1 Veigauna 4 - Vakavakadewa Vou kei na iVola tale eso

Na Kawa i Juta

¹ Oqo eso vei ira na kawa i Juta: o Feresi, o Esironi, o Kamai, o Uri kei Sopali.

² O Sopali na tama i Reaia, o Reaia na tama i Jeaci; o Jeaci na tamadrau o Eumai kei Leati, na nodra qase na tamata era tiko mai Sora.

³ O Uri na ulumatua i Efiraca, na wati Kelevi na tamana ka sai ira na nona kawa era a tauyavutaka na koro o Peceliema. E ratou lewe tolu na luve i Uri tagane: o Etami, o Penueli kei Esa. E ratou sa lewe tolu na luve i Etami: o Jesireli, o Isima kei Itipasi; ia sa dua na ganedratou, o Esileliponi.

⁴ O Penueli sa tauyavutaka na koro o Kitori ka tauyavutaka o Esa na koro o Usa.

⁵ O Asuri, o koya ka tauyavutaka na koro o Tekoa, sa rua na watina, o Ela vata kei Neera.

⁶ E va na luvedrau tagane o Asuri kei Neera: o Eusami, o Eferi, o Temeni kei Easitari.

⁷ E ratou lewe tolu na luvedrau tagane o Asuri kei Ela: o Sereci, o Soari vata kei Ecinani.

⁸ O Kosa e tamadrau o Anupi kei Sopepa, na nodra i tubutubu na veimataqali era sa kawa mai vei Eareli na luve i Arumi tagane.

⁹ A sa dua na tamata na yacana o Japesi sa dau rokovi ka dokai vakalevu vei iratou na lewe ni nona matavuvale. A vakayacani koya o tinana me o “Japesi” baleta ni a rarawa vakalevu ena siga sa vakasucumi koya mai kina.

¹⁰ Sa qai masuta na Kalou ni Isireli o Japesi ka kaya vakaoqo, “Mo ni vakalougatataki au, kemuni na Kalou, ka vakalevutaka na i yalayala ni noqu vanua. Mo ni tiko ga kei au ka maroroi au mai na veika ni veivakaleqai kei na veivakararawataki.” A sa vakayacora na Kalou na ka sa kerea o Japesi.

Na Veivuvale Tale Eso

¹¹ O Kelevi, na taci Sura, a sa dua na luvena tagane, o Meiri. O Meiri na tama i Esitoni

¹² ka lewe tolu na luvena tagane o Esitoni: o Pecirafa, o Pasea kei Teina. A sa tauyavutaka o Teina na koro levu o Naasi. Era sa vakaitikotiko mai Reka o ira na nodra kawa.

¹³ E rau sa lewe rua na luve i Kenasi tagane: o Ocinieli kei Siraia. E rau lewe rua talega na luve i Ocinieli tagane, o Caca vata kei Mionocei.

¹⁴ O Mionocei na tama i Ofira. O Siraia na tama i Jope ka sa tauyavutaka na i matai ni cakacaka ni liga.

¹⁵ O Kelevi na luve i Jefune, e tolu na luvena tagane: o Iru, o Ela vata kei Naomi. O Ela na tama i Kenasi.

¹⁶ E ratou sa lewe va na luve i Jialieli tagane: o Sifi, o Sifa, o Tiria vata kei Esareli.

¹⁷ E ratou sa lewe va na luve i Esera tagane: o Jica, o Mereti, o Iferi kei Jaloni. E rau a vakawati o Mereti kei Picaia na luve i tui Ijipita yalewa ka nodrau ulumatua yalewa o Miriama, e qai rua na luvedrau tagane, o Samei vata kei Isipa. Sa i Isipa ka a tauyavutaka na koro o Esitimoa.

¹⁸ A qai vakawati tale o Mereti kei na dua na yalewa mai na mataqali i Juta, e ratou lewe tolu na luvedrau tagane: o Joreti, o koya sa tauyavutaka na koro o Kitori; o Eferi, o koya sa tauyavutaka na koro o Soko; kei Jikucieli, o koya sa tauyavutaka na koro o Sanoa.

¹⁹ O Otaia erau sa vakawati kei na ganei Neami. O ira na nodrau kawa era a tauyavutaka na mataqali o Kami era sa tiko ena koro o Kila vata kei na mataqali o Meka era sa tiko ena koro o Esitimoa.

