1 Veigauna 26 - Vakavakadewa Vou kei na iVola tale eso

Ira na Dauyadrava na Vale ni Kalou

¹ Oqo na i lesilesi sa soli vei ira na Livai me ra dauyadrava na vale tabu. Sa okati mai na mataqali i Kora o Meselimaia na luve i Kora tagane, mai na vuvale i Esava.

² E ratou sa lewe vitu na luvena tagane: ena kedratou veitarataravi, sai ulumatua o Sakaraia, na kena i karua o Jitieli, na i katolu o Sepataia, na i kava o Jacinieli,

³ na i kalima o Ilama, na i kaono o Joanani ka kena i kavitu o Elioenai.

⁴ E okati talega kina o Opeti Itomi, o koya sa vakalougatataka na Kalou ni sa solia vua e walu na luvena tagane: ena kena veitaratavavi, sai ulumatua o Semaia, na kena i karua o Jiosevata, na i katolu o Jica, na i kava o Sakari, na i kalima o Nacanieli,

⁵ na i kaono o Amieli, na i kavitu o Isakari ka kena i kawalu o Piulicei.

⁶ Na ulumatua tagane nei Opeti Itomi, o Semaia, a sa ono na luvena tagane ka ratou a gumatua ka yaga ki na nodra mataqali ena vuku ni nodra daurawa-ka vakalevu.

⁷ Na yacadratou o Ocini, kei Rifaeli, kei Opeti, kei Elisapati, kei Ilaiu, vata kei Simakaia. Oi rau na lewe rua na qai cavuti e muri e rau sa tamata nuitaki ena vuqa na ka.

⁸ E vakarautaka rawa na lewe ni vuvale nei Opeti Itomi e lewe 62 na tamata sa vakarautaki vinaka ka nuitaki ena cakacaka oqo.

⁹ E vakarautaka rawa na lewe ni vuvale nei Meselimaia e lewe 18 na tamata sa vakarautaki vinaka ka nuitaki.

¹⁰ Mai na vuvale i Mirari, e tiko kina o Osa, ka ratou lewe va na luvena tagane: o Simiri (a lesi koya o tamana me nodratou i liuliu, ka dina ga ni sega ni ulumatua o koya),

¹¹ kei Ilikaia, kei Tipalaia, vata kei Sakaraia. Ni ra wili vata kece, era sa lewe 13 taucoko na lewe ni vuvale i Osa era sa dauyadrava na vale tabu.

¹² Era sa wase vakailawalawa na matayadra ni vale tabu, ena nodra i wasewase vakavuvale, ka sa lesi na nodra dui i tavi ena vale tabu me vakataki ira na Livai tale eso.

¹³ A sa ia na vakawiri madigi me kilai kina na matamata eso me ra dui yadrava, ka veitalia na levu se lalai ni vuvale.

¹⁴ A donui Selemaia na madigi me yadrava na matamata vaka ki na tokalau, ka donui Sakaraia na luvena tagane, o koya na daunivakasala vinaka, na madigi ni kena yadravi na matamata ki na vualiku.

¹⁵ A sa nei Opeti Itomi na madigi me yadrava na matamata ki na ceva, ia o ira na luvena tagane era sa dauyadrava na valeniyau.

¹⁶ Na madigi ni kena yadravi na matamata ki na ra sa dusi rau o Supimi kei Osa, ka vaka talega kina na matamata ena sala ka lako cake ki Salekoci. A sa tuvani na cakacaka ni yadra ena kedra gauna, me vaka na kedra veitarataravi.

¹⁷ Ena matamata mai na tokalau, eratou toka kina e ono na Livai me ratou yadra ena veisiga, ka ratou lewe va mai na vualiku, ka lewe va mai na ceva. E lewe va na yadra eratou sa dauyadrava na valeniyau ena veisiga, ka tau yarua ena vale yadua.

