2 Samuela 12 - Vakavakadewa Vou kei na iVola tale eso

Tukutuku i Necani kei na Veivutuni i Tevita

¹ A talai Necani vei Tevita o Jiova. A lako vei Tevita o Necani, ka kaya vua, “Sa tiko ena dua na koro e lewe rua na tamata, e dua e vutuniyau, ka dua e dravudravua.

² Na tamata vutuniyau sa levu sara na nona qele ni sipi, kei na nona qele ni bulumakau;

³ ia sa sega vua na tamata dravudravua e dua na ka, e dua wale ga na luve ni sipi yalewa lailai, ka volia o koya. A susuga o koya ka sa tubu cake kaya kei iratou na luvena; a dau kania eso na tiki ni kena na kena i taukei, gunu mai na nona bilo, ka dau koto e lomaserena, ka sa vaka e dua na luvena yalewa vua.

⁴ A lako vua na tamata vutuniyau e dua na vulagi, ia sa sega ni solia na tamata vutuniyau e dua na nona sipi se na nona bulumakau vua na tamata vulagi. Ia a la'ki taura na nona luve ni lami yalewa na tamata dravudravua ka vakamatea me kania na nona vulagi.”

⁵ A waqa vakalevu na cudru i Tevita vua na tamata o ya, a kaya vei Necani o koya, “Me vaka sa bula o Jiova, sa dodonu me mate na tamata a cakava na ka oqo;

⁶ ia me na sauma vakava na i sau ni lami ena vuku ni caka ca oqo o koya ka sega sara ga vua na loloma

⁷ A qai kaya vei Tevita o Necani, “Sai kemuni ga na tamata o ya. A vosa vakaoqo o Jiova na Kalou ni Isireli, ‘Au a lumuti iko mo nodra tui na Isireli, ia au a vakabulai iko mai na liga i Saula;

⁸ au a solia talega vei iko na nona mataqali na nomu turaga, ka soli iratou na watina na nomu turaga ki lomaseremu, au a solia talega vei iko na nodra vuvale na Isireli kei ira na Juta; ia kevaka sa rui lailai o ya, au na vakaikuritaka vakalevu vei iko.

⁹ A cava o a beca kina na vosa i Jiova, ka cakava na ka ca e matana? O a vakamatei Uraia na Itaiti ena i seleiwau, taura na watina me watimu, ka vakamatei koya ena nodra i seleiwau na luve i Amoni.

¹⁰ Ia oqo ena sega kina ni yali mai na nomu vale na i seleiwau ka tawa mudu; me vaka ni o a beci au, ka taura na wati Uraia me watimu.’

¹¹ A vosa vakaoqo o Jiova, ‘Raica, au na vakatubura vei iko na ca mai na nomu vale, ia au na kauti iratou tani na watimu e matamu, ka soli iratou ki vua na wekamu, ia ena moceri iratou na watimu o koya ena rarama ni siga oqo.

¹² O a cakava vakavuni o iko; ia au na cakava oqo e matadra kecega na Isireli ena rarama ni matanisiga.

¹³ A sa kaya vei Necani o Tevita, “Au sa cala vei Jiova.” A sauma vei Tevita o Necani, “Sa vosoti kemuni o Jiova; ka o ni na sega ni mate.

¹⁴ Ia, me vaka ga ni o ni a vakayacora na i tovo ca oqo ka beci kina o Jiova, ena mate vakaidina talega na luvemuni.”

¹⁵ E a qai lako yani o Necani ki na nona vale. A vakavuna o Jiova me tauvi mate bibi na gone lailai ka a kunekunetaki mai vua na wati i Uraia kei Tevita.

Mate na Luve i Vaciseva

¹⁶ E a vakamasuta na Kalou o Tevita me bula cake mai na gone. A sega ni via kania e dua na kakana, ka sa davo koto ga ena buturara ni nona rumu ni moce ena veibogi.

¹⁷ Era a lako vua na qase ni nona vale, ka la'ki tu e tikina me ra tovolea me vakaduri koya cake mai, ia sa bese kaukauwa ga o koya, ka sega talega ni via kania e dua na ka vata kei ira.