²⁰ E ratou lewe va na luve i Saimoni tagane: o Eminoni, o Rina, o Penianani kei Tiloni. E rau lewe rua na luve i Isi tagane: o Soeci vata kei Penisoeci.

Na Kawa i Sela

²¹ O Sela e dua vei ira na luve i Juta tagane. O ira na nona kawa sa okati kina o Eri, o koya sa tauyavutaka na koro o Leka; o Lata, o koya sa tauyavutaka na koro o Maresa; o ira na lewe ni mataqali dautalitali era sa tiko ena koro o Peci Asipea;

²² o Jokimi kei ira na tamata era sa tiko ena koro o Kosepa; kei rau o Joasa kei Sarafi, o rau ka rau vakawati yalewa ni Moapi ka qai la'ki tiko e Peceliema. (Oqo era i tukutuku makawa sara.)

²³ Era sa nona dautulikuro na tui era sa vakaitikotiko ena koro o Netaima kei Ketera.

Na Kawa i Simione

²⁴ E ratou sa lewe lima na luve i Simione tagane: o Nimueli, o Jamini, o Jaripi, o Sira kei Saula.

²⁵ Na luve i Saula tagane o Salumi, na makubuna o Mipisami ka makubuna tagane vakarua o Misima.

²⁶ Me vakatekivu mai vei Misima, sa qai dewa sobu na kawa vei Amueli, Sakuli kei Semeai.

²⁷ Era sa lewe 16 taucoko na luve i Semeai tagane ka ratou lewe ono na luvena yalewa, ia era lewe lailai sobu na luvedra na wekana ka sega soti ni tubu na nodra mataqali na Simione me vakataki ira na mataqali i Juta.

²⁸ Me la'ki yacova sara na gauna i Tevita na tui, era sa tiko ga na kawa i Simione ena veikoro oqo: o Perisepa, o Molata, o Asarisuali,

²⁹ o Pila, o Esemi, o Tolati,

³⁰ o Pecueli, o Orima, o Sikilaki,

³¹ o Peci Marikapoci, o Asarisusimi, o Pecipiri vata kei Sereimi.

³² Era a tiko talega ena lima na vanua oqo: o Etami, o Eini, o Rimoni, o Tokeni, o Asani,

³³ vata kei na veikoro e volita me la'ki yaco sara yani vaka ki na ceva i ra ki na koro o Peali. Oqo na i tukutuku vakaivola eso era sa maroroya tu me baleta na nodra veivuvale kei na veivanua era a tiko kina.

³⁴ Oqo na yacadra na nodra turaga ni mataqali: o Mesopapi, o Jamileki, o Josa na luve i Amasaia,

³⁵ o Joeli, o Jeu na luve i Josipaia ka luve i Seraia na luve i Esieli,

³⁶ o Elioenai, o Jeekopa, o Jisoaia, o Asaia, o Etieli, o Jesimieli, o Penaia,

³⁷ o Sisa (na luve i Sifi tagane na luve i Eloni na luvei i Jetaia na luve i Simiri na luve i Semaia).

³⁸ Ena vuku ni kena sa tubu cake tikoga na nodra veimatavuvale kei na mataqali o ira sa volai oqo na yacadra,

³⁹ era a tete yani vaka ki na ra, ka voleka ni tarai Kira. Era sa qai vakania na nodra sipi ena tokalau ni buca e koto kina na koro o ya.

⁴⁰ Era a kunea e levu sara na vanua veico bulabula ni vakana manumanu mai kea, ena vanua galala ka sautu. Era sa tawana na vanua o ya na luve i Ame.

⁴¹ Ena gauna i Esekaia na tui Juta, era a lako i Kira na tamata sa cavuti e cake na yacadra ka ra vakarusa na veivalelaca kei na veivale na tiko e kea. Era vakasavi ira tani na lewena, ka ra vakaitikotiko tudei kina, ni sa sautu dina na co e kea me kedra na nodra sipi.

⁴² Era sa lewe 500 tale na kawa i Simione era a lako vaka ki na tokalau kei Itomi. Era a liutaki mai vei iratou na luvena tagane o Isi: o Pilataia, o Nearaia, o Rifaia kei Usieli.

⁴³ Era a vakamatei ira na vo-ni-bula ni Amalekaiti ka ra a dro, ka ra sa tiko mai kea me yacova na siga oqo.