramu ena i vakarau ni bibi vakatui.

²⁷ Vei ira na luvei Apisalome, e ratou lewe tolu na tagane ka dua na yalewa. Na yaca i luvena yalewa o Tema; a sa yalewa matavinaka o koya.

²⁸ A tiko mai Jerusalemi o Apisalome, me yabaki rua, ka sega ni raici koya na tui.

²⁹ A talatala o Apisalome vei Joape, me kauti koya vua na tui; a bese ni lako yani o Joape. A talatala tale vua, ia a bese ga ni lako yani vua o Joape.

³⁰ A sa kaya vei ira na nona tamata o Apisalome, “Ni raica ni sa voleka na noqu tikinivanua ki na tikinivanua i Joape, ka sa tubu tu kina na nona loga ni barile. Ni la'ki vakama mada.” Era a qai vakama na tikinivanua o ya na tamata i Apisalome.

³¹ A cavutu o Joape, ka lako vei Apisalome ki na nona vale, ka kaya vua, “A cava era sa vakama kina na noqu tikinivanua na nomu tamata?”

³² A sa kaya vei Joape o Apisalome, “Raica, au a talatala yani vei iko, ka kaya, ‘Mo lako mada mai ki ke, me'u talai iko vua na tui, mo la'ki kaya, ‘A cava beka au a lakovi kina mai Kesuri? E vinaka cake me'u tiko ga mai kea.’ Ia oqo me'u raici koya mada na tui, ia kevaka sa tu vei au e dua na cala, me vakamatei au o koya!”

³³ A lako vua na tui o Joape, ka tukuna vua; a qai kacivi Apisalome, o koya na tui. A lako mai vua na tui, o koya, a vakacuva na matana ki na qele ena mata ni tui; a reguci Apisalome na tui.