¹⁸ Ena i kavitu ni siga, a qai ciba kina na gone. Era a rere ni tukuna vei Tevita na nona tamata ni sa mate na gone; ni ra kaya, “Raica, ni sa bula tiko na gone, keimami a vosa vua, sa sega ni via rogoci keimami o koya; ia ena qai tukuni rawa vakacava vua ni sa mate na gone?”

¹⁹ Ia ni raica o Tevita ni ra sa vakasolokakana tiko o ira na nona tamata, a kila sara o koya ni sa mate dina na gone. A sa qai tarogi ira, “Sa mate li na gone?” Era a kaya vua, “Io, sa mate o koya.”

²⁰ A qai tucake mai na buturara ni vale o Tevita, ka sisili, ka seruta na uluna, ka veisautaka na nona i sulu. A qai lako o koya ki na vale i Jiova, me lotu kina. Ia ni lako o koya ki na valenitui, a sa kere kakana ka kania sara ena gauna ga sa vakarautaki kina.

²¹ Era a qai kaya vua na nona tamata, “Sa dredre sara me keimami kila na ka oqo. Ena gauna e se bula tiko kina na gone, o ni a tagi ena vukuna ka sega ni kana; ia ena gauna ga sa mate kina, o ni sa duri cake mai ka kana!”

²² A sa sauma vei ira o Tevita vakaoqo: “Io, au a lolo ka tagi ni sa bula tiko na gone. Au a nanuma ga ni na yalololoma vei au o Jiova ka sega ni vakatara me mate na gone.

²³ Ia oqo ni sa mate o koya, a cava li me'u lolovaka? E rawa beka li vei au me'u vakabulai koya tale? Au na qai lako ki na vanua sa tiko kina ena dua na siga, ia sa sega ga ni rawa vua me lako take mai vei au.”

Sucu o Solomoni

²⁴ Sa qai vakayalovinakataki Vaciseva na watina o Tevita. A sa moceri koya, ka sa vakasucuma o Vaciseva e dua tale na gonetagane, ka vakayacana o Tevita me o Solomoni. A sa lomana na gonetagane lailai o Jiova

²⁵ ka sa vakarota na parofita o Necani me vakatoka na yacana o Jetitaia, baleta ni sa lomani koya o Jiova.

Sa Taura Vakaukauwa na Koro o Rapa o Tevita

²⁶ A sa tomana voli ga o Joape na nona valuti Rapa, ka nodra koro levu na luve i Amoni, ka sa voleka sara ni vesuka vakaukauwa na koro turaga o ya.

²⁷ A sa tala eso na tamata vei Tevita o Joape, ka kaya, “Au sa valuta na koro o Rapa, ka taura vakaukauwa na nodra i vurevure ni wai.

²⁸ Ia mo ni vakasoqoni ira vata na tamata sa vo ka valuta na koro levu oqo, ka mo ni taura vakaukauwa. Au sega ni vinakata me okati ena yacaqu na kena vakadrukai na koro oqo.”

²⁹ A sa qai vakasoqoni ira vata na tamata kece o Tevita, ka lako yani ki Rapa me valuta, ka sa rawata na qaqa.

³⁰ Mai na uluna na kalou matakau ni Amoni o Moloke, a sa luvata o Tevita na nona i sala vakaturaga koula ka kena bibi e 35 kilokaramu ka sa koto kina e dua na vatu talei. A sa taura na vatu talei o ya o Tevita ka biuta ki na nona i sala vakatui. A sa kauta talega o Tevita e dua na wase levu ni tokinivalu mai na koro levu o ya.

³¹ A kauti ira yani na tamata era a tiko kina o koya, ka vakacakacakataki ira ena boroboro, na kelikeli ena piki, ena matau kaukamea, ka lesi ira ki na cakacaka ni buli biriki; a cakava vakakina oqo ki na nodra veikoro kece na luve i Amoni. A lesu tale o Tevita ki Jerusalemi kei ira kecega na tamata.