1 Veigauna 5 - Vakavakadewa Vou kei na iVola tale eso

Na Kawa i Rupeni

¹ Oqo o ira na kawa i Rupeni, na ulumatua vei ira na luve i Isireli tagane. (Ena vuku ni nona a mocera e dua vei ira na wati tamana, a sa kau laivi kina vua na nona dodonu ki na i tutu vakaulumatua ka sa soli oqori vei rau na luve i Iosefo.

² E dina ga ni kaukauwa duadua vei ira na veimataqali kecega na mataqali na Juta, ia sa nei Iosefo ga na i tutu vakaulumatua.)

³ E ratou sa lewe va na luve i Rupeni tagane, o Inoke, o Palu, o Esironi kei Kamai.

⁴ O ira oqo na kawa i Joeli me vakatekivu mai na dua na i tabatamata ki na dua tale: o Semaia, o Koki, o Semeai,

⁵ o Maika, o Riaia, o Peali

⁶ kei Piera. A sa vesuki Piera na turaga ni mataqali na Rupeni ka kauti koya yani vakabobula o Tikilaci Pilineseri na tui Asiria.

⁷ Ena i tukutuku ni vuvale, oqo o ira na qase ni veivuvale ena mataqali o Rupeni: o Jieli, o Sakaraia

⁸ kei Bela na luve i Asasi tagane ka makubuna o Sema ena mataqali i Joeli. Era a vakaitikotiko na mataqali oqo ena loma ni vanua o Aroeri me yaco ki na vualiku kei Nipo vata kei Peali Meoni.

⁹ A sa levu sara na nodra qele ni manumanu ena vanua o Kiliati, ka ra a mani tawana yani na vanua vaka ki na tokalau me yaco sara ki na vanua dravuisiga, ka qai tete yani ki na uciwai na Uferetisi.

¹⁰ Ena gauna i Saula na tui, era a vala kei ira na Akariti na mataqali o Rupeni; era a vakamatei ira ena i valu ka ra tawana yani na nodra vanua ena yasana vaka ki na tokalau kei Kiliati.

Na Kawa i Kata

¹¹ O ira na mataqali o Kata era sa vakaitikotiko ena vualiku ni vanua era tiko kina na Rupeni, ena vanua o Pasani ka yaco sara ki Salika mai na tokalau.

¹² Sa i Joeli e a tauyavutaka na mataqali sa liu ka tauyavutaka na kena e tarava o Safami. E rau a tauyavutaka na veimataqali tale eso mai Pasani o Janei vata kei Safati.

¹³ Na kena vo ni lewe ni mataqali era sa okati ena veivuvale e vitu oqo: o Maikeli, kei Mesulame, kei Sipa, kei Jorei, kei Jakani, kei Sia vata kei Iperi.

¹⁴ Oqo o ira era kawa i Epaieli, na luve i Uri tagane ka vakamuri lesu na nodra i tubutubu na nodra kawa me vakaoqo: o Epaieli, o Uri, o Jaroa, o Kiliati, o Maikeli, o Jisisei, o Jato kei Pusa.

¹⁵ Sa nodra i liuliu vakadua na veimataqali oqo o Ei, na luve i Apitieli tagane ka makubui Kuni.

¹⁶ Era a tiko voli ena veikoro e kea ena loma ni vanua o Pasani kei Kiliati, kei na vanua veico kecega e Saroni.

¹⁷ A volai na i vakamacala oqo ena nodrau gauna o Jocame na tui Juta kei Jeropoama na tui Isireli.

Na Mataivalu ni Mataqali mai na Tokalau

¹⁸ Era sa tiko ena loma ni mataqali o Rupeni kei na mataqali o Kata kei na i wase ni mataqali o Manasa era lewe 44,760 na tamata i valu ka ra a vulica vinaka na taurivaki ni i sasabai, na i seleiwau kei na dakaititi.

¹⁹ Era a valuti ira na veimataqali vaka-Akariti o Juturi, o Nefisi kei Notapi.

²⁰ Era a vakararavi vua na Kalou na mataqali tolutolu o Rupeni, Kata, kei na i wase ni mataqali o Manasa; era a masu vua ka kerea na nona veivuke; a sa rogoci ira na Kalou ka solia me ra qaqa vei ira na Akariti kei ira era sa to vata.

²¹ Era a taura vakaitoki mai vei ira na meca e 50,000 na kameli, e 250,000 na sipi kei na 2,000 na asa. Era a tauri ira vakavesu era lewe 100,000 na tamata me ra kaivesu ni i valu.

²² Era a vakamatea e lewe vuqa vei ira, baleta ni sa mai vua ga na Kalou na i valu oqo. Era a tiko ena vanua o ya me yacova na gauna ni veivakabobulataki.

O Ira na Tamata ena Tokalau ni Vanua o Manasa

²³ O ira na tamata ena tokalau ni vanua o Manasa era sa la'ki vakaitikotiko e Pasani; era sa tete yani vaka ki na vualiku ki Peali Erimoni kei Seniri, kei na Ulunivanua o Erimoni ka sa tubu cake vakalevu na nodra kawa.

²⁴ O ira oqo era sa turaga ni nodra mataqali: o Iferi, o Isai, o Ilieli, o Asirieli, o Jeremaia, o Otevaia kei Jatieli. Era sa tamata qaqa, era sai liuliu rogo ka kilai ena nodra veimataqali.

Era sa Kau Vakavesu na Mataqali mai na Tokalau

²⁵ Ia era sa talaidredre na tamata vua na Kalou ni nodra qase, ka ra sa biuti koya me ra la'ki qarava na veikalou ni veivanua tani eso sa vakasevi ira oti na Kalou.

²⁶ Ena ka oqo, a sa vakavuna kina na Kalou me curuma vakaukauwa yani na nodra vanua o Puli na tui Asiria (sa kilai talega ena yaca o Tikilaci Pilineseri). A sa kauti ira vakabobula na tamata mai na vanua o Rupeni, na vanua o Kata kei na tokalau ni vanua o Manasa, ka la'ki vakatikori ira vakadua e Ela, Apori, Ara, kei na tai ni uciwai o Kosani.