¹⁸ E ratou yadrava na sala ki na lomanibai mai na yasana ki na ra e ratou lewe va, ka rau lewe rua e rau yadra toka ga ena lomanibai vakaikoya.

¹⁹ Sa i koya oqori na i wasewase ni veiqaravi ena yadravi ni katuba vei iratou na vuvale i Kora kei na vuvale i Mirari.

Na Veitavi Tale Eso ni Valenisoro

²⁰ Eso tale vei ira na Livai era sa qarava na valeniyau ni vale tabu kei na vale e daumaroroi kina na i yau sa vakatabui me nona na Kalou.

²¹ O Latani, e dua vei ira na luve i Kerisoni tagane, a sa nodra qase eso na matavuvale ka wili kina na vuvale nei luvena tagane o Jieli.

²² E rua tale na luve i Latani tagane, o Secami vata kei Joeli, e rau sa qarava na valeniyau ni vale tabu kei na vale ni maroroi yaya.

²³ A sa lesi talega na nodratou cakacaka o iratou na kawa i Emirami, kei Isari, kei Epironi, vata kei Usieli.

²⁴ A lesi me kena i vakalesilesi liu ka lewa na valeniyau ni vale tabu o Sipueli, mai na mataqali i Kerisomi na luve i Mosese tagane.

²⁵ Sa rau veiwekani vata kei Silomeci baleta ni rau sa veitacini o Kerisomi kei Iliesa. O ira na wekana mai vei Iliesa: o Riapaia na luvena tagane, kei Jesaia na luvena tagane, kei Jorami na luvena tagane, kei Sikiri na luvena tagane, kei Silomeci na luvena tagane.

²⁶ O Silomeci oqo kei ira na lewe ni nona vuvale era sa maroroya na veisolisoli i yau kecega sa vakatabuya vua na Kalou o Tevita na tui, kei ira na qase ni veivuvale, kei ira na turaga ni mataqali, vata kei ira na turaganivalu.

²⁷ Era a taura eso na i tokinivalu sa rawati mai na i valu ka vakatabuya me vakayagataki ena Valenisoro.

²⁸ Ia o Silomeci kei na nona vuvale e ratou sa dau maroroya na veiyaya kece ka vakatabui me vakayagataki ena Valenisoro, ka okati kina na veiyau ka ratou sa kauta mai o Samuela na parofita, kei Saula na tui, kei Epineri na luve i Neri, vata kei Joape na luve i Seruwaia.

Na Nodra i Tavi na Vo ni Livai

²⁹ Vei ira na kawa i Isari, a sa lesi o Kinanaia kei iratou na luvena tagane me ratou qarava na cakacaka raraba vakaivola: o ya na kena volai na i tukutuku bibi eso kei na kena wali na nodra veileti na Isireli.

³⁰ Vei ira na kawa i Epironi, a sa lesi o Esapaia kei na 1,700 na wekana, era sa tamata qaqa kece o ira oqo, me ra qarava na cakacaka raraba me baleta na veika vakalotu kei na bula raraba e Isireli mai na yasana vaka ki na ra ni Joritani.

³¹ A sa liutaki ira na kawa i Epironi o Jiraia. Ena i ka 40 ni yabaki ni veiliutaki vakatui i Tevita, a sa vakayacori e dua na veivakatarogi me baleta na nodra kawa na vuvale i Epironi, ka mani kunei kina ni so na sotia yaloqaqa mai na vuvale oqo era sa la'ki vakaitikotiko mai Jaseri ena nodra vanua na kai Kiliati.

³² A sa digitaka o Tevita na tui e lewe 2,700 na i liuliu ni vuvale mai vei ira na weka i Jiraia ka lesi ira me ra vakailesilesi liu ena qaravi ni veika vakalotu kei na veika raraba ni matanitu e Isireli mai na yasana vaka ki na tokalau ni Uciwai o Joritani, oqori ena vanua o Rupeni, o Kata, kei na Tokalau ni vanua o Manasa.