2 Pita 1 - Vakavakadewa Vou kei na iVola tale eso

¹ Mai vei Saimoni Pita, na dauveiqaravi kei na i apositolo i Jisu Karisito. Kivei ira sa vakaivotavota vata kei keitou ena vakabauta uasivi sa taukeni rawa ena vuku ni yalododonu ni noda Kalou ka noda i vakabula o Jisu Karisito:

² Me nomuni na loloma-savu kei na vakacegu ena nomuni sa kila na Kalou kei Jisu na noda Turaga.

Na Kaci ni Kalou kei na Nona Veidigitaki

³ Sa solia vei keda na Kalou ena nona kaukauwa na veika kece sara eda gadreva me baleta na noda bula kei na i tovo vakalou ena vuku ni noda kilai koya sa kacivi keda me da vakaivotavota ena nona lagilagi kei na nona vinaka.

⁴ Ena ka oqo sa solia kina o koya vei keda na i solisoli talei eso sa yalataka me rawa kina vei kemuni mo ni dro tani rawa mai na veigagadre ca sa dauveivakarusa era sa tu oqo e vuravura, ka mo ni vakaivotavota ena i tovo ni Kalou.

⁵ Ena vuku ni veika oqo, ni gumatua sara kina mo ni vakaikuritaka na nomuni vakabauta ena i valavala vinaka, kei na nomuni i valavala vinaka ena kila-ka,

⁶ na kila-ka ena i valavala malua; kei na i valavala malua ena dauvosota, kei na dauvosota ena i tovo vakalou,

⁷ kei na i tovo vakalou ena veilomani vakaveitacini, kei na veilomani vakaveitacini ena loloma.

⁸ Oqo na i valavala eso o ni gadreva, ia kevaka sa tu vakalevu sara vei kemuni na veika oqo, era na vukei kemuni mo ni tamata gugumatua ka vuavuai ena nomuni kila na noda Turaga o Jisu Karisito.

⁹ Ni o ira vakayadua sa sega vei ira na i valavala vakaoqo sa lekaleka ga na nodra rai ka mataboko, ka guilecava ni ra sa vakasavasavataki oti mai na nodra i valavala ca eliu.

¹⁰ O koya oqo oi kemuni na wekaqu, ni gumatua sara kina ka vakataudeitaka na veikacivi kei na veidigitaki ni Kalou ena nomuni bula; ni kevaka o ni vakayacora na veika oqo, o ni na sega sara ni tarabe ka bale.

¹¹ Mai na sala oqo ena soli kina vei kemuni na dodonu taucoko sara mo ni curu kina ki na matanitu tawamudu ni noda Turaga ka i Vakabula o Jisu Karisito.

¹² O koya oqo ka'u na vakananumi kemuni tikoga kina ena veika oqo, ka veitalia ga kevaka o ni sa kilai ira vinaka tiko ka sa vakataudeitaki ena i vakavuvuli dina sa tu vei kemuni.

¹³ Au nanuma ni sa dodonu ga me'u vakauqeti kemuni tiko mo ni dau nanuma na veika oqo ni'u se bula tiko,

¹⁴ ni'u sa kila ni sa voleka mai na gauna me'u luvata tani kina na yago qele oqo me vaka sa vakaraitaka vakamatata vei au na noda Turaga o Jisu Karisito.

¹⁵ Ia ka'u na tovolea ena noqu i gu taucoko me'u vakarautaka e dua na sala mo ni dau nanuma tikoga kina na veika oqo ni'u sa mate.

Na i Vakadinadina ni Lagilagi i Karisito

¹⁶ Keitou sa sega ni vakararavi ki na i talanoa buli eso ena neitou vakaraitaka vei kemuni na veika me baleta na lako mai ni noda Turaga o Jisu Karisito ena nona kaukauwa, ia keitou a vakadinadinataka ena mata i keitou na nona lagilagi.

¹⁷ Keitou a tiko e kea ena gauna sa vakacerecerei ka vakalagilagi koya kina na Kalou na Tamana, ni sa rogo kina vua e dua na domo mai na i Serau Lagilagi, ka vaka, “Oqo na noqu Luvequ e duabau ga, o koya ka'u sa dau vinakata vakalevu!”

¹⁸ Keitou a tiko vata kei Jisu ena ulunivanua tabu ka rogoca na domo oqo ni voqa sobu mai lomalagi.

¹⁹ Ena veika oqo, keitou sa vakabauta vakalevu cake sara kina na nodra i tukutuku na parofita. O koya oqo mo ni wanonova vinaka sara kina na nodra i tukutuku, me vaka na nomuni wanonova toka e dua na cina sa caudre tiko ena dua na vanua butobuto. Ia mo ni wanonova tikoga me yacova na gauna sa kida cake kina na rarama ni mataka vou ka cabe mai na kalokalo i volasiga ena yalomuni.

²⁰ Ia na ka bibi mo ni kila oqo: ni sa sega ni dua na tamata ena rawa ni vakamacalataka ga vakai koya na parofisai era tu ena i Vola Tabu.

²¹ Ni sa sega ni vu na parofisai ena lewa vakatamata, ia era sa tukuna ga na nona i tukutuku na Kalou o ira na tamata era sa tiko ena ruku ni veiliutaki ni Yalo Tabu.