2 Samuela 13 - Vakavakadewa Vou kei na iVola tale eso

Eminoni kei Tema

¹ Ia oqo, a dua na ganei Apisalome na luve i Tevita, a matavinaka sara, na yacana o Tema; ia ni oti e dua na gauna, a domoni koya o Eminoni na luve i Tevita.

² A kani Eminoni na rarawa ena vuku ni nona domoni Tema na ganena, ka sa la'ki vakatauvimatetaki koya kina; ni a goneyalewa o koya, ka nanuma o Eminoni ni na dredre sara me cakava vei Tema e dua na ka.

³ A sa dua na i tau i Eminoni, na yacana o Jonatapi, na luve i Semea na tuakai Tevita; ia a tamata qaseqase sara o Jonatapi.

⁴ A sa kaya vei Eminoni o Jonatapi, “A cava o sa yago ca tikoga kina vakaoqo ena veisiga, ni o sa luvenitui? E rawa li ni o tukuna vei au?” A sa kaya vua o Eminoni, “Au sa rui domoni Tema, na ganei Apisalome na taciqu.”

⁵ A sa kaya vua o Jonatapi, “Mo la'ki davo sobu ena nomu i mocemoce, ka mo tauvi mate vakalasulasu; ia ni lako mai o tamamu me raici iko, mo kaya vua, ‘Me lako mada mai o Tema na ganequ, me vakani au, me vakarautaka na kequ kakana e mataqu, ka me'u kania mai na ligana.”

⁶ A koto sobu o Eminoni, ka lasutaka ni tauvi mate; ia ni lako mai na tui me raici koya, a kaya vua o Eminoni, “Me lako mada mai o Tema na ganequ, me mai bulia e vica na keke e mataqu, me'u kania mai na ligana.

⁷ A talatala ki vale vei Tema o Tevita, ka kaya, “Mo lako mada ki na vale i Eminoni na ganemu, ka caka kena.”

⁸ A lako o Tema ki na vale i Eminoni na ganena; ia a davo koto o koya. A kauta mai na falawa o Tema, natuka, bulia e matana eso na keke, ka vavia.

⁹ A kauta na i tavuteke ka sovara e matana; ia a bese ga ni kana o koya. A sa kaya o Eminoni, “Me ra lako tani ki tautuba na tamata kecega.” Era a mai lako tani yani na tamata.

¹⁰ A sa kaya vei Tema o Eminoni, “Mo kauta mai ki na rumu na kakana, ka me'u kania mai na ligamu.” A taura o Tema na keke ka bulia ka kauta ki loqi vei Eminoni na ganena.

¹¹ Ia ni kauta vua o koya me kania, a tauri Tema o koya, ka kaya vua, “Me daru veimoceri mada na ganequ.”

¹² A sa kaya vua o Tema, “Me kakua sara oqo na ganequ, mo kakua ni vakacacani au, ni sa sega ni dau caka vakaoqo e Isireli; mo kakua ni kitaka na ka lialia oqo.

¹³ Ia o au, au na la'ki colata tu li e vei na qau i rogorogo ca kei na noqu madua? Ia o iko, o na okati me vaka e dua vei ira na tamata lialia e Isireli. Ia ni vaka tu oqo, au sa vakamasuti iko mo vosa mada vua na tui; ni na sega ni rawa me bureitaki au vei iko o koya.

¹⁴ Ia a sega ni via vakarorogo vei Tema o Eminoni; ka ni a kaukauwa cake o koya mai vei Tema, a mani rawai koya ka vakacacani koya ni sa kucuva.

¹⁵ Ni oti o ya, a sa qai tarai Eminoni e dua na yalo ca levu ni sa cati Tema vakalevu; ka sa levu cake sara na nona cati koya mai na nona a domoni koya e liu. A sa kaya vua o Eminoni, “Lako tani ki tuba!”

¹⁶ A sauma o Tema ka kaya, “I ganequ, mo kakua mada. Na nomu via vakatalai tani vakaoqo e rui cala levu cake sara mai na ka o sa cakava oqo vei au.” Ia sa bese ga ni via rogoci koya o Eminoni.

¹⁷ A sa kaciva na nona tamata dauveiqaravi ka kaya vua, “Mo kauta tani na yalewa oqo ki tautuba, ka sogota vua na katuba!”

¹⁸ A sa kauti koya ki tautuba na dauveiqaravi ka lokataka vua na i sogo ni katuba. A sa daramaka voli o Tema na i sulu balabalavu ka veivolavolai, ka oqo na mataqali i sulu era dau daramaka na luvedra yalewa na tui era sega ni se moce vata na tagane ena gauna o ya.

¹⁹ A sa kaburaka na dravusa ki uluna o Tema, a qai dresulaka na nona i sulu veivolavolai ka daramaka tiko; ka ubia na matana ena ligana ka lako tagitagi yani ena domoilevu.

