2 Samuela 11 - Vakavakadewa Vou kei na iVola tale eso

Tevita kei Vaciseva

¹ Ena vula i tubutubu, na gauna ka ra dau lako kina i vala na tui, a qai talai Joape o Tevita kei ira na nona turaganivalu, kei ira kecega na Isireli; era a ravuti ira na luve i Amoni, ka buku na druadrua mai Rapa. A tiko ga mai Jerusalemi o Tevita.

² Ia ena dua na yakavi, a tucake o Tevita mai na nona i mocemoce ka la'ki gade voli ena dela ni valenitui. A rai sobu mai na dela ni nona vale ka raica e dua na yalewa ni sisili tiko; a totoka ka matavinaka sara na yalewa o ya.

³ A talatala o Tevita me vakatarogi na yalewa o ya. A sa kaya e dua, “Na luve i Iliami o koya, o Vaciseva na yacana, na wati Uraia na Itaiti.”

⁴ A tala eso na tamata o Tevita, ka la'ki kauti koya mai; a lako mai vua o koya na yalewa, ka veimoceri vata kaya, ni a vakasavasavataki koya tiko mai na nona qeleqelewa a lesu tale na yalewa ki na nona vale.

⁵ A bukete mai o Vaciseva, a talatala me tukuni vei Tevita, ka vaka, “Au sa bukete.”

⁶ A talatala vei Joape o Tevita, ka vaka, “Mo talai Uraia na Itaiti mai vei au.” A talai Uraia vei Tevita o Joape.

⁷ Ia ni lako mai vua o Uraia, a tarogi koya o Tevita, se sa vaka e vei o Joape, kei ira na tamata, ka vaka talega e vei na i valu.

⁸ A sa kaya vei Uraia o Tevita, “Mo lako ki na nomu vale ka vakacegu vakalailai.” A sa lako tani o Uraia, ka sa vakauta ki na nona vale o Tevita e dua na ka ni loloma.

⁹ Ia sa sega ni lesu ki na nona vale o Uraia; a sa moce ga ena matamata ni valenitui kei ira na matayadra ni tui.

¹⁰ Ni sa rogoca o Tevita ni sa sega ni lako ki nona vale o Uraia, a sa tarogi koya, “O se qai lesu mada ga mai oqo ena nomu a yali tu vakadede. A cava o sega ni lako kina ki na nomu vale?”

¹¹ A sauma o Uraia ka kaya, “O ira na Isireli kei na Juta era sa tiko mai na buca ni valu, ka sa tiko vata kei ira na Kato ni Veiyalayalati. Na noqu turaganivalu o Joape kei ira na nona i vakalesilesi era sa keba tiko ena vanua tadola. E rawa li vakacava vei au me'u lako ki na noqu vale, me'u kana ka gunu, ka mocevata kei na watiqu? Me vaka o ni sa bula, au sa yalataka ni na sega ni rawa vei au me'u vakayacora na veika oqo!”

¹² A sa qai kaya kina o Tevita, “Mo tiko mada eke edaidai, ka'u na qai vakauti iko lesu tale ni mataka.” A sa tiko ga e Jerusalemi o Uraia ena siga o ya kei na siga ka tarava.

¹³ A sa sureti koya o Tevita me rau vakayakavi vata ka cakava me mateni levu. Ia ena bogi o ya, a sega ni lako ki na nona vale o Uraia; a sa moce ga ena nona i mocemoce kei ira na matayadra ni valenitui.

¹⁴ Ia ena mataka cake, a sa vola o Tevita e dua na i vola vei Joape, ka sa solia vei Uraia me kauta vua.

¹⁵ A sa vola vakaoqo ena i vola: “Mo biuti Uraia ena yatu e liu ni buturara ni valu, ena vanua e katakata duadua kina na i valu. Dou qai suka tani mai ka laivi koya yani me vakamatei.”

¹⁶ Ia ni sa valuta tiko na koro o Joape, a sa vakatalai Uraia sara ki na tikina e kila ni ra kaukauwa sara kina na meca.

¹⁷ Era a curu mai tautuba na lewenikoro ka valuta na mataivalu i Joape; a ra bale mate kina eso vei ira na tamata i Tevita, ka vakakina o Uraia.

¹⁸ A talatala o Joape ka tukuna vei Tevita na i tukutuku kecega ni valu;

¹⁹ a sa vakaroti koya ka talaki me vakaoqo, “Ni o sa tukuna oti vua na tui na i tukutuku ni valu,

²⁰ ena cudru beka o koya ka na tarogi iko, ‘A cava o ni a toro volekata kina na koro ena i valu? O ni sega beka ni kila ni ra rawa ni vanataki gasau mai na dela ni bainikoro?

²¹ O ni sa guilecava beka na sala ka vakamatei kina o Apimeleki na luve i Kitione? A yaco oqo mai Tipesi, ni a viritaka sobu mai e dua na yalewa na tiki ni vatu ni qaqi sila mai na dela ni bainikoro ka vakamatei koya. A cava li na vuna o ni a toro volekata kina na bai?’ Kevaka sa taroga vei iko vakaoqo na tui, mo qai kaya, ‘Sa mate talega kina na nomuni tamata o Uraia.’ ”

²² A sa lako yani o koya ka talai, a sa kaya vei Tevita na veika kece sa vakarota vua o Joape me tukuna.

²³ A sa kaya, “O ira na meca era kaukauwa cake sara vei keimami ka ra curu mai ki tautuba me keimami vala kaya ena vanua tadola, ia keimami qai vakalesui ira lesu ki na nodra matamata ni koro.

²⁴ Era a qai vanataka mai na gasau ni nodra dakaititi mai na dela ni bai, ka ra mate kina eso na nomu tamata na tui. A sa mate talega vakakina na nomuni tamata o Uraia.”

²⁵ A sa kaya o Tevita vua na i talai, “Mo vakayaloqaqataki Joape ka tukuna vua me kakua ni lomaleqa, baleta ni sa sega ni dua ena kila rawa se o cei ena mate ena i valu. Tukuna vua me ia e dua tale na sasaga vakaivalu kaukauwa ni kena ravuti na koro, ka vesuka.”

²⁶ Ni sa rogoca o Vaciseva na wati Uraia ni sa mate na watina, a sa tagicaki koya.

²⁷ Ia ni sa oti na gauna ni nona vakaloloku, a sa talatala yani o Tevita me lako mai o koya ki na valenitui; a sa tauri koya me watina ka sa vakasucuma vua e dua na luvena tagane. Ia o Jiova sa sega ni taleitaka na ka sa cakava oqo o Tevita.