2 Samuela 10 - Vakavakadewa Vou kei na iVola tale eso

Vakadrukai Ira na Kai Amoni kei Siria o Tevita

¹ Ni dede vakalailai, a qai mate o Neasi, na nodra tui na Amoni, a mani tui o Anuni na luvena me kena i sosomi.

² A sa kaya o Tevita, “Au na caka vinaka vei Anuni na luve i Neasi, me vaka ni a caka vinaka vei au o tamana.” A talai ira kina na nona tamata o Tevita me ra vakacegui koya ena vuku i tamana. E ra a lako na mata i Tevita ki na nodra vanua na luve i Amoni.

³ Era a kaya na nodra turaga na luve i Amoni vei Anuni na nodra tui, “O nanuma li ni dokai tamamu o Tevita, ka talai ira mai kina eso me ra mai vakacegui iko? Sa sega li ni talai ira mai na nona tamata vei iko o Tevita me ra mai yamata ena koro, ka raica vakavinaka, ka me ra na qai vuaviritaka?”

⁴ A qai tauri ira na tamata i Tevita o Anuni, tasia vakavo na kumidra yadua, ka kotiva vakaleleka na nodra i sulu, io, ki dibidra ka vakatalai ira yani.

⁵ Ia ni tukuni vei Tevita, a talatala o koya me tavaki ira, ni ra a madua vakalevu o ira na tamata; a kaya na tui, “Ni tiko mada ga mai Jeriko ka me tubu mada na kumimuni, mo ni qai lako tale mai.”

⁶ Era a raica na luve i Amoni ni ra a velavela vei Tevita, ka ra a talai me ra saumi ira na kai Siria mai Peci-riopi kei ira na Siria mai Sopa, era lewe 20,000 na tamata i valu yava, kei na dua na udolu na tamata mai vua na tui Meka, ka lewe 12,000 na tamata mai Topi.

⁷ Ia ni rogoca o Tevita na kena i tukutuku, a talai Joape kei ira na mataivalu qaqa kecega.

⁸ Era a lako yani na luve i Amoni, tuvai ira na mataivalu mai na i curucuru ni matamata ni koro; ka ra tiko yani e vanua galala na Siria mai Sopa, Riopi, Topi kei Meka.

⁹ Ia ni raica o Joape ni donui koya e dua na mataivalu e liu, ka tiko e dakuna e dua tale a lesia o koya eso na tamata digitaki mai vei ira na tamata digitaki kecega e Isireli ka tuvai ira me ra veisa kei ira na kai Siria;

¹⁰ a soli ira na tamata era a vo vei Avisai na tacina, ka tuvai ira me ra veisa kei ira na luve i Amoni.

¹¹ A sa kaya o Joape, “Kevaka era sa gumatua vei iko na luve i Amoni, au na qai la'ki vukei iko.

¹² Mo kaukauwa ka yalo qaqa me daru gumatua ena vukudra na noda tamata, kei na veikoro ni noda Kalou; ia me cakava mada ga o Jiova na ka e vinaka vua.”

¹³ Ia ni toro yani o Joape kei ira na tamata era a tu vata, me ra vala kei ira na kai Siria, era a qai dro tani mai vua.

¹⁴ Ia ni ra raica na luve i Amoni ni ra a dro na kai Siria, era a qai dro tani talega mai vei Avisai, ka ra la'ki curu ki na koro. A lesu mai na i valu o Joape ni valuti ira mai na luve i Amoni, ka lako ki Jerusalemi.

¹⁵ Ia ni ra raica na kai Siria ni ra sa vakamalumalumutaki e matadra na Isireli, era a qai soqoni vata.

¹⁶ A talai o Etateseri, ka kauti ira mai na kai Siria era a tiko mai na tai ka dua ni uciwai na Uferetisi; era a lako mai ki Elami, ka liutaki ira ki Sopaki, na kavetani ni valu nei Etateseri.

¹⁷ Ni tukuni vei Tevita, a vakasoqoni ira vata na Isireli kecega o koya, kosova yani na Joritani ki na tai ka dua, ka yaco yani ki Elami. Era a tuva i valu vei Tevita na kai Siria, ka ra ia sara na vala.

¹⁸ Era a dro tani mai matadra na Isireli na kai Siria. A sa vakamatea o Tevita kei ira na nona tamata e 700 na dauvakauta na nodra qiqi ni valu na kai Siria, kei na 40,000 na lewe ni mataivalu vodo ose, ka ra vakamavoataki Sopaki na nodra i liuliu ni mataivalu, o koya a qai mate ena buca ni valu.

¹⁹ Ena gauna era sa kila kina na tui ni veivanua era qali vei Etateseri ni ra sa vakadrukai mai vei Isireli, era sa qai ia na veisaututaki kei Isireli ka qali e ruku ni nona veiliutaki. Era sa rere na kai Siria me ra vukei ira tale vakadua na luve i Amoni.