²⁰ Ni sa raici koya o Apisalome na ganena, a sa tarogi koya, “Sa vakacacani iko beka li o Eminoni na ganemu? Sobo i ganequ, mo kua soti ni rarawataka vakalevu na ka oqori. O drau mata ni veiganeni ga, ia mo kua sara kina ni tukuna vua tale e dua.” A sa tiko voli ga kina o Tema ena vale i Apisalome, ka sa bikai ena yalorarawa kei na galili.

²¹ Ia ni rogoca na veika kecega oqo o Tevita na tui, a cudru sara kina vakalevu.

²² Ia a sega ni vosataka na ka vinaka se ca vei Eminoni o Apisalome; ni a cati Eminoni o Apisalome ena vuku ni nona a vakacacani Tema na ganena.

Veisausaumi nei Solomoni

²³ Ia ni oti e rua na yabaki, era a tiko vei Apisalome eso na tamata daukoti sipi mai Pealiasori voleka ki Ifereimi; a sureti ira, ka soqoni ira vata kece mai na luvena tagane na tui o Apisalome.

²⁴ A lako vua na tui o Apisalome, ka kaya, “Raica, era sa tiko vei au na nomuni tamata eso na daukoti sipi; au kerei kemuni na tui, kei ira na nomuni tamata, mo ni lako vata kei au na nomuni tamata.”

²⁵ A sa kaya vei Apisalome na tui, “Me kakua ga, na luvequ, me keimami lako yani de keimami na vakaocai iko.” A cikevi koya tikoga o Apisalome, ia a sega ga ni lako, ka sa mani vosa vakalougatataki koya ga.

²⁶ A sa kaya o Apisalome, “Ia kevaka e sega, me lako vata mada kei keimami o Eminoni na tuakaqu.”

²⁷ Ia a qai cikevi koya tikoga o Apisalome, ka soli Eminoni kina na tui kei ira kecega na luvena tagane me ra lako vata kaya.

²⁸ A vakaroti ira na nona cauravou o Apisalome, ka kaya, “Ni qarauna vinaka sara ni sa na mamarau mai ka mateni ena waini o Eminoni, ka'u na qai kaya vei kemuni, “Ni mokuti koya,! mo ni qai vakamatei koya. Mo ni kakua ni rere, ni'u sa vakaroti kemuni. Mo ni yalo doudou ka qaqa.”

²⁹ Era a cakava vei Eminoni na ka a vakaroti ira kina na nona tamata o Apisalome. Era a qai cavutu o ira kecega na luvena tagane na tui, ka ra dui vodoka na nodra meuli na tamata yadua ka dro

³⁰ Ia ni ra a lako tiko ena sala, a yaco mai vei Tevita e dua na i tukutuku vuka, ka vaka, “Sa vakamatei ira kecega na luvena tagane na tui o Apisalome, ka sega tale ni vo e dua vei ira.”

³¹ A qai tucake na tui, dresulaka na nona i sulu, ka davo ena qele; era a tucake kecega o ira na nona tamata, ra dresulaka talega na nodra i sulu, ka davo talega ena qele.

³² A qai vosa o Jonatapi na luve i Semea na tuakai Tevita, ka kaya, “Me kakua ni nanuma na noqu turaga, ni ra sa vakamatei o ira kecega na cauravou na luvena na tui; o Eminoni duadua ga sa mate, ni a nakita na ka oqo o Apisalome mai na siga a vakacacani Tema kina na ganena o koya.

³³ Ia oqo me kakua ni katona na noqu turaga na tui, me la'ki vakabauta kina ni ra a mate taucoko na luvena; ka ni a mate duadua ga o Eminoni.”

³⁴ A dro o Apisalome. Ia ni rai yani na cauravou ka yadravi ira tiko, a raica o koya ni ra lewe vuqa na tamata era lako tiko mai ena sala vaka ki Onoraimi ena yasa ni ulunivanua.

³⁵ A sa kaya vua na tui o Jonatapi, “Raica e ratou sa lako tiko mai oqo na luvemuni; me vaka au a kaya na nomuni tamata, ni sai iratou ga.”

³⁶ Ia ni vosa oti o koya, e ratou a tadu mai na luvena na tui, ka ratou tabalaka na tagi, ka vaka tale kina na tui kei ira kece na nona tamata.

³⁷ A dro o Apisalome, ka lako vei Talimei na luve i Amiute, na tui Kesuri. A tagicaka na luvena ena veisiga o Tevita.

³⁸ A dro o Apisalome, ka lako ki Kesuri, ka la'ki tiko mai kea me yabaki tolu.

³⁹ A gadreva tu ga o Tevita na tui me lako yani vei Apisalome; ni sa vakacegui ena vuku ni mate i Eminoni.