1 Veigauna 22 - Vakavakadewa Vou kei na iVola tale eso

¹ Sa qai vakarota o Tevita, “Oqo na vanua ena tara kina na vale i Jiova na Kalou. Oqo na i cabocabonisoro me ra mai vakacabora kina na nodra i soro kama na Isireli.”

Na Vakavakarau ki na Tara Valenisoro

² A sa qai vakarota o Tevita na tui me ra soqoni vata yani o ira kece na vulagi era sa tiko ena nodra vanua na Isireli ka vakacakacakataki ira. Eso vei ira era a vakarautaka na vatu buloko ni tara Valenisoro.

³ A sa solia vakalevu o Tevita na kaukamea me buli kina na i vako kei na i qaso ni sogo ni veimatamata kau; a sa levu sara na parasa ka sa sega ni dua me vakarautaka rawa na kena bibi.

⁴ A sa veivosakitaka vei ira na kai Taia kei Saitoni me ra kauta vakalevu mai vua na kau sitari.

⁵ A sa nanuma vakaoqo o Tevita, “Na Valenisoro me na tara oqo o Solomoni na luvequ e dodonu me daumaka sara ka rogo levu e vuravura. Ia e se gone sara o koya ka lecaika, ka sa dodonu kina me'u tekivu vakarautaka eso na ka.” A sa binia rawa tu kina o Tevita e dua na i wase levu ni yaya ni tara vale ni se bera ni mate.

⁶ A qai talatala vua na luvena o Solomoni ka vakaroti koya me tara e dua na vale tabu i Jiova, na nodra Kalou na Isireli.

⁷ A sa tukuna vua, “I na luvequ, au a vinakata me'u tara e dua na vale tabu me dokai kina o Jiova na noqu Kalou.

⁸ Ia sa qai kaya vei au o Jiova ni sa rui levu sara na tamata ka'u a vakamatea, ka levu talega na i valu ka'u a vala kina. Ena ka oqo, ena vuku ni vakadave dra au a vakavuna, sa sega kina ni vinakata o koya me'u tara e dua na vale me nona.

⁹ Ia sa cakava ga vei au na nona vosa ni yalayala oqo: ‘Ena dua na luvemu tagane ka na veiliutaki vakatui ena gauna vinaka ni tiko sautu, baleta ni'u na solia vua na bula vakacegu mai vei ira kecega na nona meca. Ena yacana o Solomoni, baleta ni'u na solia vei Isireli na bula vakacegu kei na bula sa taqomaki ena gauna ni nona veiliutaki vakatui.

¹⁰ O koya me na tara e dua na vale tabu me noqu. Ena luvequ o koya, ka'u na tamana oi au. Na nona kawa vakatui ena veiliutaki e Isireli ka tawa mudu.’ ”

¹¹ A sa tomana na nona vosa o Tevita, ka kaya, “Ia oqo, na luvequ, me tiko ga kei iko o Jiova na nomu Kalou, ka me yaco na nona vosa ni yalayala mo rawata vakavinaka kina na kena tara e dua na vale tabu vei Jiova.

¹² Me solia o Jiova na nomu Kalou vei iko na vuku kei na yalomatua, me na rawa kina ni o liutaki Isireli me vaka na nona Lawa.

¹³ Kevaka o na talairawarawa ki na lawa kecega sa solia o Jiova vei Mosese me baleti Isireli, o na yaco mo tamata qaqa ena rawa-ka. Mo yaloqaqa ka lomadei, ka kakua sara ni vakatara e dua na ka me vakarerei iko.

¹⁴ Ia me baleta na Valenisoro ena vuku ni veika au sa sasagataka rawa, au sa kumuna rawa e sivia na 3,000 na tani na koula kei na sivia e 34,000 na tani na siliva me vakayagataki ena tara vale. Me kena i kuri oqori, sa tu talega na parasa kei na kaukamea ka sega ni yalani na kena levu. Au sa vakarautaka talega na kau kei na vatu, ia mo qai kuria o iko.

¹⁵ Era sa lewe levu sara na nomu tamata cakacaka. Sa tiko o ira me ra cakacaka ena i qaqinivatu, era sa tiko o ira na matai ni ta vatu kei ira na mataisau, era sa tiko talega e dua na i wase levu ni tamata era liga maqosa ena veimataqali cakacaka eso sa caka

¹⁶ ena koula, kei na siliva, kei na parasa, vata kei na kaukamea. Ia oqo, mo tekivutaka sara na cakacaka, ena tiko vata kei iko o Jiova.”

¹⁷ A sa vakaroti ira na nodra qase na Isireli o Tevita me ra vukei Solomoni.

¹⁸ A sa kaya o koya, “O Jiova na nomudou Kalou sa dau tiko vata kei kemudou ka solia vei kemudou na bula vakacegu ena veiyasana kecega. A sa vakavuna o koya me'u vakadrukai ira kece sara na tamata era a taukena tu e liu na vanua oqo, ka ra sa vakarorogo ka qali tu oqo vei kemuni ka vakakina vei Jiova.

¹⁹ Ia oqo, ni qaravi Jiova sara na nomuni Kalou ena lomamuni kei na yalomuni taucoko. Ni tekivu tara na Valenisoro, me rawa ni la'ki maroroi kina na Kato ni Veiyalayalati i Jiova, ka vakakina na i yaya tabu kece sara sa vakayagataki ena qaravi ni sokalou ki vua.”