2 Cesalonaika 1 - Vakavakadewa Vou kei na iVola tale eso

¹ Oqo na i vola mai vei iratou o Paula, Sailasa kei Timoci — Kivei ira na lewe ni soqosoqo lotu mai Cesalonaika, o ira era sa nona na Kalou o Tamada kei na Turaga o Jisu Karisito:

² Me nomuni na loloma kei na vakacegu mai vua na Kalou o Tamada kei na Turaga o Jisu Karisito.

Na Veilewai ni sa Lako Mai na Karisito

³ Sa kilikili me keitou sa dau vakavinavinaka tikoga vua na Kalou ena vukumuni na veiwekani. Sa dodonu me keitou kitaka tiko vakakina baleta ni sa tubu vakalevu sara na nomuni vakabauta ka sa toso cake tikoga na nomuni veilomani vakai kemuni.

⁴ Keitou sa dau vakacaucautaki kemuni kina ena veisoqosoqo lewenilotu ni Kalou ena vuku ni nomuni lomadei kei na nomuni vakabauta ena veivakacacani kecega kei na veika rarawa o ni sota kaya tiko.

⁵ Sa vakaraitaki ena veika oqori na dodonu ni lewa ni Kalou, ka sa kena i naki mo ni vakarautaki kina mo ni curu ki na nona matanitu. Sa i koya na matanitu oqo sa yaco tiko kina vei kemuni edaidai na veivakararawataki.

⁶ Ia ena vakayacora ga na ka dodonu na Kalou: ena vakararawataki ira sa vakavuna na nomuni rarawa o koya,

⁷ ka na vakacegui kemuni sa vakararawataki ka vakakina oi keitou. Ena vakayacora oqo o koya ena gauna sa rairai kina mai lomalagi na Turaga o Jisu vata kei ira na nona agilosi kaukauwa

⁸ ena yameyame ni buka, ka me ra totogitaki o ira era sa cata na Kalou ka sega ni vakabauta na i Tukutuku Vinaka ni noda Turaga o Jisu.

⁹ Sa nodra i totogi me ra vakarusai ka tawasei tani mai na mata ni Turaga kei na nona kaukauwa vakaiserau ka tawamudu.

¹⁰ Ni sa na lako mai o koya ena siga koya me vakalagilagi kina mai vei ira na nona tamata yalosavasava ka vakacaucautaki mai vei ira kece era sa vakabauta. O ni sa na okati talega kina oi kemuni o ni sa vakabauta na i tukutuku keitou sa tukuna vei kemuni.

¹¹ Sa i koya oqo na vuna keitou sa dau masulaki kemuni tikoga kina. Keitou sa kerea vua na Kalou me vakayacori kemuni mo ni bulataka na i tovo ni bula sa kacivi kemuni kina o koya, ka me vakayacora sara ena nona kaukauwa na nomuni veigagadre vinaka kecega kei na cakacakataki ni nomuni vakabauta.

¹² Me vakacaucautaki kina na Turaga o Jisu vei kemuni ka me vakacaucautaki kemuni talega kina o koya, me vaka na loloma-savu ni noda Kalou kei na Turaga o Jisu Karisito.